Jurnalistlərə tikilən binaya ayrılan vəsaitin banka qoyulan depozitindən 3 illik faiz mənimsənilib; KİVDF rəhbəri isə özünü “prorab” sayır

Mərhum şair Qabilin “Səhv düşəndə yerimiz” şeiri Vüqar Səfərlinin son günlərdəki bütün antropotoloji vəziyyətinə uyğun gəlir. Ötən həftənin ən savadsız və gözlənilən müsahibəsi ilə yadda V.Səfərli olan-qalan bütün imicini bununla da alt-üst etdi. Əvvəla, Azərbaycan kimi absurdların adiləşdiyi bir ölkədə KİVDF kimi qurumun V.Səfərliyə tapşırılması şedevrdir. V.Səfərli kimi adam demokratik və qanuni dövlətdə olsa-olsa sadəcə, inşaat mühəndisi işləyə bilər.
Axı özünün də dediyi kimi, jurnalistlərə veriləcək binanı tikib təhvil vermək ona tapşırılıb. Görünür, cənab Səfərli özünü ya tikinti şirkətinin müdiri hesab edir, ya da iş icraçısı. Mətbuatın da bu günə kimi xəbəri olmayıb ki, KİVDF rəhbəri əslində “prorab” işləyirmiş. Gəlin, jurnalistlərə tikilən bina ilə bağlı müxbirin Səfərliyə verdiyi suala cavabını oxuyaq: “Mənim işim yalnız binanı tikib təhvil verməkdir. Mənə hələ ki, bu tapşırılıb. Yazın ki, jurnalistlərə bu haqda geniş məlumat veriləcək, ola bilsin mətbuat konfransı keçirilsin”.
KİVDF rəhbərinin heç nədən xəbəri yoxdur və ümumiyyətlə, evlərin hansı prinsiplər, meyarlar çərçivəsində paylanacağını bilmir. Əlbəttə, onun marionetka olduğunu və qərarların PA-da verildiyini 1 yaşlı körpə də bilir. Amma mətbuata aid quruma başçılıq edən şəxsin savadsız müsahibəsi və tikintiyə nəzarət etdiyini deməsi sadəcə rüsvayçılıqdır.
Məsələnin, digər ciddi bir tərəfi isə bu binaya qoyulan 5 milyon manat depozitdir. Banka qoyulan bu hesabın 3 il faizini mənimsəyiblər və bundan sonra yada düşüb ki, binanı inşa etmək vaxtıdır. Bunu qəzetimizə mötəbər bir qaynaq bildirib. Əgər V.Səfərli tikintiyə rəhbərlik edibsə deməli, 5 milyonluq vəsaitin mənimsənilməsində və maxinasiyalarda çox mühüm rolu olub.
İndisə yaxasını kənara çəkən KİVDF rəhbəri bununla da məsuliyyəti üzərindən atmaq və əgər qanunsuzluq faktı aşkarlanarsa ənənəvi olaraq hansısa günahsız fəhləni qurban verməyi planlaşdırır. Onun səlahiyyətində olsa sevmədiyi qəzetlərə, ümumən tənqidi media nümayəndələrinə mənzil verməz. Öz oğluna dövlətin pullarını peşkəş edən, müsabiqələrdən oğlunun qəzetinin əməkdaşlarını qalib çıxaran bir məmurdan bundan artığını gözləmək olmaz.
Milli Mətbuata günü yaxınlaşan ərəfədə isə jurnalistlərin binası məsələsi daha da qabaracaq və gərginlik yaranacaq. Səfərli isə məsuliyyəti boynundan atmaqla jurnalistlərə veriləcək evlərdən sonra hədəfə çıxmaq istəmir. O jurnalistlərin narazılığı olacağı halda mənzillərin PA tərəfindən verildiyini əsas gətirəcək. Ki, heç kim onu təqsirkar qismində görməsin.
Adı məhkəmələrdə, mətbuata qarşı qərəzlilikdə, maxinasiyalarda hallanan və qəzetləri satın almaq hiyləsi ilə yaşayan bir məmurun özünü təmiz çıxarmaq cəhdləri puça çıxacaq. Xüsusilə də bina məsələsində özünü rəzil günə qoyması onu gələcək fəaliyyətini böyük qaranlıq salıb.
Ümumiyyətlə, 4 ildən çoxdur bu fond yaradılıb və keçirdiyi bütün müsabiqələr həmişə narazılığa səbəb olub. Bunun da yeganə səbəbi odur ki, müsabiqələr ədalətli şəkildə keçirilmir. Müsabiqələrdə hər zaman özfəaliyyət, qohumbazlıq, yerlibazlıq, hətta ailəbazlıq əsas amil kimi götürülür.
Qeyd etdiklərimizin başında isə KİVDF fondunun icraçı direktoru dayanır. Onun mətbuata, KİV-ə aidiyyatı yoxdur. V.Səfərlinin işi qəzet satmaq olub. KİV fonduna icraçı direktor təyin olunandan sonra da bu adam özünü mətbuata uyğunlaşdıra bilmədi. Diqqət yetirin, müsabiqənin qalibləri kimlərdir, bir qrup hakimiyyətyönlü mətbuat orqanlarının jurnalistləri, bir neçə müxalifət yazarı və V.Səfərlinin “çoxtirajlı” qəzeti olan “Mövqe”nin əməkdaşları. Hansı ki, o qəzetin ictimai yükü divarlara yapışdırılan elan vərəqələri qədər deyil. Amma qəzetə 10 min manatlar ayrılır.
Vüqar Səfərli hər müsabiqədə bir nəfəri qalib etdirir. Ən acınacaqlısı odur ki, bu qədər imkanlara malik bir adam bütün normaları, hətta ictimai qınağı nəzərə almadan belə əli qələm tuta bilməyən oğluna da min manat mükafat verdirir. Özü də həmin yazının dərc olunduğu qəzetin çapında ciddi saxtakarlıq etməklə. Xatırlayırsınızsa, həmin qalmaqal mətbuata çıxarılmışdı və böyük skandala səbəb olmuşdu. Belə bir məmurun isə azadlıq sevər bir sahədə hegemonluq etməsi, müsabiqələrdə istədiyi adamı qalib elan etməsi mətbuatın gələcəyinə balta vurur. Onun müsabiqələri münasibəti necədirsə, jurnalistlərə mənzil verilməsi də eynidir.
V.Səfərlinin qohumlarından 10 dəfə qabiliyyətli adamlar var, hamısı da kənarda qalıb. Artıq bu, prezidentin mətbuatla bağlı siyasətinə, iradəsinə qarşı çıxmaqdır. V.Səfərli pul ayrılan jurnalistlərə və qəzet baş redaktorlarına elə münasibət sərgiləyir ki, guya öz cibindən kömək edir. Unutmasın ki, həmin pullar heç kimin dədəsindən qalmayıb. O pullar xalqındır. Onu da haqqı olana vermək lazımdır. Bütün bunlar və onun müsahibəsi göstərir ki, Səfərli vəzifəsinin öhdəsindən gələ bilmir. Ona görə də tutduğu vəzifədən istefa verməlidir. İstefaya getməsinin ən əsas səbəbi onun KİVDF-də jurnalistlərin binasına ayrılan vəsaitin xərclənməsində olan qeyri-şəffaflıqdır. Hüquq-mühafizə orqanları bu məsələni araşdırmalıdır.

H.Mirzə