Elşad Abdullayev PA rəhbərinin xaricdəki biznesinin izinə düşüb

“Almaniyada, Çexiyada obyektləri var, Prezident Administrasiyasının rəhbəri obyektləri başqa millətdən olan adamların adına keçirir”

“Bunlar elə insanlardır ki, hər şeyi gərək faktla söyləyəsən. Ona görə də mən videoları yayımlamağa başladım. Bu görüntülərdən sonra Fransada yaşayan görkəmli hüquqşünaslar, vəkillər dedilər ki, bir video cinayətkarların cəzalandırılmasına dəlalət edirdi. Ancaq indiyə qədər 10-dan çox video material yayımlanıb. Qardaşım Mahir Abdullayevi oğurlayanlar, mandat alveri üçün məndən pul alanlar qalıb kənarda, mənə, yaxınlarıma təzyiq edirlər. Bütün bu işlərin arxasında Prezident Administrasiyasının rəhbəri Ramiz Mehdiyev dayanır” - bu sözləri fəaliyyəti dayandırılmış ABU-nun keçmiş rektoru, hazırda Fransada mühacirətdə yaşayan Elşad Abdullayev deyib...

“Qardaşım oğurlanıb, pulum qaytarılmayıb, 20 ilə qurduğum universitet 20 dəqiqənin içərisində əlimdən alınıb”


Elşad Abdullayev 7 aydır yaranan Müstəqil Istintaq Komissiyasının heç bir iş görmədiyini deyir: “Müstəqil Istintaq Komissiyası qardaşım Mahir Abdullayev oğurlanması, məndən alınan pulları araşdırmaq əvəzinə, əksinə, bizə təzyiq edir. Xəbər göndərirlər ki, yeni videolar yaysaq, baha başa gələcək. Asacaqlar, kəsəcəklər, nə bilim nə. Qohumlarıma təzyiqlər edirlər. Qohumlarım hara gedirsə, ”Elşad müəllimin adamlarıdır" deyib qaçırlar. “Royalbank”da qohumlarımın 10-12 min manatı batıb. Ancaq qaytarmırlar. Yalandan deyirlər ki, iranlı hakerlər bankın hesablarını ələ keçirib. Vətəndaşların “Royalbank”da batdığı pulları Ilham Əliyevin bir ofşor zonada olan pulunun yarısı qədər deyil. Camaatın pulunu niyə vermirlər?".
Elşad Abdullayev deyir ki, ona olan təhdidlərin arxasında Ramiz Mehdiyev dayanır: “Qardaşım oğurlanıb, pulum qaytarılmayıb, 20 ilə qurduğum universitet 20 dəqiqənin içərisində əlimdən alınıb, bunlar araşdırılmır, ancaq təhdidlər edilir. Bir qrup adam dövləti zəbt edir, vəzifələrindən sui-istifadə edir”.
Keçmiş rektor bu günlərdə mətbuatda müsahibəsi yayılan Gülər Əhmədovanın “Allah Elşad Abdullayevə də insaf versin, ürəyinə nida salsın ki, həqiqəti desin, məndən əl çəksin” açıqlamasında münasibət bildirdi: “Əvvəlcə çalışırdılar ki, bütün bu məsələlərdə Sevinc Babayevanı önə versinlər. Onu cəmiyyətə dələduz kimi təqdim etmək istəyirdilər. Guya bu məsələdə yalnız Sevinc Babayeva günahkardır. O gəlib söhbəti edib, pulu alıb və Ramiz Mehdiyevlə Gülər Əhmədovanın bu məsələdən xəbəri yoxdur. Sevinc Babayeva bu işi öz üzərinə götürmədiyi üçün onu zəhərləyib, öldürdülər. Mən sıradan bir adam deyiləm, hüquqşünasam. Yoldan keçən adamla söhbət etmərəm. Yaydığım videolardan da açıq-aydın görünür ki, Sevinc Babayeva bu məsələdə vasitəçidir. O, Ramiz Mehdiyevlə mənim aramda vasitəçi olub. Onun dəfələrlə Prezident Administrasiyasına getdiyinin şahidi olmuşam”.

“Mahir Abdullayevin işi ilə bağlı 10-a yaxın adam ortadan götürülüb”

