“Meliorasiya və Su Təsərrüfatı” ASC və onun regional idarələri 2014-cü ilin büdcəsini xərcləmək üçün çox saylı tenderlər elan edib

Belarusun yol-tikinti texnikasının istehsalı ilə məşğul olan “Amkodor” Açıq Səhmdar Cəmiyyəti Azərbaycanın “Meliorasiya və Su Təsərrüfatı” Açıq Səhmdar Cəmiyyətinə 88 yükləyici ekskavatorun satılmasına dair müqavilə bağlayıb.

Virtualaz.org saytı bu barədə Belarus mənbələrinə istinadən xəbər verir.

Şirkətdən yayılan açıqlamada deyilir ki, “Amkodor” Azərbaycanda “Meliorasiya və Su Təsərrüfatı” ASC tərəfindən keçiriləntenderdə qalib gəlib və tenderin şərtlərinə görə bu ilin sonuna qədər ASC-yə 88 yükləyici ekskavatorun çatdırılmasını təmin etməlidir.

Müqavilənin şərtləri, ekskavatorların qiyməti və digər məlumatlar gösərilmir. Lakin “Amkodor” holdinqi bildirir ki, Azərbaycana satacağı ekskavatorlara qarantiya xidmətinin göstərilməsi və ehtiyat hissələri ilə təmin edilməsi, habelə bu texnikadan istifadə qaydalarının öyrədilməsi üçün “Amkodor-Bakı” birgə müəssisəsini yaradır.

Müəssisədə Belarus şirkətinin ortağı “Meliorasiya və Su Təsərrüfatı” ASC-dir.

“Meliorasiya və Su Təsərrüfatı” ASC Azərbaycanda hər il büdcədən ən yağlı tikələrdən birini qopardan strukturlardan biridir. Son illər ASC xaricdən intensiv şəkildə maşın və traktor texnikası alaraq öz texnika parkını yeniləyir. 2012-ci ildə Ukraynanın “DONEKS” şirkəti tərəfindən “Meliorasiya və Su Təsərrüfatı” ASC-yə 16 ədəd ekskavator və onlara aid əlavə qurğular satılıb.

Dövlət Satınalmaları Agentliyinin rəsmi saytında (tender.gov.az) göstərilir ki, “Meliorasiya və Su Təsərrüfatı” ASC 2014-cü ilin dövlət büdcəsindən bu struktura ayrılmış və saiti xərcləmək üçün çoxsaylı tenderlər elan edib. Belə tender elanlarından birində yazıldığına görə, “Meliorasiya və Su Təsərrüfatı” ASC-nin Texnoloji İstehsalat Komplektləşdirmə İdarəsi Nəqliyyat vasitələri, torpaqqazan maşın-mexanizm, nasos-güc avadanlıqlarının, ehtiyat hissələrinin, sarğı naqillərinin, güc kabellərinin və yumşaq inventarların alınması üçün müsabiqə elan edib.

Digər müsabiqə elanı isə Nəqliyyat vasitələri, torpaqqazan maşın-mexanizm, nasos-güc avadanlıqlarının, ehtiyat hissələrinin, sarğı naqillərinin, güc kabellərinin və yumşaq inventarların, yəni mebellərin alınması üçündür.

Ümumiyyətlə, tender.gov.az saytından məlum olur ki, dekabr ayında ən çox tender elanı verən dövlət strukturu “Meliorasiya və Su Təsərrüfatı” ASC-dir. Bu strukturun həm mərkəzi, həm regional idarələri tikinti materiallarından tutumuş texnika üçün ehtiyat hissələrinin alınmasına dair çoxsaylı müsabiqə elanları verib. Məsələn, ASC-nin regional müəssisələrindən Xaçmaz Suvarma Sistemləri İdarəsi mal-material və ehtiyat hissələri, Oğuz Suvarma Sistemləri İdarəsi tikinti materiallarının və ehtiyat hissələrinin satınalınması, Azərbaycan “Melioarasiya və Su Təsərrüfatı” ASC-nin Pirəzə Mexaniki Suvarma İdarəsi mal-material, ehtiyat hissələri və əsaslı təmir işlərinin aparılması, Şəki Suvarma Sistemləri İdarəsi 2014-cü ildə istismar tədbirləri üçün mal və materialların satınalınması və xidmətlərin yerinə yetirilməsi, Sabirabad Meliorasiya İdarəsi əsaslı və cari təmir işlərinin yerinə yetirilməsi üçün mal-materialların ehtiyat hissələrinin alınması və iş xidmətlərinin görülməsi üçün tender elanları veriblər.

Faktiki olaraq ASC-nin tərkibindəki bütün idarələr belə elanlar verib.

Doğrudanmı keçmiş birinci katib yoldaş Əhməd Əhmədzadənin rəhbərlik etdiyi ASC bu dərəcədə şəffaf işləyir və ən xırda işləri də müsabiqədənkənar görmür? Bu tenderlər əslində formal xarakter daşımır ki? Yaxud elan edilmiş tenderlərin qalibləri yoldaş Əhmədzadənin öz adamları olmayacaq ki?

Əhmədzadənin necə işlədiyi 2010-cu ilin Kür daşqınları zamanı bütün çılpaqlığı ilə üzə çıxmışdı və məlum olmuşdu ki, illərdir onun başçılıq etdiyi struktura ayrılmış milyardlarla manat büdcə vəsaitlərinə baxmayaraq sahilbərkitmə, meliorasiya işləri bərbad vəziyyətdədir. O vaxtdan etibarən Əhmədzadənin ASC-nə dövlət büdcəsinin investisiya xərclərindən hər il yüz milyonlarla manat ayrılır. Məsələn, 2013-cü ildə “Meliorasiya və Su Təsərrüfatı” ASC-yə ayrılmış investisiya xərcləri 300 milyon manata yaxın idi. 2014-cü il üçün dövlət büdcəsinin investisiya xərclərində bu struktura nə qədər pay düşəcəyinə dair məlumat yoxdur.