Ərinin həbs olunmasını hakim Sevinc Quliyeva özü təşkil edib, onu az müddət sonra azad etdirə biləcəyinə görə

gundemxeber.az Nərimanov Rayon Məhkəməsinin hakimi Sevinc Quliyeva həyat yoldaşının dələduz kimi həbsini planlayıb. Hazırda Nərimanov Rayon Məhkəməsinin hakimi kimi çalışan Sevinc Quliyevanın həyat yoldaşı sən demə dələduzluğa görə həbs olunub. Əlbəttə, “hər bir şəxs öz əməlinə görə məsuliyyət daşıyır deyib, ərinin həbsdə olmasının Sevinc Quliyeva ilə nə əlaqəsi ola bilər”, deyə bilərik. Elə biz də lap başda bunu deyib informasiyaya ciddi yanaşmasaq da, sonra apardığımız araşdırma zamanı ciddi və bir o qədər də maraqlı məqamlar üzə çıxdı.
Bu barədə pia.az-a daxil olan məlumatlarda bildirilir ki, hakimin əri Kənan Quliyev “Kamran” MMC-nin adı ilə fəaliyyət göstərən şirkət vasitəsiylə sayları 300-ü keçən vətəndaşdan ev alqı-satqısı üçün külli miqdarda pul alıb. Tikilməkdə olan binadan onlara ev verəcəyinə dair söz verən Kənana hər müştəri ən az 40 min AZN ödəyib. Nəticədə əldə olunan vəsitin məbləği 12 milyondan çox olub. Əlbəttə ki, son nəticədə nə ev tikilib, nə də vətəndaşların pulu qaytarılıb. İddiaya görə, ərinin həbs olunmasını da hakim Sevinc Quliyeva məsləhət görüb. Çünki həbsə girərərsə onu az müddət sonra azad etdirə biləcəyinə əmin olub.
Məlumatda bildirilir ki, ssenari hakim xanımın istəyi üzrə yeriyib və Kənan Quliyev həbs olunub. Nəticədə əldə 8 milyondan çox vəsaitin qaldığı bildirilir. Lakin bir müddət sonra Sevinc xanımın ərini azad etdirmək planı uğursuzluğa uğrayıb. Bunun bir səbəbinin mətbuatda gedən yazılar olduğu, digər səbəbi isə “Şərur İnşaat”-ın sahibi İsfəndiyar Axundov olduğu bildirilir.
Əlbəttə illərlə Bakıda binalar tikib satan, barəsində olmazın dedi-qodular yayılan və nədənsə ona qarşı başladılan cinayət işlərinin heç biri mənfi sonuclanmayan iş adamının məsələyə qarışması və yaxud da qarışdırılması təsadüf deyil.
Araşdırmamız zamanı “Kamran” MMC-nin Yasamalda tikməyə cəhd etdiyi binanın “Şərur” MTK ilə heç bir əlaqəsinin olmadığını öyrəndik. Lakin Kənanın həbsi planlaşdırılan zaman həmin yarımçıq binalar İsfəndiyar Axundova təklif olunub. O da şərtləri götür-qoy etdikdən sonra razılaşıb. Bundan sonra Sevinc Quliyeva adamlarını işə salaraq şikayətçi vətəndaşları İsfəndiyar Axundovun üstünə salıb. Axundov da öz növbəsində onların bir qisminə Hövsanda ev verə biləcəyini deyib. Bununla da İ. Axundovun adı cinayət işinə “Kənanın ortağı” kimi salınıb. Hazırda istintaqı yekunlaşmayan prosesdə Axundova qarşı istifadə edilən ən böyük “silah” da məhz onun zərərçkmişlərə ev vermək barədə verdiyi təklifdir.
Məlumata görə, ona “əgər Kənanla şərik deyildinsə niyə o vətəndaşlara ev vermək istəmisən”, kimi normalda absurd, lakin hüququn qarşısında insanı günahkar edən iddia qoyulur. Məlumat üçün qeyd edək ki, “Kamran” MMC-nin tikdirməyə cəhd etdiyi binanın sənədləri olmadığından İ. Axundov bu binanı məhkəmə və istintaq üçün sübut kimi təqdim olunması mümkün olmayan bir neçə kağız əsasında alıb. Yəni o, hazırda ifadəsində “mən binanı almışam, ona görə vətəndaşlara ev verirəm”, desə belə, nə hüquq buna inanadı, nə də Sevinc xanımın yürüməkdə olan planı.
Başqa sözlə hazırda Kürdəxanıda qazamat həyatı yaşayan Kənan Quliyevin azadlığa çıxması üçün əvvəlcə İsfəndiyar Axundovu ona “şərik qoşan” Sevinc Quliyeva hazırda bu planının uğursuzluğunu hər addımda yaşamaqdadır. İddiaya görə, İ. Axundov həm Kənanın azadlığa çıxmasına, həm də Sevinc Quliyevanın vəzifəsində rahat fəaliyyət göstərməsinə mane olur.
Məsələ ilə bağlı qarşı tərəfin mövqeyini dərc etməyə hazırıq.

Elçin Əmirov