"Bu, aviasiya ictimaiyyətində olmasını istəmədiyimiz çox ağrılı bir qəzadır. Təəssüf ki, 62 sərnişin və 5 ekipaj üzvü olan təyyarədə 38 sərnişin həyatını itirib. Bunun quş sürüsü, yoxsa terror aktı olduğunu şərh etmək hələ tezdir. Çünki hesabatda bunların təfərrüatlı şəkildə üzə çıxmasını gözləmək lazımdır".

Gundemxeber.az "Haber Global"a istinadən xəbər verir ki, bunu İstanbul Esenyurt Universitetinin müəllimi, Nəqliyyat xidmətləri şöbəsinin müdiri, pedaqoq Seda Korkmaz Qazaxıstanda 38 nəfərin həyatını itirdiyi təyyarə qəzasından danışarkən deyib.

"Qəza baş verməzdən əvvəl kabinədə hazırlıq görüldüyü dəqiqdi. Kapitan da artıq qülləyə fövqəladə vəziyyət barədə elan etmişdi. Salonda belə bir vəziyyətdə, fövqəladə vəziyyət elan edildikdə, bütün sərnişinlər oturacaqlarında oturmalı, təhlükəsizlik kəmərlərini bağlamalı və ayaq üstə qalan sərnişin olmamalıdır. Görüntülərə baxdığımızda kabin rəisinin "Zəhmət olmasa, ayağa qalxmayın, kəmərlərinizi bağlayın" bildirişi davam edir. Təhlükəsizlik kəmərlərinin bağlanması, əgər təyyarə həqiqətən tam şəkildə yerə enərsə, sərnişinlərin həyatını xilas edəcək bir addımdır. Əslində, bu, çox kiçik, lakin çox düzgün bir hərəkətdir. Bu səbəbdən bütün sərnişinlərə demək istəyirəm ki, bütün elanları dinləyin və deyilənlərə uyğun hərəkət edin. Bütün sərnişinlər bu şəkildə hərəkət etməlidirlər", - o bildirib.

Korkmaz kabinənin içindəki görüntülərə baxdıqda bəzi oksigen maskası qapaqlarının açıq olduğunu qeyd edib.

"Bu, bizə belə bir siqnal verir: bütün qapaqlar açıq deyil. Dolayısı ilə, bu, kapitanın bütün oksigen maskalarının qapaqlarını açmadığını göstərir. Buradan birdən-birə təzyiqin artmadığını görürük. Beləliklə, ortada başqa bir vəziyyət var. Sərnişinlərin panikaya düşdüyünü də görürük. Lakin ayağa qalxan sərnişin yox idi. Bu, həqiqətən də mühüm addım idi", - Korkmaz əlavə edib.

Mütəxəssis qeyd edib ki, qəza olmasa belə, sərnişinlər ayağa qalxsa, normal gedişdə birdən-birə turbulentlik yarana bilər.

"Bu turbulentlik zamanı sərnişinlərin başları təyyarənin yuxarı hissəsinə və ya yuxarıdakı dolabların yerləşdiyi hissəyə dəyə bilər. Yaxud çox şiddətli turbulentlik halında sərnişinlər təəssüf ki, təyyarənin ön hissəsindən arxaya düşə bilərlər. Bu, həqiqətən də sərnişinin həyatına təhlükə yarada biləcək bir davranışdır. Daha öncəki təyyarə qəzalarına nəzər saldıqda, sağ qalanların əksəriyyətinin oturacaqları ilə birlikdə olduğunu görmüşük", - o bildirib.

Korkmaz Qazaxıstanda baş verən qəzadan sonra təyyarədə hansı oturacağın daha təhlükəsiz olacağı ilə bağlı sualların olduğunu da xatırladıb və deyib:

"Bununla bağlı statistik məlumatlar olmalıdır və araşdırma nəticəsində dəqiq şərh verə bilərik. Amma təbii ki, bizə belə suallar çox gəlir. Ön tərəfdə oturan sərnişinlərin həlak olduğu, arxadakı sərnişinlərin isə sağ qaldığı bildirilir. Amma təyyarənin qəzaya uğraması təyyarədə baş verə biləcək bir vəziyyətdir, məsələn, yanğın baş verir, qanadlarda başlayır. O zaman arxa və orta oturacaqlarda oturan sərnişinlər həyatını itirə bilərlər. Ona görə də, indi belə şərh vermək düzgün deyil", - Korkmaz fikrini yekunlaşdırıb.

Gundemxeber.az