Elşad Abdullayevlə Arzu Kazımov arasında şok telefon danışığı “Gündəm xəbər”də

gundemxeber.az Ölkə gündəminin əsas mövzusu fəaliyyəti dayandırılmış ABU-nun rektoru Elşad Abdullayevin açıqlamaları və ictimaiyyətə təqdim etdiyi videogörüntülər olaraq qalır. Hazırda proseslər artıq Prezident Adminstrasiyasının rəhbəri Ramiz Mehdiyevə ittihamlar üzərində qurulub. Sabiq rektorun iddialarının əsasında isə qardaşı, MTN zabiti Mahir Abdullayevin oğurlanması durur. Hazırda bu işlə bağlı Müstəqil İstintaq Komissiyası yaradılıb və işdə adı hallandırılan şəxslərdən biri Arzu Kazımov həbs edilib.
Məlumat üçün bildirək ki, A.Kazımov “İnşaatservis-2002" şirkətinin təsisçisi və rəhbəridir. E.Abdullayev mediaya bildirib ki, A.Kazımov qardaşının qaytarılması müqabilində yüksək vəzifəli şəxslərə rüşvət vermək üçün ondan 3 milyon dollar alıb. O, qardaşı qaytarılmadığı üçün sonradan pulunu geri istəyib, amma A.Kazımov vəsaiti qaytarmayıb. Bunun müqabilində ona ev və torpaq sahəsi verib. Lakin E.Abdullayev pullarının qaytarılmasını tələb edir. Ortada olan faktlara rəğmən qarşı tərəf ittihamları qəbul etmir. A. Kazımovun vəkili mətbuata açıqlamasında bildirib ki, “Arzu Kazımova qarşı irəli sürülən ittiham və onun həbsi əsassızdır. Çünki nə Elşad Abdullayevin Arzu Kazımova qardaşının qaytarılması müqabilində pul verməsini, nə də Kazımovun bu pulları ondan Mahir Abdullayevin qaytarılması müqabilində aldığını sübut edən hər hansı sənəd və ya sübut yoxdur”. Onun sözlərinə görə, A.Kazımov pulları E.Abdullayevdən 30 faiz sələmə alıb və bunu təsdiq edən notariat sənədi var: «A.Kazımov pulu 1 il yarım müddətə tikinti işlərini davam etdirməsi üçün alıb və sənəddə təsdiq olunub. Lakin bir neçə aydan sonra E.Abdullayev pulunu tələb edib. A.Kazımov əvvəlcə Əhməd Cavad küçəsində tikdiyi evdə E.Abdullayevin hansısa vəzifəli şəxsə bağışlaması üçün 500 min manat qiymət qoyduqları 411 kv.metr mənzil verib. Bundan sonra isə A.Kazımov aldığı pulun qalanının müqabilində Suraxanıda, aeroport yolunun üstündə yerləşən, qardaşına məxsus 2 hektar 20 sot torpağı, oradakı ofis binası və şirkəti ilə birgə E.Abdullayevə verib. Tərəflər razılaşıb ki, borc və sələm ödənilib, bu barədə notarius sənədi var".
Arzu Kazımov və Elşad Abdullayev arasındakı telefon danışığı haqda məlumat əldə etmişik. Həmin danışığın stenoqramın sizə təqdim edirik:
“Arzu Kazımov: Sənə dedim məlumatın olsun. Birinci gün axşam artıq cavab veriləcək. O barədə söhbət filan etsək dedim səhər özün də gəl beş dəqiqə söhbət edək vəssalam. Gəlirsən?
Elşad Abdullayev: Gəlirəm, amma bu məsələyə ciddi baxsınlar.
A.K: Ciddi baxacam da. Mən səninlə dünən bu barədə danışdım. Sən olma, mən olum. Mənim haqqımda cidd danışılmasa necə olar. Ciddi yanaşılmayacaqsa onda mən də öz fikirlərimi deyəcəm. Deyəcəm ki, bax qardaş əgər məsləhətdirsə bir balaca belə bir işimiz olub, filan-beşman, yaxud da köməyin dəyə bilərsə, bunu həll elə. Ona bəlkə də elə pul lazımdır. Doğrudan da belə götürəndə bir balaca şeydir. Ona görə də sənə dediyim kimi bir də bu mözuya qayıtmırıq. Bu mövzu nədir mən heç ona qarışmıram.
