Sahibkardan İlham Əliyevə şok məktub: “Baku Steel Company”
şirkətinin inzibatçısı Rasim Məmmədovdur. O, arxasındakı dəstəyə
güvənərək istədiyi hərəkəti sərbəst şəkildə edə bilir. Onun quldurluq
əməlləri haqda bizim çoxsaylı şikayətlərimizə heç yerdə baxılmır”

Tanınmış iş adamı Nurəddin Zülfüqarlı ölkə başçısı İlham Əliyevə müraciət edib. Xatırladaq ki, hazırda Türkiyədə yaşamağa məcbur olan N.Zülfüqarlı vaxtilə Heydər Əliyevin sərəncamı ilə prezident yanında Sahibkarlar Şurasına üzv seçilib, İlham Əliyevin Fəxri Fərmanı ilə təltif edilib. N.Zülfüqarlının müraciətini olduğu kimi təqdim edirik:
“Hörmətli cənab Prezident. Mənim Sizə mətbuat vasitəsi ilə müraciət etməyimə səbəb - mənim, ailə üzvlərimin və çoxsaylı səhmdarların adına olan özəl əmlakların bir qrup yüksək vəzifəli şəxslərin birbaşa dəstəyi və himayədarlığı ilə quldur dəstə tərəfindən ələ keçirməsi ilə bağlıdır.
Mən, ailə üzvlərim, səhmdarlar ve iş kollektivi yeddi ildir ki, aidiyyəti hüquq-mühafizə, ədliyyə, məhkəmə orqanlarına yazılı, videogörüntülü və sair mövcud olan hər vasitə ilə müraciətlər etmişik. Müraciətlərimiz baxılmadığı üçün Sizin də ünvanınıza çoxsaylı müraciətlər ünvanlamışıq. Mən tam olaraq əminəm ki, ünvanlanan müraciətlər Sizə məruzə edilməmiş və ya təhrif olmuş şəkildə çatdırılmışdır. Başımıza 7 il ərzində gətirilən quldurluq əməlləri haqda qısa məlumat verəcəyəm.
2005-ci ilin noyabr ayında məni Dövlət Əmlak Komitəsinə dəvət edərək təklif etmişlər ki, “BAKIPOLADTÖKMƏ” ASC və “BAKIELEKTROŞTAMP” ASC-nin mənə və qardaşıma məxsus olan səhmlərini könüllü və əvəzsiz şəkildə başqasının adına özgəninkiləşdirilməsinə razılıq verim. O zaman hər iki şirkətə 10 milyonlarla ABŞ dolları məbləğində rəsmi şəkildə investisiya bizim tərəfimizdən qoyulmuş, 1500-dən artıq yeni iş yerləri yaradılaraq müəssisələr işlək duruma gətirilmişlər. Təbii ki, mən bu təklifə razı ola bilməzdim. Ailəmiz uzun illər Rusiyada və digər ölkələrdə qazandığı sərmayəni çökmüş iqtisadiyyatı olan bu şirkətlərə qoymuş, gecə-gündüz bılmədən sözugedən şirkətləri işlək duruma gətirmişdir. Məni xəbərdar etdilər ki, sənin razılığın olmasa da, bu iş zorla həyata keçiriləcəkdir. Aradan az müddət keçdikdən sonra 9 dekabr 2005-ci ildə məni, daha 2 qardaşımı, 3 nəfər məsul işçimi kobud şəkildə, başımıza torba salaraq, AR DİN BMCMİ-nə apararaq kameraya salmışlar. Heç bir istintaq aparmadan məni, qardaşım Loğman Zülfüqarlını 4 ay həbsdə saxlamışlar. Həbs qətimkan tədbiri seçildiyi gün 8 qardaşımın evlərində böyük bir qrup tərəfindən axtarış aparılmışdır. Bütün ailə üzvlərimin başqa ölkəyə çıxışı qadağan edilmişdir. Bizə aid iş yerlərində bir neçə nazirliyin yoxlama qrupu uzun müddətli təftişlər həyata keçirmişlər. Bütün iş yerlərində iş fəaliyyəti dondurularaq, 1500-dən çox işçi uzun müddət işsiz qalmışdır. İstintaq təcridxanasında mənimlə davamlı olaraq söhbətlər aparılaraq, mənim razılıq imzamı almaq uçun psixoloji təzyiqlər tətbiq olunmuşdur. Nəhayət 4 aydan sonra mənə təklif etdilər “ya imza atacaqsan, ya da digər ailə üzvlərini türmədə, yanında görəcəksən”. Təcridxanada zor gücü ilə lazım olan imzaları alaraq, hər iki adı çəkilən özəl şirkətlərin səhmlərinin 80 faiz hissəsini bir gün ərzində, əvəzsiz olaraq başqa bir səxsin, yəni heç nədən xəbəri olmayan Lerikli bir çobanın - Gəray Məmmədovun adına sənədləşdirmişlər. Bundan sonra bizi azadlığa buraxmışlar. O dövrdə törədilmiş quldurluqlar və qanunsuzluqlar haqda aidiyyəti dövlət orqanlarına müraciət etsək də, şikayətlərmizə heç bir reaksiya verilməmişdir. Törədilmiş cinayətlərin arxasında yüksək