Moskvada son bir ayda baş verənləri Rusiyadakı səfirimiz sərt tənqid edib
Azərbaycanın Rusiyadakı səfiri Polad Bülbüloğlu rəsmi Moskvanı tənqid edib. Salamnews-un məlumatına görə, səfir Polad Bülbüloğlu Rusiya Federal Miqrasiya Xidmətinin direktoru Konstantin Romodanovskiylə birincinin təşəbbüsü ilə baş tutan görüş zamanı bildirib ki, Rusiyada miqrasiya sahəsində yeniliklərin tətbiq edildiyi hazırkı mərhələdə Rusiyadan Azərbaycan və digər MDB ölkələrinin vətəndaşları kütləvi şəkildə çıxarılır.

Səfir narahatlıqla vurğulayıb ki, xarici vətəndaşın Rusiyaya daxil olub-olmaması barədə qərarı Rusiyada biri-birindən asılı olmayan 11 qurum verir və təklif edib ki, qadağa ilə üzləşmiş vətəndaşlara aid informasiya mübadiləsi aparılsın. Azərbaycan Miqrasiya Xidmətinin təmsilçiləri bütün məsələləri müzakirə etmək üçün yaxın zamanda rusiyalı həmkarlarla görüşməyə hazırdırlar. O həmçinin Moskva, Sankt-Peterburq və Yekaterinburq aeroportlarında Rusiyaya gələn Azərbaycan vətəndaşlarına heç bir izahat verilmədən Rusiyaya daxil olmaq qadağan edildiyini bildirib: “Nəticədə elə bir vəziyyət yaranır ki, Azərbaycan vətəndaşlarını aeroporta gəldikdə fakt qarşısında qoyurlar və oradan vətəninə göndərirlər. Bu müxtəlif kateqoriyalı vətəndaşlardır - onların arasında Rusiya ali təhsil ocaqlarının tələbələri, hərdən məktəblilər, tranzitlə gedən vətəndaşlar, deportasiya nəticəsində üzvləri biri-birindən ayrı düşən ailələr və s. Hətta iki epizodda Rusiya XIN-də rəsmi akkreditasiyası olan Azərbaycanın Rusiyadakı səfirliyinin əməkdaşları Rusiya ərazisinə buraxılmayıblar”.

Qeyd edək ki, ötən ay Moskvada Yeqor Şerbakov azərbaycanlı Orxan Zeynalov tərəfindən qətlə yetirilməsindən sonra başlayan olaylar zamanı azərbaycanlılara qarşı başlayan kütləvi hücumlar zamanı səfir Polad Bülbüloğlu baş verənlərə operativ reaksiya verib. Rusiya telekanallarına müsahibə verən səfir olayın qızışdırılmasına görə Rusiya mediasını ittiham edib. Eyni zamanda Orxan Zeynalovun həbsi zaman Rusiya telekanallarında yayımlanan videogörüntülərə münasibət bildirərək xoşagəlməz hal adlandırıb. “Bu, məhkəmə-hüquq qaydaları kodeksinin pozulması deməkdir. Bütün hüquq müdafiəçiləri internetdə yazır ki, baş verənlər insan hüquqlarının pozulmasıdır. O, xarici ölkə vətəndaşıdır. Ona lazımi qaydada münasibət olmalıydı. Hər şeydən əvvəl ona konsul dəstəyi göstərilməli idi, vəkil və tərcüməçi ilə təmin olunmalı idi. Əgər həmin insan günahkardırsa, qanun çərçivəsində layiqli cəzasını almalıdır”.

Səfir Biryulevo rayonunda baş vermiş iğtişaşlara görə Rusiya hakimiyyətini qınayıb. Sitat: “Qətl hadisəsi oktyabrın 10-da baş verib. Nədənsə iğtişaşlar 3 gün sonra başlayıb. Biryulevo rayonunda baş verən hadisələr zamanı saxlanılanların əksəriyyəti o rayonun sakinləri deyil, digər rayonlardan gələnlərdir. Niyə digər rayonlardan insanlar gələrək başını OMON-un dubinkasının altına qoyur? Normal insan bunu edərmi? Bunu eləmək üçün gərək insan öyrədilsin, motivasiya olunsun. Bu, o deməkdir ki, baş verən hadisələr üçüncü bir qüvvə üçün vacib idi. Azərbaycanla Rusiyanın arasını vurmaq istəyirlər. Əgər bir siyasətçi kimi soruşursunuzsa, bu Rusiya prezidenti Vladimir Putinin Azərbaycana səfərinə cavab idi. Bu iki ölkə və xalq arasında münasibətləri gərginləşdirmək üçün edilmişdi. Qabaqcadan demək istəyirəm ki, bu, alınmayacaq”.

Qeyd edək ki, səfir Polad Bülbüloğlunun bu addımı kifayət qədər gözlənilməzdir. Çünki bir çoxları hesab edir ki, Azərbaycan hakimiyyəti Rusiyada baş verənlərə məlum səbəblərdən sərt reaksiya verə bilməyəcək. Əslində Bakıdakı reaksiya müəyyən mənada bu iddianı təsdiqləyirdi. Çünki Moskva olaylarına Bakıdan reaksiya lazım olduğu qədər sərt və operativ olmadı. Üstəlik, hökumətlə yanaşı parlament də hadisəyə operativ reaksiya verərək Moskvaya nümayəndə göndərmədi. Bütün bunların fonunda indiyə qədər Rusiyaya bağlı şəxs kimi tanınan səfir Polad Bülbüloğlu kifayət qədər açıq və sərt reaksiya verərək olayları pislədi. Hətta o qədər diqqətçəkən oldu ki, Moskvada təxminən eyni münasibətlə üzləşən ermənilərin də diqqətini cəlb elədi. Ermənistan mediası səfirin addımını təqdir edərək bunun fonunda səssiz qalan İrəvanın elçisini tənqid etdi. Əslində Polad Bülbüloğlu bütün səfirlərin etməli olduğunu edib. Bu səbəbdən də diplomatlardan uzun illər dəstək görməyən azərbaycanlılar üçün bu addım xeyli müsbət qarşılanıb.