Hakimiyyəti təşkil edən əsas klanların arasında son döyüş başlayıb və artıq kim-kimi məsələsi həll olur

gundemxeber.az Son ayların və həftələrin qarmaqarışıq gündəminin baş məsələsi olan Gülər Əhmədova skandalı hələ ki, səngiməyib. Elşad Abdullayevin videoları indi Azərbaycanın kabusuna çevrilib və belə görsənir ki, işlər təkcə Gülər Əhmədovanın rüşvət alma məsələsı ilə bitməyəcək. Indi Elşad Abdullayevin video yaradıcılığı, mahiyyət etibarilə, bir vaxtlar dünyanı xeyki səksəkədə saxlamış “VİKİLEKS” saytının ifşaedici materiallarını xatırladır. Hamı və hər kəs hər gün Elşad Abdullayevdən yeni kompramat xarakterli video çəkilişlər gözləməklə gününü keçirir. Görünənlər onu deyir ki, bu məsələ sadəcə E.Abdullayevin şəxsi maraqları üçün girişdiyi sıradan bir özfəaliyyət növü olmayıb və uzun müddət sistemli şəkildə aparılmış işin nəticəsində meydana gəlmiş ciddi əməliyyat tədbiridi. Ölkənin rəsmi və müstəqil adlanan telekanalları demək olar ki, bu məsələlərdən danışmırlar.
Rəsmi və iqtidaryönlü qəzetlər isə var gücləri ilə məsələni Gülər Əhmədovanın üzərində cəmləşdirməklə oyunnan çıxmaq, məsələni bitirmək istəyirlər. Müstəqil və müxalif mətbuat, həmçinin də sosial şəbəkələr məsələnin üzərinə daha çox gedir kimi görünsələr də, əslində onlar da baş verənlərin mahiyyətinə enməkdə maraqlı görsənmirlər.
Ortada bir çevriliş planı var. Bu sadəcə bir saray çevrilişi, yaxud da kimlərinsə şəxsi ambisiyaları üzərinə qurulan, kaprizlərinə hasablanan məsələ deyil. Ortada, illər əvvəldən, zərgər dəqiqliyi ilə hesablanmış və 2013-cü ilin prezident seçkiləri ilə yekunlaşması planlaşdırılan bir əməliyyat var. İndi mətbuat da, genəldə ölkədə aparılan siyasətin özü də, baş verənləri sadəcə Elşad Abdullayev, Gülər Əhmədova və “Qaynana”nın görünən və görünməyən digər personajlarının məsələsi kimi təqdim etməyə çalışırlar. Amma gedişat göstərir ki, Elşad Abdullayev illər uzunu ölkənin bütün önəmli adamlarını da, dövlətin siyasətini həyata keçirən bütün qurumları da hədəfə alan çəkilişlər aparıb, heç bir maneəyə rast gəlmədən, çəkinib qorxmadan Azərbaycanın dövlət və hökumət qurumlarını bütün dünyanın gözü qarşısında biabır edəcək “sənədli filmlər” çəkib. Bir sözlə, heç də məsələ, nə Elşad Abdullayevin özünün, nə də baş vermiş olayları cəmiyyətə təqdim edənlərin danışdıqları qədər sadə deyil. Bu gün baş verənlər, artıq qeyd olunan kimi, 2013-cü ilin prezident seçkisinə hesablanıb və faktiki olasraq bütün olub-bitənlər Azərbaycanın mövcud və gələcək hakimiyyətinin taleyini həll etməyə yönəlib. Bu fikri daha aydın şəkildə təxminən belə ifadə etmək olar ki, 2013-cü ildən sonra Azərbaycanda hakimiyyət kimin idarəsinə və iradəsinə təslim tutulacaq. Başqa sözlə, mövcud hakimiyyəti təşkil edən əsas klanların arasında son döyüş başlayıb və artıq kim-kimi məsələsi həll olur. Bu klanlardan biri şərti olaraq “köhnə qvardiya” adlandırılan Heydər Əliyevin kadrlarından ibarətdi, digəri isə yenə də şərti olaraq cəmiyyətə “yeni qüvvələr” kimi təqdim olunan başqa bir qanaddı. Heç şübhəsiz ki, “köhnə qvardiyanın” lideri qismində Ramiz Mehdiyevin hallansa da, “yeni qüvvələrin” lideri qiyafəsində Paşayevlər komandası çıxış edir. Bu oyunda İlham Əliyev məhz Heydər Əliyevin özü kimi oynayır və bilərəkdən meydanı adı çəkilən qüvvələrə buraxıb ki, son anda qalib gələcəyi şübhə doğurmayan tərəfi dəstəkləsin.
Qaliblər və məğlublar aşkara çıxandan sonra prezidentin kim olacağı məsələsini həll etmək problemi yoxdu. Zatən bizim kimi ölkələrdə prezidentlər adətən makro yox, mikro məsələləri həll edəcək gücdə olurlar. Bu anlamda prezidentin kim olacağının o qədər əhəmiyyəti də yoxdu. Baş verənlər, adına “köhnə qvardiya” dediyimiz klanın üzərinə total hücum və öldürücü zərbə vurmaq anlamına gəlir. Rejissorlar, ssenaristlər və obyektivi yönəldən operatorlar isə tamam başqa adamlardı və başqa yerlərdən idarə olunurlar. Bir növ ortada taleyini sonda yenə də “obıvatel” kütlənin həll edəcəyi qladiatorların döyüşü gedir.
Hələ yalnız aysberqin görünən tərəfləri ortadadı və mahiyyət etibarilə bu görünənlər Hacı Məmmədov olaylarından çox vahim və çox dəhşətlidi. Başqa sözlə, işlər elə qurulub ki, 1993-cü ildən bəri ölkəmizin idarəetməsinin və aparılan siyasətin təkcə illərlə bəzədilən üzü yox, həm də çirkli və çox çirkin astarı tam çılpaqlığı ilə ortaya çıxsın. Ortaya çıxan mahiyyət isə, həm bu idarəetmənin, həm də aparılan siyasətin təpədən dırnağa cinayət içində olduğunu göstərir. Ən maraqlısı isə odu ki, bir tərəfdən bu ağır cinayətlər açılıb ortaya tökülür, o biri tərəfdənsə heç nə olmayıbmış kimi, analoqsuz inkişafdan, uğurlu siyasətdən dəm vurulur. Normalda isə, heç deyilsə, görüntü xatirinə bu boyda cinayətlərin faş olunması fonunda, dövlətin özünüqoruma instinkti işə düşməli və baş verdiyi şübhə doğurmayan cinayətləri törədən hakimiyyət təmsilçiləri məsuliyyətə cəlb olunmalıydılar. Amma bu baş vermir. Bir anlıq təsəvvür edin ki, evdə hamı əlində, ovcunda, küncdə-bucaqda olan zir-zibili ortalığa tökür və kimsə də bu zibilləri yığışdırmağa cəhd göstərmir. Bu isə yalnız iki halda mümkündü. Ya bu evin sakinləri bütünlüklə ağıllarını itiriblər demək, ya da bütün zibilləri ortalığa töküb birdəfəlik süpürüb atmaq qərarına gəliblər. Mənə qalırsa, Azərbaycanda indi baş verənlər, daha çox ikinci versiyaya uyğun gedir və ortalığa tökülən cinayətlərin və cinayətkarların birdəfəlik süpürülüb atılmasına hazırlıq gedir.

Azər Talıbov