Azərbaycanda fəaliyyət göstərən İmam Xomeyni İmdad Komitəsinin nəzdindəki İmam Əli (ə) tibb klinikasından sonra İran İslam Respublikasının Qızıl Aypara Cəmiyyətinə məxsus olan və Bakı şəhəri, Yasamal rayonu, Abbas Mirzə Şərifzadə küçəsində yerləşən klinika da fəaliyyətini dayandırıb.

Məsələ ilə bağlı açıqlama verən İran Xarici İşlər Nazirliyinin mətbuat katibi Səid Abbas Əraqçı bu klinikaların bağlanmasını texniki məsələlərlə əlaqələndirib.



Virtualaz.org saytına isə Azərbaycandakı İran klinikalarının bağlanması ilə bağlı ilginc məlumatlar daxil olub. Xəbərdə deyilir ki, sözügedən klinikalarda Azərbaycan Səhiyyə Nazirliyi və güc strukturlarının nümayəndələri tərəfindən yoxlamalar aparılıb. Adının açıqlanmasını istəməyən mənbə bildirib ki, yoxlamalar zamanı İran İslam Respublikasının Qızıl Aypara Cəmiyyətinin klinikasında ciddi nöqsanlar və ilginc məqamlar aşkarlanıb: “Səhiyyə Nazirliyinə klinikada baş verən hadisələrlə bağlı məlumatlar daxil olmuşdu. Məsələ burasındadır ki, bura müraciət edən Azərbaycan vətəndaşları müayinə və müalicə üçün bir qayda olaraq İrandakı klinikalara göndərilirdi. Halbuki həmin xəstələrin Bakıda da müalicəsi mümkün idi. Yoxlama zamanı İranın tibb müəssisələrinə çoxlu sayda göndəriş vərəqələri aşkarlanıb. Bu kilinikalarda xəstələrin İranda müalicə alacağı təqdirdə sağalacağına dair davamlı təbliğat aparılırmış. Bundan əlavə, həmin klinikadakı laborator müayinələr zamanı beynəlxalq standartların pozulması faktları da aşkarlanıb”.



Araşdırma zamanı o da bəlli olub ki, bu klinikaların yürütdüyü siyasət nəticəsində hər gün onlarla xəstə İrana axışıb: “O da bəlli olub ki, bu klinikalar xüsusilə Təbrizdə fəaliyyət göstərən bir neçə özəl tibb müəssisəsi ilə gizli əməkdaşlıq ediblər. Onlara müraciət edən Azərbaycan vətəndaşlarının çoxunu həmin özəl tibb ocaqlarına yönləndiriblər. Bu isə müəyyən maddi maraq müqabilində baş tutub. Ehtimal belədir ki, Bakıda çalışan iranlı həkimlər Təbrizdəki xəstəxanalardan ora göndərilən hər xəstəyə görə faiz alıblar”.

O ki qaldı İmdad Komitəsinin İmam Əli (ə) tibb klinikasının bağlanmasına, mənbəmizin sözlərinə görə, bu klinika əsasən aztəminatlı azərbaycanlı ailələrə pulsuz tibbi yardım göstərməsi ilə məşhur olub: “Klinikanın bağlanması rəsmən onun fəaliyyətinin icazə müddətinin, yəni lisenziyasının uzadılması məsələsinin həlli ilə əlaqələndirilib. Amma gələn məlumatlarda casusluq kimi ittihamların olduğu da yer alır. Sadə dillə desək, bu klinikada casus yuvası aşkarlanıb. Belə ki, klinikanın əsasən kəşfiyyatçılardan ibarət personalı bura üz tutan kasıb azərbaycanlılar arasında təbliğat aparır, onları xeyirxahlıq, pulsuz müalicə, havayı dərman, güzəştlər müqabilində “verbovka” etməyə çalışıblar. Onların arasında İranın daha humanist dövlət olması barədə fikirlər yayılıb, müvafiq təbliğat aparılıb. Həmin tibb müəssisəsinin fəaliyyət müddətinin uzadılmaması da bununla əlaqədardır”.



Qeyd edək ki, Azərbaycandakı İran klinikaları bağlandıqdan sonra İranda xarici ölkə, xüsusilə Azərbaycan vətəndaşlarına göstərilən tibbi xidmətin qiyməti artıb. Həmçinin hepatit və onkologi xəstələrin müalicəsində təyin edilən dərmanların qiymətində artım qeydə alınıb və apteklərdə bu dərmanların əcnəbi vətəndaşlarına satılmaması üçün təlimat verilib.

Verilən məlumatlarda deyilir ki, İranda cərrahiyyə əməliyyatı olunmaq istəyən Azərbaycan vətəndaşlarına ikiqat qiymət oxuyurlar: “Bakıdakı İran klinikaları xəstələr vasitəsilə hər ay Azərbaycandan İrana milyonlarla manat vəsaitin axması siyasətinin tərkib hissəsi kimi nəzərdə tutulubmuş. Onlar indiyədək bu tapşırığı uğurla yerinə yetiriblər. Hətta dişi ağrıyanı da İrana göndərməkdə və ya bunu təşviq etməkdə məqsəd İran büdcəsini Azərbaycan vətəndaşlarının cibi hesabına zənginləşdirmək idi. Klinikalar bağlanandan sonra İran qiymətləri qaldırıb”.

Qeyd edək ki, İran Qızıl Aypara Cəmiyyətinin klinikasının yenidən fəaliyyət göstərməsi üçün Azərbaycan tərəfi ilə danışıqlar apardığına dair məlumatlar var.

Klinikadan isə virtualaz.org saytına deyiblər ki, onların fəaliyyətinin dayandırılması təmir işləri ilə əlaqədardır və bu tibb ocağı təxminən bir aydan sonra yenidən işləyəcək.

Azərbaycan MTN-dən bununla bağlı rəy almaq mümkün olmadı. Nazirliyin ictimaiyyətlə əlaqələr xidmətindən bu məsələ ilə bağlı Səhiyyə Nazirliyinə müraciət etməyi məsləhət gördülər. Səhiyyə Nazirliyinin mətbuat xidmətindən isə bu klinikaların bağlanmasını “texniki məsələ” kimi təqdim edib əlavə izahat vermədilər. Bununla belə yazıda səslənən fikirlərlə bağlı bütün tərəflərin mövqeyini işıqlandırmağa hazırıq.