vəzifəli məmurlar olduğu üçün yerlərdə bizə susmağı tövsiyyə etmişlər. Biz təhlükədə olsaq da, qətiyyətli mübarizəmiz nəticəsində səhmlər adına keçirilmiş Gəray Məmmədovun adına olan alqı-satqının saxta olduğunu mətbuat vasitəsi ilə və özünün etirafı ilə isbat etdikdən sonra eyni səhmləri yenə də əvəzsiz və köhnə üsulla başqa şəxsin, yəni Əmlak Komitəsinin işçisinin - Mahir Ağayevin adına 2012-ci il tarixdə keçirmişlər. Daha sonra 2013-cü ildə həmin səhmləri “Baku Steel Company”nin adına keçirərək, son olaraq mənimsəmişlər. Silahlı dəstənin müşayiəti ilə bütün bu quldurluq hadisələrini həyata keçirən - "Baku Steel Company" şirkətinin inzibatçısı Rasim Məmmədovdur. O, arxasındakı dəstəyə güvənərək istədiyi hərəkəti sərbəst şəkildə edə bilir. Onun quldurluq əməlləri haqda bizim çoxsaylı şikayətlərimizə heç yerdə baxılmır. Rasim Məmmədovla hər kəs hesablaşır. Azərbaycanda bu şəxs bizdən başqa daha bir neçə sahibkarın əmlakını zorla əlindən almış. Məhkəmə, hüquq-mühafizə orqanları bu şəxsi cinayət məsuliyyətinə cəlb etmək əvəzinə, bizləri susmaq uçun sıxışdırır. Rasim Məmmədovun özünün dediyi kimi, istədiyi hərəkəti edir və heç kim ona heçnə edə bilməz. Mən və ailə üzvlərimiz illər uzunu iş yerləri açdıq, dövlətə böyük məbləğlərdə vergi ödədik, ancaq sonda bir quldur dəstənin qurbanı olduq. Bizim şikayətlərimiz hüquq mühafizə və məhkəmə orqanları tərəfindən ötur-ötur oyununa çevrilib. Başqa şikayətçiləri Rasim Məmmədov qorxu altında tutaraq susdurur. Bu quldur dəstəni biz ifşa etsək də, nəticədə hüquq müstəvisində heç bir iş görülmür. Rasim Məmmədov bizi dəfələrlə göruşə dəvət edərək bizə susmağı təklif edir. Rasim bu təkliflərin yuxarı instansiyalardan gəldiyini dəfələrlə belə vurğulayır: “Mən özbaşıma deyiləm, mənə də göstəriş verənlər var. Mən Sizə bildirirəm ki, əgər çox dərinə gedərsənizsə, sizi məhv edəcəklər. Siz kimdən artıq olmusunuz, başqaları necə susursa siz də susun. Mənə tapşırıq verilib və heç kim, gördüyünüz kimi, mənə heçnə edə bilməz”. Bütün bu söhbətləri o qorxmadan hər kəsin önundə nümayişkarcasına edir.
Möhtərəm cənab Prezident,
Rasim Məmmədovun, onun himayədarlarının bu özbaşınalıqları təkcə bizim əmlaklarımızın quldurcasına ələ keçirilməsinə gətirib çıxarmamış, bu hərəkətlər həm də ölkədə olan sabitliyə kölgə salmış, ölkənin nüfuzuna zərbə vurmuş, cəzasızlıq və özbaşınalıq mühitinin hökm sürməsini isbat etmişdir.
Belə çıxır ki, Rasim Məmmədov və onun himayədarları bizim ailənin adına rəsmi mülkiyyət sənədi olan 3 böyük əmlakı və səhmləri adımıza olan özəl iki şirkəti silah gücünə ələ keçirir və bunun qarşısını almaq əvəzinə hüquq-mühafizə orqanları, məhkəmə, ədliyyə, prokurorluq, milli deposit mərkəzi, notariat kontorları, mütəşəkkil cinayətkarlıqla mübarizə idarəsi və digər dövlət qurumları onun bu quldurluq əməllərinə rəvac verirlər?!
Cənab Prezident,
Mən Sizdən xahiş edirəm ki, bu quldurluq faktları ilə əlaqədar olaraq obyektiv və müstəqil şəxslər tərəfindən ciddi araşdırmanın aparılması barədə göstəriş verəsiniz. Məndə olan faktlar, sənədlər və şahidlərin ifadələrinə əsasən araşdırma aparıldığı halda 15-dən artıq yüksək vəzifəli şəxsin quldurluq və korrupsiya əməlləri üzə çıxacaq. Araşdırma nəticəsində bu şəxslərin cinayətkar əməlləri dövlətçiliyimizə necə zərbə vurduğunu Sizə və ictimaiyyətə aşkar edəcəkdir.
Mən müraciətimdə yazdıqlarımı təsdiq etməyə hazıram və məsuliyyətimi başa düşürəm. Yetər ki, məni dəvət edib dinləyən və ifadə alan olsun.
Bunların gercəkləşməsi üçün ancaq ve ancaq Sizin şəxsi müdaxilənizə böyük ehtiyac vardır.
Sizdən kömək gözləyirəm.”