Əliyev qardaşları üçün “fövqəladə hazırlıq”; Fərhad və Rafiq Əliyevlərin azadlığa buraxılmasına qarşı olanlar var; qardaşların imperiyasını ələ keçirənlər narahatdır və onların sırasında əsas fiqur ƏMDK sədridir...
Sabiq iqtisadi inkişaf naziri Fərhad Əliyevin və qardaşı, “Azpetrol”un sabiq prezidenti Rafiq Əliyevin azadlığa buraxılacağı ilə bağlı xəbərlər hakimiyyət daxilində ciddi müzakirə mövzusuna çevrilib. Əliyev qardaşlarının həbsə göndərilməsində bu və ya digər dərəcədə rolu olanlar, onların əmlaklarını qeyri-qanuni ələ keçirənlər ciddi əl-ayağa düşüblər.
Prezidentin əfv ərizəsi yazan qardaşlarla bağlı son qərarı əfv fərmanı imzalanacaq gündə bilinəcək və bu səbəbdən də onların həbsxanada qalmasını istəyənlər ümidlərini itirməyiblər. Məsələn, bu arada F.Əliyevin cəza çəkdiyi 2 saylı müəssisədə qiyam olması, oraya qoşun yeridilməsi barədə xəbər diqqət çəkib. Xəbərin təqdimatında da F. Əliyevin adının qabardılması belə bir şübhələrə yol açır. F. Əliyevin azadlığa çıxmaq istədiyi bir vaxtda onun saxlandığı həbsxanada qiyam olması təsadüf olsa belə, diqqəti sabiq nazirin üzərinə çəkir. Prezident qarşısına sabiq nazirlə bağlı təkzibedilməz sübutlar qoyan dairələr təbii ki, Əliyev qardaşlarının “srok”larından əvvəl, həm də əfvlə azadlığa buraxılmasını istəmirlər.
Onlar əsl məqsədlərini “xəyanət bağışlanmır” kimi sözlərlə pərdələsələr də, aydındır ki, əslində Əliyevlərin dağıdılan əmlaklarının mümkün “razborka”sının açılmasını arzulamırlar.
Sabiq “Azpetrol” prezidenti R. Əliyev vergidən yayınmaqda və qaçaqmalçılıqda təqsirli bilinərək 9 il azadlıqdan məhrum edildikdən sonra onun şirkəti prezidentin şəxsi mühafizə xidmətinin rəhbəri Bəylər Əyyubovun nəzarətinə keçib. Xatırlayırsınızsa, B. Əyyubovun həmkəndlisi və qohumu İbrahim Məmmədovun (“Azpetrol” un əməkdaşı olub) iddiası əsasında Bakı İqtisad Məhkəməsi şirkətdə Rafiq Əliyevin və hollandiyalı investorların təsisçilik hüququnun əllərindən alınması barədə qərar qəbul etdi.
R.Əliyev təsisçilik hüququnun bərpası üçün Beynəlxalq Arbitraj Məhkəməsinə müraciət etsə də, sonradan müəmmalı şəkildə şikayəti geri götürdü. Amma fakt odur ki, nəhəng bir şirkət R.Əliyevdən qanunsuz yolla alındı. Əlbəttə, R.Əliyevin azadlığa buraxılacağı təqdirdə, indi də şirkəti nəzarətində saxlayan B.Əyyubov kimi nüfuzlu fiqurla toqquşacağı mümkünsüz görünür. Amma R.Əliyevin də soruşa biləcəyi bir çox suallar var. Məlumatlara görə, şirkətin təhvil verilməsi ilə bağlı sənədi həbsxanada ona imzaladarkən, R.Əliyevə biznesdə yazılmamış qanun olan “halalıq haqqı” belə verilməyib.
Məlumatlara görə, Əliyev qardaşlarının azadlığa buraxılacağından ən ciddi narahat olan və təlaşa düşən Əmlak Məsələləri üzrə Dövlət Komitəsinin sədri Kərəm Həsənovdur. K.Həsənov F.Əliyevin həbsxanaya salınmasındakı rolunu hər zaman inkar edib və əsl həqiqəti də yəqin ki, iki həmkəndli özləri daha dəqiq bilir. Amma bir fakt dəqiqdir ki, F.Əliyevin həbsindən sonra onun nazir kreslosuna olmasa da, qeyri-rəsmi imperiyasına K.Həsənov sahib durub. Xatırladaq ki, Fərhad Əliyev həbs edilərkən Dövlət Əmlakının İdarəedilməsi üzrə Dövlət Komitəsinin rəhbəri olan K.Həsənov 2009-cu ildən daha geniş səlahiyyətlər verilmiş Əmlak Məsələləri Dövlət Komitəsinin sədri işləyir.
