Azərbaycan hökumətinin adı terrorçuları maliyyələşdirən təşkilatla əməkdaşlıqda

“Anonimous” beynəlxalq haker qrupunun Azərbaycandan daha bir nazirin sirlərini ələ keçirdiyini xəbər verilmişdi. “Yeni Müsavat” ötən sayında http://www.securitylab.ru saytına istinadla yazmışdı ki, qrup Rabitə və İnformasiya Texnologiyaları Nazirliyinə aid (mincom.gov.az) 1.5 GB-lik (qiqabayt) müxtəlif səpkili sənədləri və informasiyaları oğurlayıb. Bu informasiyaların arasında təkcə nazirliyə aid qapalı sənədlər deyil, həmçinin nazir Əli Abbasovun şəxsi xarakterli fotoları da yer alır. Hakerlər fotoşəkilləri və ələ keçirdikləri digər informasiyaları LulzSec adlı haker qruplaşmasının loqosu ilə “bəzəyərək” par-anoia.net adlı saytda yerləşdiriblər. Lakin par-anoia.net saytına Azərbaycandan daxil olmaq mümkün deyildi və bu səbəbdən sənədlərin nədən ibarət olduğuna dair ətraflı informasiya əldə etmək mümkün olmayıb. Bununla belə, securitylab.ru qeyd edirdi ki, sənədlər arasında MDB-nin seçki müşahidə missiyasının üzvlərinin məlumat bazası, ABŞ Müdafiə Nazirliyinin Əfqanıstandakı podratçılarının Azərbaycan üzərindən daşıdığı yüklərə dair sənədlər yer alır. Bildirilirdi ki, bu sənədlər anama.gov.az saytı üzərindən əldə edilib. Bundan başqa, sənədlər arasında Azərbaycan və Ukraynanın diplomatik pasportlarının fotoşəkilləri, təhlükəli hərbi yüklərin daşınmasına dair məlumat bazası, Azərbaycanın dövlət strukturlarının Amerika və Ukraynanın müvafiq strukturları ilə birgə işlərinin təfərrüatları və s. məxfi xarakterli məlumatlar yer alır.
Ancaq Rabitə və İnformasiya Texnologiyaları Nazirliyi dünən hakerlərin onlardan məxfi sənədləri oğurladığına dair məlumatı təkzib edib. Nazirliyin Elektron Təhlükəsizlik Mərkəzinin rəhbəri Faiq Fərmanov jurnalistlərə bildirib ki, “Anonymous” haker qrupunun Azərbaycan Rabitə və İnformasiya Texnologiyaları Nazirliyindən məxfi məlumatların oğurlanması barədə yaydığı məlumatlar həqiqətə uyğun deyil. F.Fərmanovun sözlərinə görə, cinayətkarların bu addımı Azərbaycanın dövlət orqanlarının nüfuzunu aşağı salmağa istiqamətlənib.
"Yeni Müsavat" isə bu gün mövzunu davam etdirərək yazıb ki, görünür, dövlətin məxfi sənədlərinin qorunmasına cavabdeh olan mərkəzin rəhbəri jurnalistlər qarşısında bu açıqlamanı verəndə bundan xəbərsiz idi ki, internetdə artıq oğurlanmış məxfi sənədlərdən ən azı biri açılıb və orada şok məlumatlar yer alır. Qəzet yazır:
- İnternet saytlarından birində (http://www.esecurityplanet.com/hackers/anonymous-hackers-hit-azerbaijan.html) yer alan xəbərdə “Anonymous” qrupunun Azərbaycanın Rabitə və İnformasiya Texnologiyaları Nazirliyinə hücumu barədə bəhs edilir və orada hakerlərin ələ keçirdikləri sənədlərdən birinin məzmunu, habelə həmin sənədin yerləşdirildiyi link (http://i.imgur.com/xH9xQMS.jpg) yer alır.
