Tanınmış müğənni Yaqub Zürufçu: “Rüşvət nə qədər olacaq görəsən? Xaricdə gülürlər axı bizə...”
Tanınmış və sevilən müğənni, o taylı-bu taylı Azərbaycanın birlik şərqisinə çevrilmiş məşhur “Ayrılıq” mahnısının bənzərsiz ifaçısı Yaqub Zürufçu bu günlərdə Bakıda idi. ABŞ-da yaşayan Yaqub bəy vətənin bu tayına Dünya Gənc Türk Yazarlar Birliyinin 15 illiyinə həsr olunmuş yubiley tədbirində iştirak etmək üçün gəlmişdi.


Ünlü sənətçimiz tədbirə qonaq qismində qatılmışdı. Tədbirin keçirildiyi Rəşid Behbudov adına Mahnı Teatrında məqam düşən kimi ona yaxınlaşdıq.

- Salam, Yaqub bəy. Vətənə xoş gəldiniz. Necəsiniz?

- Çox şükür, yaxşıyam. Səhhətim də, səsim də öz yerindədir. Sizi soruşmalı, siz necəsiniz?



- Təşəkkürlər. Mən də yaxşıyam. Sizi tanıyanları, pərəstişkarlarınızı narahat eləyən bir sual verim: Yaqub bəy niyə efirlərdə görünmür?

- Sən elə sual verdin ki, cavabı birbaşa qalmaqala səbəb olar. Səsimi yazırsan?

- Bəli, yazılır.

- Xahiş edirəm onu söndür. Bu sualın cavabını yazmağını istəmirəm. Mən də çox istəyərəm ki, efirdə olam. Məni də göstərsinlər. Amma göstərmək istəmirlər. Bunların başı qarışıb pul qazanmağa. Məni neynirlər?! Məsələn, sən qəzetdə işləyirsən, məndən müsahibə alırsan və mən də fikrimi xalqa çatdırıram. Bunların fikri isə bu deyil. Bu da sənin sualının cavabı. Amma yenə də xahiş edirəm, bir cümlə də yazılmasın.

- Yazılmasını niyə istəmirsiniz?

- Arif bəylə razılaşdırılıb. Milli kanalın rəhbəri ilə.

- AzTV-nin sədri Arif Alişanovla?

- Bəli. Yazsan, buna görə sən də məsuliyyət daşıyırsan. Mən lotu oğlanam. Allahdan başqa heç kimdən qorxmuram. Niyə də qorxmalıyam? Bəziləri kimi rüşvət yeməmişəm ki... İndi fəxri ad almaq üçün, efirlərə çıxmaq üçün pul istəyirlər. Mən özümə hörmət qoyan adamam. Mən bu adamlarla üz-üzə gəlmək istəmirəm. Gərək cənab prezident İlham Əliyevə məktub yazam. AzTV-yə onda çıxaram.

- Dediniz ki, Arif Alişanovla razılaşdırılıb. Nəyi razılaşıbsınız?

- Bu sualı mənə niyə verirsiniz? Mən belə sualları sevmirəm.



- Bayaq deputat Nizami Cəfərovla söhbət edirdiniz. Söhbətdə də Arif bəyin adı çəkilirdi, nə isə xahiş edirdiniz...

- Yazmırsan ki?

- Yazıram...

- Yazma... Efirə çıxmaq mövzusu idi. Nizami bəylə danışırdım ki, yardımçı olsun.

- Yaqub bəy, toylara gedirsinizmi? Gedəndə neçəyə gedirsiniz?

- İki hal var: ya yaxşı pul alasan, ya da toya getməyəsən. Bax, bunu yaza bilərsiniz. Sözün düzü, mən toylara az gedirəm. Ona görə ki, Bakıda az-az oluram.

- Az getdiyiniz toyların qiyməti nə qədərdir?

- Mən uşaq deyiləm ki, qiymət deyim. Mən özümə hörmət qoyan adamam. Hər kəs hörmət qazana bilər, amma onu qoruyub saxlaya bilməz. Mən toy yiyələrinə heç vaxt pul oxumuram. Deyək ki, mən toya 100 min manata getmək istəyirəm. Verən olacaq?

- Yaqub Zürufçu Bakıda niyə konsert vermir? Bunun səbəbi təşkilatçılar ola bilərmi?