F.Əliyevin məhkəməsində ona əsas ittihamlardan biri məhz 314 min özəlləşdirmə çekinin mənimsənilməsi ilə bağlı idi. Məhkəmədə F.Əliyev bu ittihamı inkar edərək bu çeklərin 12 böyük obyektə qoyulduğunu və həmin obyektlərin onun həbsindən sonra özəlləşdirildiyini bildirmişdi. O, bu prosesdə Kərəm Həsənovun da iştirak etdiyini bildirmişdi və onun şahid kimi dindirilməsini tələb etmişdi. Amma aydındır ki, K.Həsənov “hakimiyyətin əsas düşmənlərindən birinə” belə bir jest edib həqiqəti deyə bilməzdi. Belə xəbərlər də var ki, komitə sədri onun vəzifəyə gətirilməsində əsas xeyirxahı olan sabiq iqtisadi inkişaf naziri ilə münasibətləri düzəltmək üçün bir neçə dəfə cəhd də edib. Komitə sədri Fərhad Əliyevin yaxınlarının yanına özünün deputat qardaşı Malik Həsənovu göndərib. O, F. Əliyevin qardaşlarını inandırmağa çalışıb ki, bu məsələdə Kərəm Həsənovun heç bir günahı yoxdur. Lakin qarşı tərəfi buna inandırmaq mümkün olmayıb.
F.Əliyevin komitə sədrinə inanmaması üçün səbəblər də var. Belə ki, həbsindən sonra o, Cəlilabadda F.Əliyevin qohumlarına diqqət göstərməyib və hətta onları sıxışdırıb da. Xəbərlər var ki, hətta bir hüzr məclisində üz-üzə gələn Həsənovlarla Əliyevlər nəslinin nümayəndələri dalaşıblar da. Qardaşını deputat edən K.Həsənov uzun müddətdir Cəlilabadın şəriksiz ağası olub. Üstəlik, komitə sədri kimi F.Əliyevin gizli saxlanılan əmlaklarını qorumayıb, onları hərraca çıxarıb.
Məsələn, K.Həsənovun göstərişi ilə F.Əliyevlə qardaşına məxsus olan və 2003-cü ildə özəlləşdirilən “Azərelektroterm” ASC-nin birinci özəlləşdirməsinin nəticələrinin ləğv edilərək təkrar satışa çıxarılmasını nümunə olaraq göstərmək olar.
Əliyev qardaşlarının şirkəti ilk dəfə Azərbaycan-Türkiyə birgə müəssisəsi olan A & D (təsisçilər: “Milan Group” - 50 faiz və “Azpetrol” - 50 faiz) 2003-cü ilin sonunda özəlləşdirilmişdi. 2005-ci ildə Dövlət Əmlakının İdarəedilməsi üzrə Dövlət Komitəsində departament rəhbəri olan K.Həsənovun imzası ilə “Azərelektroterm”in səhmlərinə sahiblik şəhadətnaməsi verilib. Ancaq Əliyev qardaşlarının həbsindən dərhal sonra məhkəmə qaydasında özəlləşdirmənin nəticələri ləğv edilib. Növbəti dəfə “Azərelektroterm” 2007-ci ildə investisiya müsabiqəsinə çıxarılıb. Ancaq qanuna zidd olaraq, müsabiqənin nəticələri açıqlanmayıb. Ona görə buranı kimin özəlləşdirdiyi və götürdüyü öhdəliklər bəlli deyil. Yalnız o məlumdur ki, “Azərelektroterm”ə məxsus torpaq sahəsi 35,1 hektardan 12,3 hektara qədər azaldılıb və ASC-yə məxsus torpaq sahələri fiziki şəxslərə satılıb.
Bu, sabiq iqtisadi inkişaf naziri Fərhad Əliyev və onun qardaşlarına məxsus obyektlərin onlardan alınaraq yenidən satışa çıxarılması ilə bağlı ilk fakt deyil. F.Əliyevə məxsus “Bakı Yoltikintiservis” “Daş Salahlı Bentonit” və “Azinşaat Sənaye” ASC-ləri təkrar satışa çıxarılaraq satılıb.
Bu yaxınlarda isə həbsdəki sabiq nazirə məxsus olduğu iddia edilən daha bir obyekt - Mingəçevir şəhərində yerləşən “Azərkabel” ASC K.Həsənov tərəfindən yenidən özəlləşdirilməyə çıxarılaraq, satılıb. “Azərkabel”in adı da dəyişdirilib və Kərəm Həsənov sabiq nazirin bu müəssisə üzərində olan bütün izlərini silib.
K.Həsənov F.Əliyevin həbsindən sonra xeyli güclənib və uzun müddətdir ki, Paşayevlərin patronajlığı altında “AZİNKO” kimi nəhəng şirkət quraraq fəaliyyət göstərir. Bu səbəbdən, ilk baxışda K. Həsənovun Əliyevlərin azadlığa buraxılmasından sonra özünə hansısa təhlükə yaranacağından xüsusi narahatlıq keçirməməlidir. Amma bilinən budur ki, Əliyevləri azadlığı onların əmlakını ələ keçirmiş bir çox adamlara, o cümlədən K. Həsənova sərf etmir. Ən azı o səbəbdən ki, qınayıcı baxışlarla və xoş olmayan suallarla üzləşməsinlər. Bu səbəbdən də əfv fərmanı imzalananadək Əliyev qardaşlarının başına “fövqəladə hadisələr”in gəlməsi də istisna deyil...