Ekspert: “Bu hal qanunvericiliklə tənzimlənir və konkret olaraq cərimələr var”

Bakıda əksər çoxmərtəbəli yaşayış binalarının birinci mərtəbəsindən ev kimi istifadə edilmir. Bu mərtəbədə müxtəlif obyektlər, uşaq bağçaları, barlar, kafelər, ofislər fəaliyyət göstərirlər. Çox zaman bu obyektlərin sahibləri yaşayış binasının alt mərtəbəsində fəaliyyət göstərdiklərini unudub, işlətdikləri məkanda yüksək tonla musiqi səslənməsinə və digər bu kimi narahatlıq yaradan hallara şərait yaradırlar. Xüsusilə də Bakının mərkəzində yerləşən binaların birinci mərtəbəsində əsasən kafelər, barlar fəaliyyət göstərdiyi üçün orada sakinlərin istirahət hüquqları daha çox pozulur. Daha öncələr də bir neçə dəfə paytaxt sakinləri binalarının altında yerləşən səs-küylü obyektlərlə bağlı mətbuat vasitəsilə şikayətlər yayıblar. Hətta olub ki, sakinlərin şikayəti əsasında Bakıda çox məşhur barlardan biri də öz fəaliyyətini dayandırmalı olub.

Sakinlərin başqa bir şikayəti də budur ki, obyektlərə şəxsi avtomobili ilə gələn müştərilərin sayı çox olduğuna görə onlar öz binalarının həyətində maşınlarını da saxlaya bilmirlər. Təbii ki, əksər binaların altında avtomobil saxlamaq üçün yerlər də mövcud deyil. Bəzilərində bu yerlər obyekt kimi satılıb. Bir qismində isə sadəcə olaraq, istifadəsiz qalıb və avtomobil saxlanılması üçün şərait qurulmayıb.

Bəs bu hal qanunla necə tənzimlənir? Binaların birinci mərtəbəsində hansı obyektlər fəaliyyət göstərə bilər?

Öncə qeyd edək ki, Azərbaycan Respublikasının İnzibati Xətalar Məcəlləsinə görə, məişət səs-küyü salmaq inzibati məsuliyyətə səbəb olan əməldir. Bu halı yaradan şəxslər qanuna görə inzibati məsuliyyətə cəlb olunmalıdırlar. Lakin əksər hallarda bu, baş vermir. Qanuna görə, səs-küyün salınması, digər insanların istirahət hüquqlarının pozulması deməkdir. Saat 00:00-dan sonra məişət səs-küyü salmaq olmaz. Qanuna görə, hətta gecə yarısından sonra hansısa vətəndaş öz evində belə səs-küy salarsa, həmin şəxs də inzibati məsuliyyətə cəlb oluna bilər. İnsanlarının istirahət hüquqlarının pozulması konstitusiyamıza görə də qadağandır. Lakin qanuna əməl edilmədiyi hallar da az olmur...

“Yeni Müsavat”a danışan ekspert Natiq Cəfərli də bildirib ki, qanunvericiliyə görə, səs kirliliyi anlayışı var:



“Səs ölçülür və təyin olunmuş ölçüdən artıq olduğu zaman səs kirliliyi yaranır. Bu təsbit olunduğu halda obyektin işləməsinə qadağa qoyula bilər. Yaxud da lisenziyası əlindən alınır. Ümumiyyətlə, belə məqamlarda ilk olaraq obyekt sahibi cərimələnir. Qanunvericiliklə də bu hal tənzimlənir və konkret olaraq cərimələrin miqdarı var. Obyekt sahibi yayılan səsin qarşısını almaq üçün ilk növbədə müasir səs izolyasiyaedici avadanlıqlardan və tikinti materiallarından istifadə etməlidir. İndiki zamanda bu cür materiallar mövcuddur ki, yayılan səsin qarşısını ala bilir. Obyekt sahibləri də bundan istifadə edib səs kirliliyinin qarşısını asanlıqla ala bilər. Sadəcə olaraq, məsələ odur ki, Azərbaycanda qanunların tətbiqi ilə bağlı ciddi problemlər var. Ona görə də çox zaman mövcud qanunların tətbiqində problemlər yaranır. Bu, istər səs kirliliyinin ölçülməsi, istərsə də izolyasiya sisteminin qurulması zamanı baş verir. Nəticədə bütün bunlar vətəndaşların narahatçılığına səbəb olur. Başqa bir problem də var ki, vətəndaşlar obyekt sahiblərindən vəsait əldə etmək üçün tez-tez şikayətlər etməyə çalışırlar. Əsasən də obyektin üstündə mənzili olan vətəndaşlar bəzən belə addımlar atırlar. Lakin bu cür hadisələr az-az görünür. Şəxsən mən belə məqamların şahidi olmuşam.

Məsələyə qlobal yanaşsaq və qanunvericiliyin tələbləri tam olaraq yerinə yetirilsə, burada qeyri-adi bir şey yoxdur. Dünyanın hər yerində mərkəzi küçələrdə yerləşən binaların altında barlar, kafelər fəaliyyət göstərir. Azərbaycan da turizmi inkişaf etdirmək istəyirsə, mərkəzi küçələrdə gecə klublarının, diskotekaların, kafelərin çox gec saata qədər işləməsi normaldır. Bu obyektlərdə isə əlbəttə ki, yüksək səsli musiqilər qoyula bilər. Bu hal qaçılmazıdır və qadağan edilməsi ilə həm biznesə, həm də gələn turistlərə mane olmaq mümkündür. Ona görə də əlaqədar orqanlar ciddi addımlar atmalı, bu addımlar atılan zaman isə həm vətəndaşların, həm də obyekt sahiblərinin hüquqları qorunmalıdır”.