Dövlət pullarının “sel kimi axıdıldığı” təşkilatlardan biri “Melorasiya və Su təsərrüfatı” Açıq Səhmdar Cəmiyyəti və onun yerlərdəki idarə, müəssisələridir. Əhməd Əhmədzadənin rəhbərlik etdiyi su şəffaflığından uzaq olan bu ASC zaman-zaman dəhşətli korrupsiya faktları ilə diqqətə düşüb. ASC-nin strukturuna daxil olan bütün təşkilatlarda total korrupsiya adi hal alıb. Ölkənin suvarma sistemlərinin işinin təşkilinə məsul olan təşkilat öz fəaliyyəti ilə daha çox bu sahənin inkişafına əngəl törədən bir quruma çevrilib. Əhməd Əhmədzadənin yerlərdəki kadrları “sudan pul çıxarmağın” metodlarını çox gözəl bilirlər.
Düşünmək olardı ki, ölkənin bütün bölgələrində korrupsiya tüğyan etsə də düşmənlə üz-üzə duran cəbhə bölgələrində vəziyyət bir qədər fərqli olar. Lakin, təəssüf ki, ASC-nin Ağdam Suvarma Sistemləri İdarəsinin fəaliyyətinə nəzər yetirdikdə bunun tam əksini müşahidə etmək olar. Aldığımız məlumatlara əsasən, burada tamamilə özbaşınalıq hökm sürür. İdarənin müdiri Hafiz Əzimzadənin yarıtmaz fəaliyyəti nəticəsində Ağdam Suvarma Sistemləri İdarəsində korrupsiya, talançılıq gündəlik iş prinsipinə çevrilib. Əsas vəzifəsi Ağdamın mülkiyyət növündən asılı olmayaraq bütün torpaqlarının suvarılması, kanalların, arxların, dren-kollektor və yığıcı kollektorların lil və bitki örtüyündən təmizlənməsi, hidrotexniki qurğuların işlək vəziyyətdə saxlanması, Qarqarçaydan və Xaçınçaydan gələn sel sularının, daşqınların qarşısının alınması olan bu idarədə qeyd etdiyimiz işlərdən başqa hər işlə məşğul olurlar. Yetər ki, bolluca maliyyə vasitəsi olsun. İdarədə onu necə “sərf etməyin” xüsusi metodları var. İdarənin balansında 365 kilometr suvarma kanalı, 27 kilometr dren-kollektor şəbəkəsi, 129 hidrotexniki qurğu, 4 suyığıcı göl, 11 kəhriz, 2 qaynama olmasına baxmayaraq Ağdam əhalisi problemlər içərisində qalıb. Hafiz Əzimzadə idarəni xüsusi mülkiyyətinə çevirərək istədiyi kimi idarə edir.Yuxarıda sadaladığımız qurğuların işinin keyfiyyətli təşkili üçün hər il dövlət büdcəsindən külli miqdarda vəsait ayrılsa da işlər ancaq “kağız” üzərində görülür. Hər ay yüz minlərlə manat dövlət vəsaiti saxta sənədlər tərtib etməklə mənimsənilir. Odur ki, bu gün Ağdamın suvarma sistemləri çox bərbad durumdadır. Bəzi ərazilərdə suvarma sistemləri istifadəyə yararsız vəziyyətdədir. Lakin, Hafiz Əzimzadənin sənədlərində bu sistemlər dəfələrlə yüksək səviyyədə təmir olunub. Əldə etdiyimiz məlumatlara əsasən, idarə müdiri rayon rəhbərliyi, həmçinin “Meliorasiya və Su Təsərrüfatı” ASC-nin məsul şəxsləri ilə əlbir olaraq saxta sənədlər tərtib etməklə, “kağız üstü” işlər görməklə külli miqdarda vəsaiti ələ keçirir. Daxil olan məlumatlara əsasən rayonun Quzanlı, Qaravəli, Qasımbəyli kəndlərinin drenləri illərdir ki, təmir olunmadığı üçün yararsız duruma düşüb. Ancaq, Hafiz Əzimzadənin sənədlərində bu məqsədlə yüz minlərlə manat dövlət vəsaiti sərf olunub. Rayondan bildirilir ki, yalnız o sistemlər təmir olunur ki, onlardan idarə müdirinin iiqat qazanmaq inkanları olsun. Belə ki, imkanlı şəxslərin, məmurların şəxsi təsərrüfatlarında görülən işlər üçün əldə olunan vəsaitlər birbaşa idarə müdiri Hafiz Əzimzadə tərəfindən mənimsənilir. Beləcə həm dövlət vəsaitləri, həm də şəxsi hesablardan əldə olunan pullar mənimsənilir.
Hafiz Əzimzadə idarənin fəaliyyətini “ölü” duruma saldığı kimi, ştat cədvəlində də xeyli sayda “ölü canlar” saxladığı haqqında məlumatlar var. Əldə etdiyimiz bilgiyə görə, Suvarma Sistemləri İdarəsində 170 nəfər işçi çalışmalıdır. Lakin, bu işçilərin yalnız cüzi bir hissəsi işləyir. Təqribən 130-dan çox işçinin adına əmək haqqı yazılsa da onları görüb, tanıyan yoxdur. Adları idarədə gedən bu işçilərin əmək haqqlarını isə Hafiz Əzimzadə hər ay özü alır. Doğrudan da, idarə müdirinin fəaliyyəti “təqdirə layiqdir”. Bir nəfərin 130-dan çox adamın yerinə “çalışması” faktına dünya praktikasında yəqin ki, hələ rast gəlinməyib. Hafiz Əzimzadənin sevimli metodlarından biri də dövlət vəsaitlərinin “nağdlaşdırma” üsulu ilə ələ keçirilməsidir. Belə ki, idarə müxtəlif işlərin görülməsi üçün digər müəssisələrlə müqavilələr bağlayır. Heç bir iş görməyən belə müəssisələrin hesablarına köçürülmüş pullar müvafiq vergilər tutulandan sonra nağdlaşdırılır və idarənin özünə qaytarılır. Bu yolla külli miqdarda dövlət vəsaiti mənimsənilir.
Ağdam Suvarma Sistemləri İdarəsinin fəaliyyəti barəsində dəfələrlə “Meliorasiya və Su Təsərrüfatı” ASC-nin rəhbərliyinə, digər qurumlara şikayətlər olunsa da, vəziyyət dəyişməyib. Dövlət pullarını Ağdamda beləcə mənimsəyib üstündən də su içirlər. Amma, bu idarə torpaqların suvarılmasını təmin etmək üçün yaradılıb, konkret şəxslərin maraqlarını təmin etmək üçün yox!
Nicat MAHMUDOV