Siqaret və spirtli içkilər zərərli vərdişlər hesab edilsə də, bu gün ölkəmizdə də kifayət qədər siqaret və spirtli içki aludəçisi var. Aludəçilər arasında kişilər çoxluq təkil etsə də, qadın və uşaqlar da az deyil.

Sosioloqların fikrincə, qadınlar çox zaman fərqli görünmək üçün siqaret çəkməyə üstünlük verirlər. Siqaret çəkərkən daha fərqli və çəkici göründüyünü hesab edən qadınlar onun sağlamlığa zərərləri barəsində düşünmək belə istəmirlər.

22 yaşlı Günel Mahmudova ali məktəblərdən birində təhsil alır. Dəblə ayaqlaşmağı sevən həmsöhbətimiz siqaret çəkməyə 19 yaşından başladığını deyir. Onun fikrincə, siqaret qadını daha çəkici edir: "Fikir verin, mənim siqaret çəkməyim qadın olduğunuz halda sizi də cəlb etdi. Mən diqqət mərkəzində olmağı sevirəm. Artıq 3 ildir ki, siqaret çəkirəm. Gündə 1 "paçka" çəkirəm".

Günel deyir ki, ilk dəfə siqareti gözəllik salonunda işləyən rəfiqəsinin təklifi ilə çəkib. "Mən düşünmürəm ki, siqaret çəkmək pis bir vərdişdir. Qonşu ölkələrə fikir verin, Türkiyədə qadınların çox hissəsi siqaret çəkir. Ailələri də var, uşaqları da. Sadəcə Azərbaycanda buna pis baxırlar. Şəxsən mənim üçün ətrafın fikri önəmli deyil".

Amma heç kim bir qadını, xüsusilə kişilər sevdikləri qadını siqaret çəkərkən görmək istəməzlər. Sorğu zamanı kişilərin bir çox hissəsi qadının siqaret çəkməsinə yaxşı baxmadıqlarını bildiriblər. Firdovsi Aşurullayev siqaret çəkən qadınları başa düşmədiyini deyir. Həsən Quluzadə isə siqaret çəkən qadının övladının xəstə olacağını düşünür. O bildirir ki, siqaret çəkən qadınla əsla ailə qurmaz.

Qadınlar üzərində aparılan araşdırmalar zamanı məlum olub ki, siqaret çəkmək onlar üçün bir aludəçilik, bağlılıq deyil. Yəni qadın istədiyi zaman siqareti atmaq gücünə malikdir.

Sosioloq Mətləb Mahmudovun sözlərinə görə isə bəzi qadınlar kişi kimi olmaq, görünmək istədikləri üçün siqaret çəkirlər. Ancaq qadınlar kişilərdən fərqli olaraq siqaretdən qaynaqlanan xəstəliklərə daha tez yoluxurlar.

Dünyada 15 yaşından yuxarı 1,5 milyard insan siqaret çəkir. Hər il tütünlə bağlı xəstəliklərdən 5,4 milyon insan dünyasını dəyişir. 2030-cu ilə qədər bu rəqəmin 8 milyona çatacağı gözlənilir. Onu da deyək ki, siqaret çəkmə halı kişilər arasında azaldığı halda qadınlar arasında günbəgün artır.

Bir çox insanlar siqareti tərgitməkdən qorxurlar. Mütəxəssislərin fikrincə, bu qorxu ruhi pozuntudur. Psixoloq Nigar Məmmədovanın sözlərinə görə, bəzi qadınlar hesab edirlər ki, siqareti atsalar kökələcəklər: "Siqareti atdıqdan sonra iştah və yuxu qaydasına düşdüyü üçün istənilən adam 2-3 kq çəki alır. Amma bu o qədər böyük bir rəqəm deyil".

Həmsöhbətimizin sözlərinə görə, indiki vaxtda təxminən 200 milyon qadın siqaret çəkməkdədir. Dediyinə görə, tütün istifadəsi, dünyada təzyiqin yüksəlməsindən sonra ikinci ölüm səbəbidir və dünyada ölən hər 10 insandan birinin ölüm səbəbidir. Tütünün bütün formaları asılılıq yaradan və ölümcüldür. Siqaret və digər tütün məhsulları çox müxtəlif xərçəng növlərinə (ağciyər, ağız, qida borusu, qırtlaq, udlaq, mədə xərçəngləri kimi), ürək xəstəliyi, iflic, amfizem, xroniki bronxitə səbəb olur.

Siqaret çəkən qadınlarda gözlənilməyən uşaq düşmələri, doğulmamış körpə ölümləri və sonsuzluq riski artır. Bununla yanaşı siqaret çəkmək qadınlarda erkən klimaksa da səbəb olur. Gün ərzində çəkilən bir qutu siqaret bədəndə oksigen çatışmazlığı yaradır. Bu səbəblə də siqaret çəkən qadınların dərisində erkən qırışlar, çatlar və yaralar əmələ gəlir. Siqaret çəkmək müxtəlif ağız xəstəliklərinə, diş çürüklərinin meydana gəlməsinə və eyni zamanda pis nəfəs qoxusuna da səbəb olur.

Terapevt Məlahət Abbasovanın sözlərinə görə, əmizdirmə dövründə siqaret çəkən qadınlarda hər siqaret çəkimindən sonra bədənə alınan nikotin ana südünə keçir və 5 saata ana südündən körpəyə ötürülür. Evdə siqaret və digər tütün məhsullarını istifadə etmək digər ailə fərdlərinin xüsusilə kiçik uşaqların sağlamlığını da təhlükəyə atmaqdadır.

"Siqaret çəkmək, qadınların görünüş və hisslərini, təbii gözəlliklərini və ruhi sağlamlığını pozur. Araşdırmalara görə, siqaret çəkən qadınlar çəkməyənlərə nisbətən daha depressivdirlər. Siqaret çəkən bir çox adam, siqaretin rahatlaşdırıcı olduğunu düşünür. Və çox zaman narahat qadınlar siqaretə üstünlük verir. Araşdırmalar zamanı məlum olub ki, siqaret insanı stressə salır".