Məlum olduğu kimi, bu gün Azərbaycan paytaxtında rəsmən qəzetlərin əldə yayımını qadağan edən bir qərar açıqlandı. Belə ki, Bakı şəhərinin küçələrində küçə ticarətinə, qəzet və jurnalların səyyar satış nöqtələrinə Bakı Şəhər Ticarət və Xidmət Departamenti tərəfindən verilmiş icazələr 1 yanvar 2014-cü ildən ləğv edildiyi haqda xəbər yayıldı.

Bakı Şəhər Ticarət və Xidmət Departamentindən verilən məlumata görə, bu qərar Bakının abadlaşdırılmasını, gözəlləşdirilməsini, dünyanın ən gözəl şəhərlərindən birinə çevrilməsini və şəhərdə dünya standartlarına uyğun ən müasir qəzet və jurnalların satış köşklərinin quraşdırılmasını nəzərə alaraq qəbul edilib.

Bakı Şəhər Ticarət və Xidmət Departamenti bildirir ki, bundan sonra şəhər ərazisində küçə ticarətinə yol verilməyəcək, qəzet və jurnalların satışı isə yalnız və yalnız şəhərdə quraşdırılmış dünya standartlarına cavab verən köşklərdə həyata keçiriləcək.

Bu barədə açıqlama verən ölkənin ən çox satılan qəzetlərindən birinin - «Gündəm Xəbər» qəzetinin təsisçisi Şirin Cəfəri bildirdi ki, bu qərar birbaşa olaraq qəzetlərin çökdürülməsinə hesablanıb:

«Hesab edirəm ki, media ilə bağlı məsələlərə Bakı şəhər icra hakimiyyətinin Ticarət Departamentinin müstəvisində, ranqında yanaşılması gülüncdür. Yəni bu qurum hələ mətbuatın, azad sözün bir ölkə üçün, demokratiya üçün hansı əhəmiyyət daşıdığının fərqində deyil və ola da bilməz. Bunların işi-gücü göyərti satanlarla mübarizə olub, limon satanlara haqq qoymaq olub. Və indi də gəlib, mətbuatla eyni dildə danışmağa cəhd edirlər. Halbuki bunun onların qabına uyğun olmadıqları ortadadır. Bu bir siyasi hadisədir. BŞİH isə burada ya etiraf etməlidir ki, sıradan alətdir, ya da naşılığını etiraf edib, geri çəkilməlidir».

Bakı şəhər icra hakimiyyətinin qarşısında aksiya keçiriləcək

Daha sonra Şirin Cəfəri bildirdi ki, hazırda bu hadisəni gülünc adlandırır: «Amma nəticələri bizim cameə üçün odduqca acınacaqlı günləri vəd edir. Yəni ağlamalı duruma düşməyimiz an məsələsidir. Əgər qəzetlərin satışı əngəllənirsə, deməli, minlərlə qəzet işçisi - burada təkcə qəzet satan yox, həm də qəzetin ərsəyə gəlməsində iştirak edən redaksiya heyətləri də öz ailələrini dolandıra bilmələrini problem kimi qarşılayacaqlar. Bu baxımdan BŞİH bu gün minlərlə ailənin süfrəsini təhlükə altına atan bir qərarını açıqlayıb».

«Gündəm Xəbər»in təsisçisi onu da əlavə etdi ki, əgər bu məsələdə BŞİH qərarından daşınmasa, onlar etiraz aksiyasına əl atacaqlar: «Hörmətli Hacıbala Abutalıbov küçə ticarəti ilə əldə qəzet yayımını eyniləşdirməli deyil. Bunlar ayrı-ayrı məsələlərdir. Əgər Hacıbala Abutalıbov üçün limon satanla qəzet satanın fərqi yoxdursa, biz hörmətli icra başçısına bu fərqi izah edəcəyik».
DİA.AZ