Esecurityplanet.com saytı qeyd edir ki, sənədlərdə məxfi xarakterli bir çox informasiyalar var. Bura şübhəli korporasiyalarla dövlət strukturları və məmurlar arasında əlaqələr də daxildir. “Məsələn, sənədlərdən birində CFC Consulting & Trading Inc., şirkətindən söhbət gedir. Məlum olur ki, bu şirkət terrorçuları maliyyələşdirir, buna baxmayaraq, Azərbaycanın və Rusiyanın dövlət strukturları ilə əməkdaşlıq edir, o cümlədən Minaların təmizlənməsi üzrə Azərbaycan Milli Agentliyi ANAMA ilə”, - deyə hakerlərə istinadən xəbərdə bildirilir. Qeyd olunur ki, hakerlərin ələ keçirdikləri sənədlər XLS, PDF, DOC və İmage formatlarındadır.
Hakerlərin ələ keçirdiyi və yuxarıda göstərilən linkdə yerləşdirilmiş sənəd Türkiyənin İnformasiya və Kommunikasiya Texnologiyaları Nazirliyinin (İCTA) Azərbaycanın rabitə və informasiya texnologiyaları naziri Əli Abbasova bu ilin mart ayında göndərdiyi “məxfi” qrifli məktubdur. Məktubda deyilir ki, İCTA 2010-cu ilin noyabrında Ukraynanın CFC Consulting şirkətinin rəsmi olaraq terrorçuluğun maliyyələşdirilməsində ittiham olunmamasına və heç bir ölkə tərəfindən sanksiyalara məruz qalmamasına baxmayaraq, daxili təlimat yayaraq tapşırıb ki, İCTA strukturları terrorçuları maliyyələşdirdiyinə dair ciddi şübhələrin olduğunu nəzərə alıb bu şirkətlə əməkdaşlığı kəssinlər. “Buna baxmayaraq, Azərbaycanın bir sıra hökumət təsisatları, o cümlədən ANAMA tövsiyələrə məhəl qoymayıblar və Ukrayna təhlükəsizlik orqanları ilə bizneslərini davam etdiriblər, bir çoxları isə əlaqələri kəssələr də İCTA-nın qərarına etiraz edərək onun dəyişdirilməsində israr ediblər”, - deyə məktubda yazılır.
Məktuba görə, 2010-cu ilin dekabrında 6 nəfərə qarşı Türkiyə və Azərbaycan banklarından çıxarılmış 1.930.000 ABŞ dolları məbləğində nağd pulun Ukraynaya aid diplomatik yükün içərisində Çeçenistandakı radikal islamçılara göndərməklə bağlı rəsmi ittiham irəli sürülüb. İCTA-nın məktubunda göstərilir ki, 2011-ci ilin mayında bu şirkətin Azərbaycandakı seçkilər zamanı casusluq fəaliyyətinə dair şübhələrin üzə çıxmasına baxmayaraq CFC-nin xidmətlərindən istifadə davam edib. Daha sonra CFC-nin rəhbəri İrina Geraşenko hədələyib ki, onun biznesi ilə bağlı informasiya təhlükəsizliyi təmin olunmasa, bütün biznesini Azərbaycandan çıxaracaq. Ukrayna xarici işlər naziri Vasil Filipçuk isə CFC-nin Azərbaycandakı biznesinin ildə ən azı 100 mln. dollar gəlir gətirdiyini deyib. “Daha sonra, 2012-ci ilin yanvarında CFC və Geraşenko barəsində onların casusluq və terrorçuluğun maliyyələşdirilməsi ilə bağlılığını göstərən yeni informasiyalar əldə olundu”, - deyə, məktubda yazılır. Türkiyə qurumu bildirir ki, Geraşenko və CFC şirkəti islamçı ekstremistləri dəstəkləyir. Buna baxmayaraq, ANAMA CFC ilə əlaqələrini kəsməyib və hətta biznesini genişləndirib.
CFC Consulting şirkətinin internet saytından məlum olur ki, bu şirkət öz müştərilərinə konsaltinq, PR xidmətləri, investisiyalar üzrə məsləhət xidmətləri göstərir. Şirkətin rəhbərinin kimliyi haqda saytda məlumata rast gəlmədik, ancaq internet resurslarında axtarışlardan sonra məlum oldu ki, CFC Ukraynanın ən nüfuzlu qadınlarından biri hesab edilən İrina Geraşenkoya bağlıdır. İ.Geraşenko Ali Radanın deputatıdır. CFC şirkətinin ANAMA ilə nə biznesinin olduğu isə məlum deyil.