- Mən Bakıda az oluram. Yəni Amerikada yaşayıram. Azərbaycanda şou-biznes hələ işə düşməyib. Bizim müğənnilərimiz toylara tez-tez gedirlər. Xalq onları toylarda görür, tanıyır. Artıq konsert təşkil etmək yada da düşmür. Bizim təşkilatçılar yabancı müğənnilərin konsertin təşkil edirlər və insanlarımız da o konsertə gəlirlər. Bir konserti təşkil edə bilərəm, amma mənə layiq konserti təşkil etmək üçün ən azı 5 ayım gedəcək. Amma düzgün, təmiz təşkilatçı çıxsa və konsertimi təşkil etsə, niyə də konsert proqramı ilə çıxış etməyim?!



- Buradakı gənc müğənnilərə münasibətiniz necədir? Onları bəyənirsinizmi?

- Mən telekanallara çox az-az baxıram. Bu elə sualdır ki, cavab verməyə çətinlik çəkirəm. Mən bu suala cavab verməsəm yaxşıdır.

- Gündəmə gəlmək üçün sənət lazımdır, yoxsa qalmaqal?

- İndiki dövrdə sənət, səs lazım deyil.

- Bayaq dediniz ki, efirə çıxmaq məsələsi Arif bəylə razılaşdırılıb. Dövlət telekanallarında efirdə olmaq müğənni üçün nə qədər prestijdir? Sizcə, AzTV-də görünmək üçün mütləq Arif Alışanovla razılığa gəlmək gərəkdirmi?

- Xahiş edirəm belə qalmaqallı suallar vermə. Diktofonu söndür zəhmət olmasa. Biz Arif bəylə razılaşmamışıq hələ, efirə çıxım, sadəcə qərarlaşdırmışıq ki, görüşək Arif bəylə.

- Hansı verilişlərin qonağı olmaq istərdiniz?

- Mənə layiq verilişlər çox azdır.



- Belə çıxır ki, AzTV-də sizi qane edən verilişlər yoxdur. Və vaxtilə dəfələrlə verilişlərində olduğunuz TV-nin verilişləri tənəzzülə uğrayıb. Sözsüz, musiqili verilişləri nəzərdə tutursunuz yəqin...

- Azərbaycan televiziyası xanəndəni, musiqiçini dəvət etməli və orkestrlə proqram hazırlamalıdır. Hamısı da var. Mən ağsaqqal yaşımda özbaşına qapı döyə bilmərəm. Mənə yaraşmaz dünənin hansısa qoduğuna deyim ki, məni verilişə, efirə niyə çıxarmamısan. Onlar dünənki cücələrdir. Arif bəylə də görüşüb bunu anlaşaram. Uşaq-muşaqla danışmaq mənlik deyil. Mən elə bir dəfə cənab prezident İlham Əliyevə məktub yazsam, məsələmi həll edər.

- Siz belə düşünürsünüz ki, indi Azərbaycan televiziyasında musiqidən anlayışı olmayanlar musiqili verilişlərə rəhbərlik edirlər?

- Onları məndən soruşma. Bunu tamaşaçı görüb deməlidir. Mən desəm, deyəcəklər ki, sən özün nəsən. Mən istəmirəm elə insanlarla üz-üzə gəlim. Mən lotu oğlanam. Hirslənəndə kimsə gözümə görsənmir, bilirəm ki, vuracam onun qulağının dibinə. Özümü bilmirəm də...

- “O” deyəndə kimi və kimləri nəzərdə tutursunuz? Onları tanıda bilərsinizmi?

- Yox! Onları siz özünüz tanımalısınız, elə tanıyırsınız da. Nə qədər olacaq rüşvət görəsən? Rüşvət dövrü getdi e... Axı nə qədər olar telekanallarda rüşvət, pul-para ilə verilişlərə çıxmaq? Xaricdə gülürlər axı bizə.

- Rüşvəti hansı telekanalların rəhbərləri istəyir?

- Bəlkə də bəzi telekanallarımızın rəhbərliklərinin istənilən rüşvətdən xəbəri yoxdur. Amma bəziləri əlbirdir. Milli kanalın (AzTV-ni nəzərdə tutur-red.) rəhbərliyinin yanında işləyənlərdən biri məni ora solist kimi bərpa etmək üçün 20 min istədi.

- Həmin şəxsin adın deyə bilərsinizmi?

- Yox. Düşünməyün ki, qorxuram. Əvvəl də demişdim, indi də deyirəm - mən lotu oğlanam.

- Bəs niyə demirsiniz?

- Belə lazımdır.

- Amerikada bizim musiqini tanıyırlarmı?

- Əlbəttə, tanıyırlar... Çox yaxşı tanıyırlar.