“Fransada və başqa ölkələrdə fəaliyyət göstərən adamlardan yüzlərlə mesaj alıram. Onlar Azərbaycanda olan hüquq sistemindən təəccüblənirlər. Hər kəs deyir ki, mənim yaydığı bir video hər şeyi sübut edir. Yəni bir video material bəs edir ki, zərərçəkən kimi məni tanısınlar, iş aşadırılsın” - deyə Elşad Abdullayev bildirir.
Elşad Abdullayevin sonuncu yayımladığı videoda keçmiş deputat Rza Ibadovun adı hallanır. Rza Ibadov da məsələylə yaxın günlərdə geniş açıqlama verəcəyini söyləyib. Keçmiş rektorun bu məsələylə bağlı fikirlərini öyrəndik. O deyir ki, Rza Ibadovla şəxsi tanışlığı olmayıb: “Uzaqdan-uzağa onu tanımışam. Heç bir münasibətim yoxdur. Yayımladığım videoda onun barəsində Sevinc Babayeva danışır”.
Elşad Abdullayev qardaşının işi ilə bağlı indiyə qədər 10-yaxın adamın aradan götürüldüyünü deyir: “Mahir Abdullayevin işini aparan Zahid Dünyamalıyev aradan götürüldü, Sevinc Babayeva öldürüldü. Zahid Dünyamalıyev gizli şəkildə öldürüldüsə, Sevinc Babayeva bütün dünyanın gözü qarşısında öldürüldü”.
ABŞ Dövlət Departamentinin bu günlərdə yaydığı hesabatda da “mandat alveri” videosuna yer ayırlıb. Bu barədə danışan keçmiş rektor deyir ki, hesabat yayımlanmazdan üç həftə öncə onunla görüşüblər: “Bir neçə saat söhbət etdilər. Yəni bu hesabatı açıqlayanlar havadan, sudan danışmırlar. Hər şeyi dəqiqliklə araşdırırlar. Gördüyüm işlər ABŞ Dövlət Departamentinin hesabatından tutmuş, Strasburq məhkəməsinə qədər gedirsə, ümid edirəm ki, sonda haqq-ədalət öz yerini tapacaq”.
Qarşıdakı bir həftədə yeni videolar yayımlayacağını deyən Elşad Abdullayev bildirdi ki, növbəti videolarda da Mahir Abdullayevin məsələsi olacaq.

“İstəyirlər ki, Ramiz Mehdiyev təqaüdə gedəndə üstündə ləkə olmasın”

Elşad Abdullayevin işi ilə bağlı araşdırma aparan, bloger Elnur Məcidli açıqlamasında maraqlı faktlar sadaladı. O, Gülər Əhmədovanın müsahibəsini bir mesaj kimi qəbul etdiklərini deyir: “Gülər Əhmədovanın sonuncu müsahibəsi bir mesajdır. O demək istəyir ki, pul məndə deyil, pul Ramiz Mehdiyevdədir. Elşad müəllim də video kadrları yaymazdan öncə Gülər Əhmədovaya məktub yollamışdı. Mən də bir neçə dəfə ona ”facebook"da yazmışdım. Elşad müəllimin Bakıdakı nümayəndəsinə bildirmişdi ki, pulu Ramiz Mehdiyevdən alıb qaytaracaq. Sonradan Ramiz Mehdiyevlə danışandan, özünün təhlükəsizliyinə əmin olandan sonra bizimlə söyüşlə danışmağa başladı. Gülər Əhmədova deyir ki, Sevinc Babayeva ölməsəydi indi həbsdə olmazdı. Yəni dolayı yolla demək sitəyir ki, Sevinc Babayeva onların güdzaına gedib. Sevinc Babayeva bu işləri öz üzərinə götürmədiyi üçün onu zəhərləyib öldürdülər".
“Gülər Əhmədova prezidentə sədaqətini nümayiş etdirməyə çalışır. Gülər Əhmədova Elşad müəllimlə görüşlərin birində deyir ki, Ramiz Mehdiyevin tərəfində olsaydın, problemin həll olunardı. Əslində Gülər Əhmədovayla Elşad Abdullayevin görüşü Mahir Abdullayevin işi ilə bağlı olub. Sonra Gülər Elşad müəllimə deyir ki, deputat olsa, toxunulmazlıq əldə edərsə, qardaşının işini həll edə bilər. Indi Gülər Əhmədova və onun vəkili işi inkar üzərində qurublar. Hər şeyi inkar edirlər. Ancaq bilmirlər ki, inkar etdikcə hər şey onlara qarşı yönəlir. Onlar istəyirlər ki, Ramiz Mehdiyev təqaüdə gedəndə üstündə ləkə olmasın. Bütün cəhdlər buna görədir”.

“Ramiz Mehdiyevin Almaniyada, Çexiyada obyektləri var”

Elnur Məcidli bizimlə söhbətində onu da qeyd etdi ki, MIK-in sədri Eldar Camalov Fransaya gəlmək istəyir: “Məqsəd isə 1 milyon manatı qaytarmaqdı. Biz bilirik ki, o pulu Eldar Camalov nə öz cibindən, nə də Gülər Əhmədovanın hesabından verəcək. Pulu verərsə, Ramiz Mehdiyev verəcək. Biz bunu bilirik”. Bloger Çexiyada, Almaniyada Ramiz Mehdiyevə məxsus şirkətlərin olub-olmadığını araşdırdıqlarını deyir: “Bizdə olan məlumata görə, sözügedən ölkələrdə Ramiz Mehdiyevə məxsus əmlak, ticarət obyektləri var. Bununla bağlı hər iki ölkənin ticarət palatasına soğru göndərmişik. Ilham Əliyevin ofşor zonalarda mülklərini, obyektlərini tapmaq asandır, ancaq Ramiz Mehdiyevin yox. Çünki Prezident Administrasiyasının rəhbəri obyektləri başqa millətdən olan adamların adına keçirir. Buna görə də bunu tapmaq bir az çətindir. Ancaq biz izinə düşmüşük, sorğulara cavab alıb, işimizə davam edəcəyik”.

Elçin