Asəf Mütəllimov haqda nələr bilirik?

Əlimə bir şəkil keçdi, döyüşçülər bir PDM-in yanında. Müharibə dövründə belə şəkillər çox çəkdirirdilər. Amma diqqətimi çəkən şəkilin qanlı ləkələr içində olması idi. Mən bu şəkilin tarixçəsini öyrəndim və bu qəhrəman şəhid qardaşımızın keçdiyi döyüş yolundan axırıncı epizodu sizə çatdırmaq istəyirəm.
Mərzili qəhrəmanı Asəf Mütəllimov onun dostlarının xatirəsində
Asəf 1992 – ci ilin mayından bizim batalyonda rota komandirinin müavini kimi hərbi işini davam etdirirdi. Sonra Ağdama yola düşdük, Birinci dəfə Naxçıvanik istiqamətində hücumda olduq. Asəf tankçı idi, tank ekipajının komandiri kimi hücuma keçmişdi. Bu döyüşdə o, düşmənin bir tankını və bir topunu sıradan çıxardı. 40 dəqiqəlik döyüşdə altı kənd azad olundu. Bu qələbədən sonra Asəfgili Ağdərə istiqamətində döyüşə göndərdilər. Onlar Ağdərə yanacaqdoldurma stansiyasını partlatmış, bir BMP vurmuşdular. Sonra Asəf mütəxəssis kimi Lənkərana göndərilir, orada tankların ruslardan təhvil götürülməsində iştirak edir və Ağdama aparır. Qarakənd , Mərzili və Novruzlu kəndləri uğrunda döyüşlərdə şücaət göstərir. Sırxavənd uğrunda döyüşlərdə Asəfgil düşmənin bir tankını, bi “ZİL” markalı maşınını və çoxlu döyüş sursatını ələ keçirirlər. Asəf qəhrəmanlığı, cəsarəti ilə həmişə hamıya nümunə Asəf döyüş texnikasını xüsusi ustalıqla təmir edirdi, öz maşını isə həmişə döyüşə hazır vəziyyətdə olurdu. İyunun 12- də ermənilərin Şelliyə hücumu zamanı öz maşını ilə düşmənin geri oturdulmasında xüsusi məharət göstərdi. Həmin günün ikinci yarısında xəbər gəldi ki, ağır texnika ilə Ağdamın cənub – şərqində yerləşən Mərzili kəndini alıb, artıq Yusifcanlı kəndinə soxulmaqdadır. Düşmənin qarşısını almaq üçün xüsusi tapşırıq alan Asəf və dostları PDM ilə Yusifcanlıya doğru hərəkət etdilər. Düşmən nəinki Yusifcanlıya girə bilmədi, Mərzilidən çıxıb geri çəkildi. Bu döyüşdə Asəfin PDM-i iki ağır zərbə alaraq döyüşə yararsız vəziyyətə düşdü. Maşını silahdaşlarından birinə verib, hissəyə aparmasını tapşırdı, özü isə ekipaj yoldaşı olan Şaiq Kəlbiyev ilə birlikdə heç bir göstəriş almadan düşmən əlində olan əraziyə kəşfiyyata getdi. Onlar tam yeni quruluşlu bir döyüş maşını gördülər. Maşın sahiblərini – üç ermənini öldürüb, cəld maşına əyləşib öz hissələrinə doğru sürət götürdülər. Bundan xəbər tutan düşmənlər onları aramsız top atəşinə tutmağa başladılar. Məqsəd maşını xilas da olmasa, məhv etmək idi. Asəf isə döyüş maşınını sağ-salamat hissəyə gətirib, sevincək maşından çıxdı. Amma bu sevinc çox çəkmədi. Elə bu zaman bilavasitə döyüş maşınna tuşlanmış top mərmisi maşının yanında partladı. Ağır yaralanmış Asəfi Ağdam qospitalına gətirdilər. Bütün rəhbər zabitlər qospitala gəldilər, baş həkimlə görüşdülər. Asəfi həyata qaytarmağı xahiş etdilər. İki gün ağır yaraların ağrısına dözən Asəf iyunun 14-də axşamüstü dünyasını dəyişdi. Allah onu rəhmət eləsin! Onun cibindən iki qana batmış şəkil çıxdı.
İki qana batmış şəkil
Asəf Mərzili döyüşlərində düşmənin döyüşçülərlə dolu “Kamaz” maşınını, içində əskər və zabitlər olan (sonradan bilindi ki) bu Monte Melkonyan imiş. UAZ maşınını, 1 düşmən PDM- ni məhv edir. Bir düşmən PDM-ni döyüşə yararlı vəziyyətdə ələ keçirdir. Bütn bunlara görə Asəf Mütəllimov Milli Qəhrəman adına təqdim edilir. Lakin o, bu adı ala bilmir. Düzdür, illər sonra atasının və cəbhə dostlarının yazdıqları məktublardan sonra, 96- cı ildə onun ailəsinə “Azərbaycan Bayrağı” ordeni təqdim edirlər. Amma...
Qısa, lakin şərəfli bir ömrün sonluğu. Bəlkə də sonluq yox, başlanğıcdır bu, əbədi bir ömrün başlanğıcı. Çünki, Asəf Rəhman oğlu Mütəllimovun döyüş yolu romanlara, poemalara, kinofilmlərə layiqdir. Adına meydanlar, küçələr yaraşır. Bütün bunlar isə gələcəyin işidir.
Mütləq qədirbilən xalqımız öz qəhrəman oğlunun qiymətini verəcək, onun parlaq xatirəsini əbədiləşdirəcəkdir.
P.S: Mən Asəfin döyüşə gedərkən evdə 1 yaşında qoyub getdiyi yeganə qızı Həcər və Asifdən sonra həyatını 1 qızına həsr etmiş həyat yoldaşı Naidə xanımla görüşdüm. Bu ayrı bir məqalənin temasıdır. Lakin bircə onu deyə biərəm ki, 20 yaşına çatmış qəhrəmanın qızına Şirvan şəhəri boyda bir şəhərdə iş tapılmır. İcra hakimiyyətinə edilən müraciətlərdə isə iş yerlərinin olmaması bəhanə edilir. Bu da şəhid qəhrəmanımızın bizə əmanət etdiyi bir balasına Şirvan icra hakimiyyətinin “böyük qayğısı”. Allah bütün şəhidlərimizə rəhmət eləsin!
KƏRİM