Türkiyənin tanınmış iqtisadçısı və maliyyə mütəxəssisi Ramazan Kurtoğlu, yeni açıqlamaları ilə diqqət çəkib.

Daha əvvəl o, qram qızılın 400 lirə olduğu dövrdə insanlara qızıl almaları üçün efirdən az qala yalvarırdı. Bu çıxışları və bütün maliyyə proqnozları düz çıxan Kurtoğlu, indi də sərmayə qoymaq istəyənlər üçün mühüm çağırışlar edib.

Bu çağırışlar azərbaycanlılar üçün də əhəmiyyət kəsb edir və buna görə Musavat.com ekspertin açıqlamalarından xüsusi xəbər hazırlayıb.



TGRT Haber kanalında yayımlanan "Taksim Meydanı" proqramında çıxış edən iqtisadçı, torpaq və fiziki qızıla sərmayə qoymağın ən etibarlı yol olduğunu vurğulayıb. Onun sözlərinə görə, “Toxuna bilmədiyiniz heç bir şeyə yatırım etməyin”, yəni, toxuna bilmədiyiniz, real olaraq əldə saxlaya bilmədiyiniz investisiyalar risklidir.

Sərmayənin 3 əsas prinsipi: torpaq, iş və fiziki qızıl

Ramazan Kurtoğlu sərmayə yatırmaq üçün ən təhlükəsiz sahələrin üç istiqamətdən ibarət olduğunu bildirib:
1. Torpaq – uzunmüddətli gəlir gətirən və dəyərini itirməyən sərmayə vasitəsidir.
2. Öz işiniz – sahibkarlıq fəaliyyətinə sərmayə qoymaq gələcəkdə daha sabit gəlir mənbəyi yarada bilər.
3. Fiziki qızıl – ən təhlükəsiz investisiya vasitəsi olaraq dəyərini hər zaman qoruyur.

Kurtoğlu həmçinin tarixi sikkələr və köhnə pullarla müqayisə quraraq, məntiqi arqument də ortaya qoyub:
“Əgər Roma, Səlcuqlu və ya Osmanlı dövrünə aid tarixi bir sikkə tapsanız, varlanmaq şansınız yüksəkdir. Amma bir zamanların əfsanəsi olan Alman Markını tapsanız, onun artıq heç bir dəyəri qalmadığını görərsiniz. O, sadəcə kağız parçasına çevrilib və uzağı, tualetdə işinizə yaraya bilər. Ona görə də fiziki olaraq sahib ola bilmədiyiniz sərmayələrə güvənməyin.”

Uzunmüddətli sərmayə strategiyası vacibdir

Dosent doktor Ramazan Kurtoğlu vurğulayıb ki, sərmayə yatırmaq qısa müddətli qazanc əldə etmək üçün deyil, uzunmüddətli dövr üçün nəzərdə tutulmalıdır. “Sərmayə yatırımı 366 gün və daha sonrası üçün nəzərdə tutulmalıdır. Sərmayə qoyan şəxs təkcə bir ili deyil, uzunmüddətli perspektivi də düşünməlidir”, – deyə o bildirib.

Eyni investisiya düsturu Azərbaycan bazarında da keçərlidir

Türkiyədə iqtisadi ekspertlərin tövsiyələri və sərmayə strategiyaları Azərbaycan bazarı üçün də əhəmiyyətlidir. Çünki Azərbaycan və Türkiyə iqtisadiyyatı bir-birinə bənzəyir və eyni investisiya prinsipləri ilə idarə olunur. Azərbaycan bazarında da qızıl ən çox bahalaşan və sərmayəçilərə ən çox qazanc gətirən məhsul və ya investisiya alətidir.

İqtisadçıların fikrincə, sərmayə yatırmaq istəyən azərbaycanlı investorlar da Türkiyədə olduğu kimi, torpaq və fiziki qızıla üstünlük verməlidirlər. Xüsusilə qızılın uzunmüddətli perspektivdə dəyərini daim qoruması, onu ən etibarlı sərmayə vasitəsinə çevirir.

Beləliklə, həm Türkiyədə, həm də Azərbaycanda sərmayə yatırmaq istəyənlər üçün ən güvənli seçim torpaq və fiziki qızıl almaqdır.

Gundemxeber.az