Avqustun 17-də səhnəmizin primadonnasının ad günüdür


Avqustun 17-də Azərbaycanın və Dağıstanın xalq artisti, Şöhrət ordenli İlhamə Quliyevanın səhnə fəaliyyətinin 50 illik yubileyi və doğum günüdür. Publika.Az bu münasibətlə Xalq artistindən müsahibə alıb:

- Necəsiniz, maşallah, hər yerdə səhnə fəaliyyətinizin 50 illiyi bayram kimi qeyd edilir…
- Necə olacağam, əla. Mənim dünyaya gəlişim və səhnə fəaliyyətimin 50 illiyi bir bayram kimi qeyd edilir, düşmənlərim də baxıb çatlayır, ürəkləri partladıram. ATV Müstəqil Teleradio Kompaniyasının efirində “Şən bazar” verilişində start götürən silsilə yubiley tədbirləri digər telekanallarda da davam etdiriləcək. Avqustun 17-də “Space” kanalının “Hər səhər” verilişinin 4 saatlıq canlı efir vaxtı bütünlüklə mənim həyat və yaradıcılığına həsr olunacaq. Həmin verilişdə millət vəkilləri, görkəmli sənətkarlar, mədəniyyət xadimləri, ziyalılar iştirak edib məni təbrik edəcəklər.

- Təbrik edirik, təzə titulunuz da mübarək.
- Sağ ol. Azərbaycan Kütləvi İnformasiya Vasitələri İşçiləri Həmkarlar İttifaqı Rəyasət Heyətinin qərarı ilə mədəniyyət və incəsənət sahəsində göstərdiyim xidmətə görə “Ustad Sənətkar” ali media mükafatına layiq görüldüm. Həmin ödül mənə “Space” kanalının “Hər səhər” verilişinin canlı efirində təqdim olunacaq. Deyim ki, “Lider” telekanalında da ad günü və səhnə fəaliyyətimin yarıməsrlik yubileyi münasibəti ilə xüsusi veriliş hazırlanır. Qısaca, hər şey gözəldir.

- Elə özünüz də gözəlsiniz, amma bu gözəlliyin reseptini bilə bilmirik e...
- Bir sirr var ki, o da mənim içimin büllur kimi saf, təmiz olmasındadır. İçin gözəl oldusa, sənə zaval yoxdur. O gün televiziyada yubiley törəni zamanı mənə dedilər ki, səhnə fəaliyyətinin 50 illik yubileyidir, yaşın isə çox cavandır. Sağ olun ki, məni belə gözəl görürsünüz.

- Gözəl nənəsiniz həm də. Nəvədən nə xəbər?
- Qığıldayır özü üçün. Çox diribaş, enerjili, aktiv uşaqdır. Mənə oxşayıb. İkimiz də enerjiliyik.

- Gəlininizdən necə razısınızmı?
- Çox yaxşı, evi ayrı, qəmi ayrı. Mən onun üçün hər cür şərait yaratmışam, yaşasınlar özləri üçün. Mən cavan nənəyəm və xoşbəxtlərin xoşbəxtiyəm. Sevinənlər sevinsin, sevinməyənlərin də gözü çıxsın.

- Hədiyyə sevənsiniz bilirəm…
- Çox olacaq hədiyyələr.

- Özəl hədiyyə də olacaq yəqin?
- Sözsüz, amma qabaqcadan danışmayaq bu barədə. Sürpriz sevənəm, sürprizlər olacaq. Amma mənim üçün indiyə qədər ən böyük hədiyyə ulu öndər Heydər Əliyevin verdiyi “Şöhrət” ordenidir. Mən özümü buna görə çox şanslı sayıram.

- Doğum gününüzdə birdən jest edib, küsülü həmkarınız Nazpəri Dostəliyeva sizə barışıq təklif etsə, barışarsınız?
- Burda söhbəti bağla, qanımızı qaraltmayaq. Mən bayramdan danışıram, sən də qan qaraldırsan. Başqa söhbət elə. Olmadı ki, bu…

- Mən bilirəm ki, sizə qarşı atılan addımları qiymətləndirən xanımsınız, ona görə soruşdum, amma qanınızı qaraltdımsa, üzr istəyə bilərəm…
- Bu söhbətə qayıtmayaq, amma o məsələyə gəlincə, onu zaman göstərər.