Köçəryanın həbsinə səbəb 20 ildən sonra Ermənistan ermənilərinin Qarabağ ermənilərindən hakimiyyəti almasıdır.

Bu sözləri Axar.az-a açıqlamasında politoloq Əhəd Məmmədli deyib. O bildirib ki, Ermənistanda bu iki klan arasında kəskin qarşıdurma var:

“Bir neçə il bundan əvvəl beynəlxalq konfransda Ter-Petrosyanın müşaviri mənə demişdi ki, qarabağlılar sizin 20 faiz, bizim isə 100 faiz torpaqlarımızı alıblar. Ermənistanda 2008-ci ildə prezident seçkiləri oldu. O seçkilərdə Köçəryan iqtidarı xalqına atəş açdı, ən azı 10 adam öldü. Erməni erməninin qanını tökdü. Həmin nümayişlərdə indiki baş nazir Paşinyan da iştirak edirdi. Ona qarşı cinayət işi açıldı. Bir neçə il Paşinyan qaçıb gizləndi. Sonra təslim oldu. Bir ildən sonra həbs cəzasını çəkib amnistiyaya düşdü”.

Politoloq vurğulayıb ki, 20 ildən sonra Ermənistan erməniləri Qarabağ ermənilərini inqilab yolu ilə devirib hakimiyyətə gəldi:

“Onlar hakimiyyətə gələn kimi intiqamını almağa başlayıb. Öncə Qarabağ müharibəsinin "qəhraman" generalları həbs edildi. İndi isə növbə ən böyük Qarabağ ermənisi Köçəryana çatıb. Ola bilsin ki, uzun müddət Paşinyan Köçəryanı həbsdə saxlaya bilməsin. Rusiya amili buna imkan verməsin. Amma ola bilsin ki, bu həbs Moskva ilə razılaşdırılıb, ya da razılaşdırılacaq. Moskvaya ciddi güzəşt edilməsə, Köçəryanın həbsinə çətin ki, Kreml razılıq verər. Əgər bu həbs Kremlin razılığı olmadan baş veribsə, bu olay Ermənistanda Rusiyanın imicinə ciddi zərbədir. Fikrimcə, Köçəryanı həbsxanada bir az saxlayıb buraxacaqlar. Bununla da Paşinyan hər kəsin tutula biləcəyini göstərib nə qədər ciddi olduğunun anonsunu verəcək”.

Politoloq qeyd edib ki, bu həbslərin həyata keçirilməsinin arxasında bir neçə ssenarinin olması mümkündür:

“Ən az inandırıcı versiyadan başlayım. Bəzi məlumatlara görə, ABŞ-la Rusiya arasında gizli razılaşma var ki, Ukrayna Rusiyaya qaytarılır, əvəzində Cənubi Qafqaz ABŞ-a verilir. Çünki böyük Rusiyaya yol Ukraynadan keçir. Ruslar üçün Ukrayna əvəzolunmazdır. Razılaşmanın əsasında da Ermənistanı Rusiya özü təmizləyib, sonda ABŞ-a təhvil verir. Digər versiyaların görünən tərəfi isə budur ki, Paşinyan özü Ermənistanı Rusiyadan təmizləyir. Paşinyan bunu ermənilərin daxili problemlərinin həlli adlandırsa və Rusiyanın əleyhinə yönəlmədiyini desə də, əlbəttə ki, məsələ belə deyil. Bu da o anlama gəlir ki, Rusiyadan Ermənistana qarşı ciddi həmlələr ola bilər. Azərbaycan da startda durmalıdır və bu situasiyadan istifadə edib, torpaqlarımızın azad edilməsi prosesinə başlamalıdır”.