Vergilər Nazirliyi saxta tiraj şişirdilməsini
etiraf etdi, şahidlər real tirajdan danışdı...

Şirin Cəfəri:
“Mənim haqqımda çıxarılmış AR CM-nin 213.2.2-ci
maddəsini saxta hesab edirəm, yəni bu saxta bir qərardır”

Dünən Azərbaycan Respublikası CM-nin 213.2.2 maddəsi ilə ittiham olunan “Gündəm Xəbər” qəzetinin təsisçisi və baş direktoru Şirin Cəfəri barəsində qaldırılmış cinayət işi 18 aprel 2013-cü il tarixdə saat 11:00-da davam etdirilmişdir. Məhkəmə gedişinə uyğun olaraq Gəncə şəhər Kəpəz Rayon Məhkəməsinin hakimi Yaşar Həşimov məhkəmədə iştirak edən aidiyyəti orqanların məsul işçiləri ilə proses iştirakçılarını tanış etmiş, məhkəmənin keçirilməməsində heç bir əsasın olmadığını bildirmişdir.

Vergilər Nazirliyinin əməkdaşından etiraf

Məhkəmədə respublikanın gündəlik nəşr olunan, öz mövqeyinə görə ictimaiyyət tərəfindən aparıcı müstəqil qəzetlər sırasında səslənən “Gündəm Xəbər” qəzetinin fəaliyyətindəki nöqsanlarla əlaqədar yoxlama aparmış Azərbaycan Respublikası Vergilər Nazirliyinin audit təşkilatının məsul işçisi İmran Məmmədov dindirilmişdir. O, verdiyi ifadə də “Gündəm Xəbər” qəzetini 8000 tirajla çıxan “Azadlıq” və 5000 tirajla nəşr olunan “Yeni Müsavat” qəzetləri ilə eyniləşdirərək, “Gündəm Xəbər” qəzetinin fantastik rəqəmlərlə vergi ödəyicisindən yayındığını bildirmişdir.

Mətbəə rəhbərləri məhkəməyə real tirajdan danışdı

Vergi əməkdaşı İmran Nurməmmədovun ifadəsindən sonra sözügedən qəzetin çapında iştirak etmiş “E-Q” MMC-nin direktoru Akif Quliyev və “Futbol+” mətbəəsinin direktoru Aslan Məmmədov məhkəmə tərəfindən şahid qismində dindirilmişdir. Onlar verdikləri ifadədə “Gündəm Xəbər” qəzetini əvvəllər həftədə bir dəfə, sonra iki dəfə, daha sonra hər gün nəşr etdikləri müddətdə tirajının 1700-2000 arasında olduğunu bildirmişlər. İttiham olunan qəzetin təsisçisi Şirin Cəfəri qəzet nəşiriyyatı direktorlarının ifadələrinin təsdiqi üçün hakimə lazımi sənədlər təqdim etmişdir. Hakim Yaşar Həşimov yazılı ifadə verən “Qaya” mətbuat yayımının sədri Hüseyn Əliyev, “Səma” MMC-nin baş mühasibi Qəzənfər Kazımov, “Qasid” ASC-nin sədr müavini Ağəli İsmayılovun da ifadələrini proses iştirakçılarına çatdırmışdır. Bu göstərilən ifadələrin vergilər nazirliyinin məsul işçisi İmran Nurməmmədovun ifadələri ilə uyğunsuzluq təşkil etdiyi proses iştirakçılarına tam aydın olmuşdur.
Məhkəmə prosesində 9 nəfər şahiddən 3 nəfəri dindirilmiş, qalan şahidlərin üzürlü səbəbdən iştirak etmədikləri üçün və onların da dinrilməsini vacib sayan hakim Yaşar Həşimov Şirin Cəfəri haqqında başlanmış məhkəmə prosesini təxirə salaraq, növbəti məhkəməni 29 aprel 2013-cü il saat 11:00-a təyin etmişdir.

“Bu azad mətbuatı və azad sözü susdurmaqdır”

Məhkəmədən sonra qəzetin təsisçisi Şirin Cəfəri bu prosesin gedişindən razı olub-olmadığı və gələcəkdə nə ilə nəticələnəcəyi barədə jurnalistlərə müsahibə vermişdir. Müsahibə zamanı təsisçi bildirmişdir ki, “Mənim haqqımda çıxarılmış AR CM-nin 213.2.2-ci maddəsini saxta hesab edirəm, yəni bu saxta bir qərardır. Hələ mən bu qərarla 2 il bundan öncə razılaşmamış, bu barədə Bakı şəhər 1 saylı İnziabti-İqtisadi Məhkəməsinə müraciət etmişəm. Hal-hazırda da iş oradadır. Oraya ekspertiza sənədləri təqdim olunub. Sənədlər oradadır. Belə hesab edirəm ki, ekspertiza da öz obyektiv rəyini verəcəkdir. Bu gün də məhkəmə Kəpəz rayonunda davam etdirilir, məsələ müqayisələndirlir. Hesab edirəm ki, Kəpəz rayon məhkəməsi obyektiv və qərəzsiz qərar çıxaracaqdır. Biz bunu gözləyirik və buna inanırıq. Mən, hələlik Kəpəz Rayon Məhkəməsinin hakimi Yaşar Həşimovun apardığı məhkəmə gedişatından razıyam. Haqqın və ədalətin qalib gələcəyinə ümid hissi ilə yanaşaraq nəzərinizə çatdırıram ki, 23 illik tarixə malik və yüksək tirajla nəşr olunan “Azadlıq” qəzeti ilə “Gündəm Xəbər” qəzetini eyni şəkildə müqayisə etmək məni çox təəssüfləndirir. Yoxlama aparan vergilər nazirliyinin əməkdaşı İmran Nurməmmədov astronomiq şişirtməyə yol verib. Mənə elə gəlir ki, bu azad mətbuatı və azad sözü susdurmaqdır. Eyni zamanda müstəqilliyi azad söz və mətbuatla tanınan ölkəmizin bu cür təzyiqlərə hələlik qiymət verməməsi bizi narahat edir. Bu barədə ATƏT nümayəndələri də xəbərdardırlar və sonrakı qiyməti hakim Yaşar Həşimovun qərarından sonra verəcəklər. Yəqin ki, haqq qalib gələcək və bizim yolumuz Avropa məhkəməsinə düşməyəcəkdir.”
Beləliklə, növbəti məhkəmə qeyd etdiyimiz kimi Gəncə şəhər Kəpəz Rayon Məhkəməsinin hakimi Yaşar Həşimovun qərarı ilə 29 aprel 2013-cü il saat 11:00-a təyin edilmişdir.

İlham

P.S. Məhkəmə prosesində iştirakı ilə qəzetimizə dəstək olan və azad sözün müdafiəsində duran oxucularımıza təşəkkürümüzü bildiririk.