Ağdamda korrupsiya gündəlik iş prinsipinə çevrilib

Ağdam Suvarma Sistemləri İdarəsinin korrupsiya və maxinasiya yuvasına çevrilməsi barəsində qəzetimizdə və ölkə mətbuatında kifayət qədər məlumatlar verilib. İdarənin müdiri Hafiz Əzimzadənin yarıtmaz fəaliyyəti nəticəsində talançılıq, korrupsiya idarədə gündəlik iş prinsipinə çevrilib. Hər ay yüz minlərlə manat dövlət vəsaiti saxta sənədlər tərtib etməklə mənimsənilir. Odur ki, bu gün Ağdamın suvarma sistemləri çox bərbad durumdadır. Bəzi ərazilərdə suvarma sistemləri istifadəyə yararsız vəziyyətdədir. Lakin, Hafiz Əzimzadənin sənədlərində bu sistemlər dəfələrlə yüksək səviyyədə təmir olunub. Əldə etdiyimiz məlumatlara əsasən, idarə müdiri rayon rəhbərliyi, həmçinin “Meliorasiya və Su Təsərrüfatı” ASC-nin məsul şəxsləri ilə əlbir olaraq saxta sənədlər tərtib etməklə, “kağız üstü” işlər görməklə külli miqdarda vəsaiti ələ keçirir.
Rayondan bildirilir ki, yalnız o sistemlər təmir olunur ki, onlardan idarə müdirinin ikiqat qazanmaq inkanları olsun. Belə ki, imkanlı şəxslərin, məmurların şəxsi təsərrüfatlarında görülən işlər üçün əldə olunan vəsaitlər birbaşa idarə müdiri Hafiz Əzimzadə tərəfindən mənimsənilir. Beləcə həm dövlət vəsaitləri, həm də şəxsi hesablardan əldə olunan pullar mənimsənilir.
Beləcə, Ağdam Suvarma Sistemləri İdarəsini şəxsi müəssisəsinə çevirərək milyonlar sahibi olan Hafiz Əzimzadə daha tutduğu postla kifayətlənmək istəmir. Aldığımız məlumatlara əsasən, onun hədəfi “Meliorasiya və Su Təsərrüfatı” ASC-nin rəhbərliyini ələ keçirməkdir. Bunun üçün xeyli müddətdir ki, çaba sərf edən H.Əzimzadə ASC-nin rəhbəri Əhməd Əhmədzadənin əleyhinə kompromatlar yaymaqla məşğuldur. Ali Sovetdə müstəqillik aktının əleyhinə səs verən Əhməd Əhmədzadənin bu “vətənpərvərliyini” hər zaman əsas tutan Hafiz Əzimzadə ona vəzifə, çörək verən şəxs haqqında bütün mümkün dosyeləri mediada tirajlamaqla məşğuldur. Hafiz Əzimzadə Ağdam Suvarma Sistemləri İdarəsini bərbad duruma salsa da, Əhməd Əhmədzadənin əsl simasını xalqa tanıtmaq yönündəki fəaliyyətini “qiymətləndirməmək” olmaz.
Özünü müstəqillik fədaisi kimi qələmə verib Əhməd Əhmədzadənin “zəif nöqtəsini” vuran H. Əzimzadənin “vətən sevgisi” daha “təqdirəlayiqdir”. Qarabağda boya-başa çatan Hafiz Əzimzadə “dünyanın əmin-amanlıq” vaxtlarında Qarabağ erməniləri ilə sıx dostluq münasibətləri yaradıb. Ancaq bu dostluq o qədər “saf və qırılmaz” olub ki, ermənilərin xalqımıza qarşı törətdiyi misli görünməmiş faciələr belə onu sarsıda bilməyib. Aldığımız məlumatlara görə, Hafiz Əzimzadə hələ də “köhnə dostları” ilə tez-tez görüşür, ötən illəri həsrətlə yad edir. Bunun üçün Rusiyanın müxtəlif şəhərlərinə getməyə ərinməyən H.Əzimzadə elə bu günlərdə erməni dostları ilə görüşdən qayıdıb. Yəqin ki, erməni dostlarla görüşdən sonra o, Əhməd Əhmədzadə ilə mübarizəyə daha böyük ruhla davam edəcək.
Azərbaycanda məhşur bir məsəl var - “Su başdan bulanar”. Atalarımız dediyi kimi, illərdir ki, suyumuz durulmaq bilmir. Deyəsən hələ də durulmaq fikri yoxdur.
Nicat MAHMUDOV