E.A: Arzu, qadan alım bu pulu kim alıb, qardaş? Necə yəni bir də bu mövzuya qayıtmayaq, insan taleyidir bu...
A.K:Mən sənə başqa şey demirəm ki?
E.A: Denən ki, pulu alanda yaxşı idi. Bir ildir sən mənim ətrafımda yüz dənə belə “xlapupuşka” yaratmısan. Mən pulu Telmana vermişəm.
A.K: Kim xlapupuşka yaradıb sənin ətrafında?
E.A: Zahid Dünyamalıyev, mən pulu Telman Muradova vermişəm, yoxsa Səftərə, Sahibə vermişəm?
A.K: Sən pulu gətirib sonra verməmisən də qağa.
E.A: Ə yoxe, boş söhbətlərdi hamısı, bilirsən.
A.K: Boş söhbətdir deyəndə
E.A: Söhbət deyil axı.
A.K: Sən özün nə istəyirsən mən qalmışam belə. Telefonda da elə danışırsan, sən hər şeyi fırladırsan, gətirirsən boşluğun üzərinə.
E.A: Elə deyil, axı, bəs siz də...
A.K: Ay qardaş, bu söhbət dünən oldu, qurtardı, getdi də.
E.A: Mən telefonla söhbət eləmişəm ki. Mən telefonla söhbət eləmişəm?
A.K: Mən sənə nə dedim? Dedim birinci gün sən də gəl görüşək, bu məsələ bitsin də.
E.A: 20-30-dənə Telman salıb üstümə, fırlayır adamı. Nə fırlayırsan, denən ya hə, ya yox, qurtar işimizi də bilək.
A.K: Bunu özün niyə demirsən ki?
E.A: Az demişəm, nə qədər demək olar adama?
A.K: İndi onu mənim deməyim ayrı, sənin deməyin ayrı. İndi birinci gün görüşən kimi sənə deyəcəm gəl ora. Gələrsən nə sözün var deyərsən.
E.A: Dünən bu məsələni sizinlə geniş danışdıq, dedik ki, məsələ aydındır. Dedik ki, bunu danışdığımız kimi həll edək, ya da qurtaraq da bu işi. Mən də bilim işimi. Bu nədi, belə də şey olar. Denən dolamısan camaatı, bəsdi də.
A.K: Oldu, birinci gün axşamçağı orda olanda sənə deyəcəm.
E.A: Heç mənə lazım deyil. Denən qardaş, bu kişini ya yola qoy, ya da çıxsın getsin.
A.K: Biz məsələni yoluna qoyacağıq.
E.A:Heç mən lazım deyiləm, denən qardaş, heç o, bura gəlməsin, mənəm bu işin ağsaqqalı. Qurtar da.
A.K: Oldu.
E.A: Denən heç o adam bura gəlməyib, heç görməmişəm də. Heç mən də bir də ordan bura gəlməyim.
A.K:Amma yaxşısı budur ki, sən özün bütün bu söhbətlərdə olasan. Mən bu işlərə qarışmıram, mənim özümə də pis gəlir də. Sənin özün olarsan və sən nə desən mən hazıram da, başqa söhbət yoxdur ki.
E.A: Arzu müəllim, qadan alım biz kifayət qədər danışmışıq da, şərtləşmişik də. Ay qardaş, denən yaxşı deyil axı, məni də camaat incidir axı. Denən ona ki, səninlə kifayət qədər danışmışıq da, nə birinci, ikinci gün deyə uzadırsan. Denən bu məsələ barədə nə qədər danışacağıq, burda nə var ki, hə hə, yox yox də.
A.K: Yaxşı. Axşam zəngimi gözlə.
E.A: Başa düşə bilmirəm e. Onun üstündə mən iki dəfə Antepə getmişəm, üç dəfə Fransaya getmişəm, bir dəfə Tokioya getmişəm. Camaatın ailəsi var, uşağı var, bu qədər incitmək olmaz axı.”
Mövzunu diqqətdə saxlayacağıq
Elçin Əmirov