Yerlərdə fermerlərdən alınan rüşvətin məbləği artırılıb

Azərbaycan Respublikasının kənd təsərrüfatı naziri Heydər Əsədov dekabr ayının 20-də Şəki Ərazi Kənd Təsərrüfatı İdarəsində Şəki, Oğuz, Qəbələ, Zaqatala, Qax və Balakən rayonlarının sakinləri ilə görüşüb.
Görüşdə Kənd Təsərrüfatı Nazirliyinin (KTN), bu qurumun idarə və təşkilatlarının, tabeliyində olan qurumların rəhbərləri də iştirak ediblər. Bölgə rayonlarından olan 60 vətəndaşın müraciətinə baxılıb. Nazir hər bir vətəndaşın müraciətini diqqətlə dinləyərək, müraciətlərin çox hissəsini yerindəcə həll edib. Müraciətlər əsasən kənd təsərrüfatı məhsulları istehsalçılarına güzəştli kreditlərin daha uzun müddətə verilməsi, kənd təssarüfatının inkişafını daha da sürətləndirmək üçün kooperativlərin yaradılması, Aqrar-kredit bankının yaradılması, subsidiyaların verilməsində movcud problemlərin aradan qaldırılması, texnikalara olan təlabatın ödənilməsi, arıçılığın inkişafına dövlət dəstəyi, heyvandarlığın inkişafı ilə bağlı hər doğulmuş cins buzova görə subsidiyanın verilməsi kimi məsələlərin həlli ilə bağlı olub.
Tədbirdə iştirak edən etibarlı mənbəmizin sözlərinə görə, görüş zamanı nazir bir sira məsələlərə toxunmaqla yanaşı, sələfi İsmət Abasovun dövründəki subsidiya yeyintilərinə də toxunub. Cenab nazir bu kimi halları tənqid edərək korrupsiyaya qarşi mübarizə aparacaqlarina işarə edib. Nazirin bu çıxışı isə rəhbərlik etdiyi qurumun içində belə birmənalı qarşılanmayıb.
Məlumatlı mənbəmizin dediklərinə görə, KTN-də yeyinti yerlərindən biri də kənd təsərrüfatına ayrılan subsidiyaların fermerlərə çatdırılması mexanizmindədir. Belə ki, yerlərdə bir çox hallarda ümumiyyətlə, buğda əkilməyən ərazilər əkilmiş kimi göstərilir və əkilməsi və biçilməsi üçün hər hektara ayrılan 80 manat vəsait mənimsənilir. Bundan əlavə, kənd təsərrüfatının inkişafı üçün fermerlərə verilən pulun 20 faizi bumeranq effekti ilə geri qayıdır. Nazirin çıxışı zamanı demək istədiyi əsas məqamlardan biri də bu olub ki, daha belə hallara yol verilməyəcək. Ancaq proseslər bunun tam əksini deyir.
Mənbəmizin iddiasina görə, KTN-də bugünədək korrupsiya mexanizminin yaradıcısı və »xaç atası» olaraq adı keçən əsas fiqur kimi nazirin iqtisadi məsələlər üzrə müavini İlham Quliyev göstərilir. O həm də subsidiyaların verilməsində nazirliklər üzrə işçi qrupunun rəhbəri vəzifəsini həyata keçirir. Eyni zamanda “korrupsiya qrupunun” üzvləri olaraq toxum və satış idarəsinin rəisi Mikayıl Zeynalov və nazirliyin maliyyə idarəsindən Telmanın (soyadını dəqiqləşdirə bilmədik) adları çəkilir. Bildirilənə görə, bu qrupa yerlərdə rayon icra hakimiyyəti başçılarının kənd təsərrüfatı sahəsinə cavabdeh olan müavinləri başçılıq edir.
Mənbə həmçinin onu da iddia edir ki, 20 ayrılan subsidiyanın 20 faizi icra hakimiyyətləri tərəfindən əvvəlcədən ödənilməsə, həmin rayonlara subsidiyaların ayrılmasında da problemlər yaradılır və bir çox hallarda ayrılacaq məbləğ tam minimuma endirilir. Yeni nazirin çıxışının fermerlər və icra strukturları arasında birmənalı qarşılanmamasının kökündə dayanan əsas məsələ də məhz budur ki, korrupsiyaya bulaşmış şəxslər nəinki vəzifədən çıxarılmayıb, hətta nazirlik daxilində onlara daha geniş imkanlar tanınıb.
Hətta bu gün rayonlarda nazirin çıxışından sonra fermerlər arasında rüşvətin 20 faizdən 25 faizə yüksəldiləcəyi haqda söhbətlər də dolaşır. Mənbənin iddiasına görə, artıq bu şayiələr nazirliyin dəhlizlərinə qədər gəlib çıxıb.

ZAUR

P.S. Məsələ ilə bağlı araşdırmalarımız davam edəcək. Eyni zamanda yazıda adıçəkilən vəzifəli şəxslərin məsələyə münasibətini dərc etməyə hazırıq.