Gündəm Xəbər.az saytının redaksiyasına Ə.Kərimov tərəfindən məktub ünvanlanıb. Məktubda Ə.Kərimov dərmanların keyfiyyətsizliyindən, bu sahədə olan özbaşınalıqlardan danışıb. Məktubu sizə təqdim edirik:
“Hazırda Respublikada dərman biznesi geniş fəaliyyətdədir. Saxta, keyfiyyətsiz, satışı qadağan olunmuş dərmanlar satılır ki, nəticədə insanlar arasında dərmandan zəhərlənmələr, hətta ölüm halları haqqında mətbuatda məlumatlar verilir.Müalicə müəissələrində dövlətin dərman almaq üçün ayırdığı milyonlar, bir neçə məmur arasında bölünür, dərmanlar alınmır, formal hesab-fakturalar yazılır, silinir və dərmənlar nəğd satılır.Dərmanların alınmasında baş həkimlər sərbəst deyillər, nazirlikdən tapşırılan xüsusi depo və firmalarla işləməlidirlər”.
Məktubda Ə.Kərimov Nazirliyin “Tibb-təchizat”anbarında istənilən dərman (narkotik, psixotrop və sairə) nəğd satıldığını iddia edib, hazırda anbarda böyük mal çatışmazlığı yaranmasını qeyd edib.
“Nazirliyin balansında olan satışı qadağan olan çox qiymətli “ilan zəhəri” belə satılıb. Bazar qiyməti 10 qramı 500 manata, ümumi məbləği 9 milyon manat. Kiçik bir qrup özlərini sığortalamaq üçün müxtəlif saxta, mənasız “sənədlər” tərtib etmiş və itiriblər. Amma, nazirliyin 16/19-7169 saylı 06.07.2007-ci il tarixli məktubu və Əczaçılıq Birliyinin 131 saylı 20.07.2007 tarixli “əmri” araşdırılsa, qısa müddətdə böyük cinayət işi aşkar olar.Zəhər əslində bir neçə xarici işbazlara nəğd satılıb, Respublikada az miqdarda qalıb ki, bəzən məqsədli zəhərlənmələrdə (iflic, öldürücü kimi) işlədilib və işlədilir. Son vaxtlar bir sıra xəstəxana, doğum evi, stamatoloji kabinetlərdə ağrıkəsici, keyləşdirici kimi işlədilir ki, nəticə müxtəlif fəsadlar, hətta ölümlə bitir”.
Ə.Kərimov nazir Oktay Şirəliyevin əməliyyatdan xəbərsiz olmasını bildirib. Məlumatı çatdırmağa imkan verilməməsini, böyük maneələr olduğunu deyib. Həmçinin dövlətin dərmanların satış, alış, keyfiyyət və qiymətinə nəzarət etmədiyini qeyd edib.
Vəziyyətdən çıxış üçün isə aşağıdakı təklifləri irəli sürüb:
1) Keçmiş Baş Apteklər İdarəsi (BAİ) fəaliyyəti bərpa olunsun;
2) Xüsusi aptek və depolar ləğv olunsun;
3) Dərmanların bir pərakəndə satış qiyməti bərpa olunsun;
4) Narkomaniyaya qarşı mübarizə BAİ –ə həvalə olunsun;
5) Qeyri-peşəkarlar, Milli Məclisin bəzi deputatları, həkim və müəllim kimi işbazları dərman alverindən kənarlaşdırsınlar;
6) Dərman təminatı ilə böyük iş təcrübəsi olan əsl əczaçılar məşğul olsunlar.
Çoxsaylı əczaçılar adından göstərilənləri qəzetinizdə çap etmənizi xahiş edirik.
Hörmətlə: Ə.Kərimov