Generalın mülkü kimlərə çatacaq?

Rusiyanın Yekaterinburq şəhərində “Azərbaycan evi”nin tikintisinə görə etnik münaqişə təhlükəsi yaranıb.
Bu barədə yerli agentliklərdən birinə Yekaterinburqun hüquq-mühafizə orqanlarındakı mənbə məlumat verib. Xəbərdə bildirilir ki, Yekaterinburqun Sulimov-Omsk küçəsində “Azərbaycan evi”nin tikintisi başlayıb. Tikinti üçün ayrılan torpaq sahəsi Osnovinsk parkının ərazisidir və 106 nömrəli orta məktəbin yaxınlığında yerləşir. Yerli sakinlər məktəbin yaxınlığında çoxmərtəbəli binanın inşasını eşidən kimi bu layihəyə qarşı kampaniyaya başlayıblar və etiraz aksiyası keçirməyə hazırlaşırlar.
“Bizim uşaqlarımız iki il ərzində səs-küylü tikintinin qonşuluğunda təhsil almalı olacaqlar. Artıq tikintiyə görə məktəbin oyun meydançasının bir hissəsi bağlanıb. Qorxuruq ki, bundan da betəri baş verəcək” - deyə yerli sakinlər bildirib.
Məlumata görə, tikintinin arxasında “Azərbaycan-UAK-Ural” fondunun rəhbəri Şahin Şıxlinski dayanır. “Azərbaycan evi”nin gələcək qonşuları artıq Şıxlinskinin adamlarına öz narazılıqlarını bildiriblər, ancaq iş adamı məsələyə rəsmi izahat verməyib.Üstəlik yaxınlıqdakı evlərin giriş qapılarını idmançı cüssəli adamlar kəsdirib. Şahidlərdən birinin bildirdiyinə görə, azərbaycanlılar yerli sakinlərə hədələyici tonda bildiriblər ki, tikintiyə qarşı çıxmaqla onları kədərli perspektiv gözləyir. Bildirilir ki, “Azərbaycan evi” ikimərtəbıli yeraltı parkinqə malik çoxmərtəbəli bina olacaq, binada milli fitnes-mərkəz də fəaliyyət göstərəcək və iki il sonra istifadəyə veriləcək. İstisna edilmir ki, “Azərbaycan evi”ndə həmçinin Azərbaycanın Yekaterinburqdakı Baş Konsulluğu və Azərbaycan Beynəlxalq Bankının Rusiya filialının yerli şöbəsi də yerləşəcək.
Yerli mətbuat yazır ki, 18 mərtəbəli binanın inşa ediləcəyi torpaq sahəsi Almaz Şıxlinskayanın adınadır. Yerli sakinlər şəhər meriyasına, prokurorluğa və digər orqanlara şikayət edərək tikintinin dayandırılmasını tələb edirlər. Yekaterinburq meriyasından sakinlərə göndərilən cavabda deyilir ki, onlar parkın ərazisində heç bir tikinti aparılmasına icazə verməyiblər.
Bəs Yekaterinburq sakinlərinin narazılığına səbəb olan tikintinin sahibi Şahin Şıxlinski kimdir?
Söhbət məşhur Şıxlinskilər nəslinin nümayəndəsindən gedir. Belə ki, shixlinski.az saytında göstərilir ki, Şahin Şıxlinski 1966-cı ildə Qazax rayonunun İkinci Şıxlı kəndində anadan olub. Hərbi xidməti başa vurduqdan sonra Rusiyada qalıb və işləyib. 1995-ci ildə Yekaterinburq şəhərində yerləşən Ural Dövlət Hüquq Akademiyasını bitirib. Sonradan bu təhsil ocağının aspiranturasına daxil olub və oranı bitirib. 1996-cı ildən 1999-cu ilədək “Prestij-Servis” kommersiya-istehsalat firmasının prezidenti olub.
Şahin Şıxlinski hazırda Ural Vəkillər Kollegiyası Rəyasət Heyətinin sədr müavinidir. 2004-cü ildə Ümumrusiya Azərbaycanlıları Konqresi (ÜAK) Ural Dairə Şurasının sədri seçilib. Bu dairənin tərkibinə Rusiya Federasiyasının Sverdlovsk, Tümen, Çelyabinsk, Kurqan vilayətləri və Xant-Mansiysk, Yamal-Nenets muxtar dairələri daxildir. 2004-cü ilin oktyabr ayından ÜAK-ın vitse-prezidentidir.
Ş.Şıxlinskinin bioqrafiyasında həmçinin deyilir: “Dəfələrlə Sverdlovsk vilayətinin qubernatorunun Bakıya səfərlərinin hazırlamasında və təşkilində iştirak edib, mərhum prezident Heydər Əliyevin qəbulunda olub. Azərbaycan Respublikasının prezidentləri Heydər Əliyev və İlham Əliyevin andiçmə mərasimlərində iştirak edib”.
Ceyhun