“Oğlumun qətlinin təşkilatçıları başqa adamlardır”

Atatürk Mərkəzində Yeni Azərbaycan Partiyasının (YAP) Humanitar məsələlər komissiyasının 31 mart azərbaycanlılara qarşı soyqırımla bağlı keçirdiyi tədbirdə Milli Məclisin bir qrup deputatı, tarixçi alimlər və YAP Siyasi Şurasının üzvü, kənd təsərrüfatı nazirinin müavini Aslan Aslanov iştirak ediblər.
Tədbirin sonunda Aslan Aslanov jurnalistlərin bir neçə sualını cavablandırıb. O, müsahibəsində hələ Şəmkir rayon İcra Hakimiyyətinin başçısı işləyərkən Azərbaycanda və Gürcüstanda üzləşdiyi sui-qəsd hallarından, OMON dəstələri ilə mübarizəsindən, Gürcüstanda gördüyü işlərdən və son vaxtlar haqqında yazılan yazılardan danışıb.
Həmin müsahibədən bəzi məqamları öz oxucularımıza təqdim edirik:
-Bayaq dediniz ki, 90-cı illərin əvvəllərində ermənilər Gürcüstanda da azərbaycanlılara qarşı soyqırımlar törədəcəkdi, ancaq buna imkan vermədiniz. Mümkünsə bu barədə ətraflı danışardınız.
-Ermənilər 1993-cü ildə Gürcüstanda da azərbaycanlılara qarşı böyük soyqırımlar törədəcəkdi. O vaxt mən Şəmkir rayon İcra Hakimiyyətinin başçısı idim. O dövrdə ermənilər Gürcüstanda Xüsusi Polis Dəstəsinin (OMON) rəisi olmuş Mixi Droni adlı bir şəxslə birgə Dmanisidən başlayaraq azərbaycanlıları çıxarırdılar. Mərhum atam gəlib mənə dedi ki, Şəmkirin Çinarlı kəndinə Gürcüstandan adamlar köçürülür. Mən dərhal bu barədə ulu öndərimiz Heydər Əliyevə məlumat verdim. O vaxt mənim 31 yaşım var idi, ən cavan icra başçısı idim. Ulu öndərin də mənə cavabı o oldu ki, sən durma, elə bu dəqiqə hazırlaşıb yardımlar topla və gedin Dmanisiyə. Mən də qışın o çağında Gürcüstanın Dmanisi rayonuna getdim və gördüm ki, orada azərbaycanlıların hamısı yüklərini yığıb hazırlaşıb və köç başlayır. 1993-cü ildə Gürcüstana getmək çox çətin idi. Marneulidən Bolnisiyə, Bolnisidən isə Dmanisiyə getmək üçün yanında mütləq silahlı dəstə olmalı idi. Çünki o vaxt adamları heç nədən tutub girov götürürdülər, təhqir edirdilər və s. Bütün bunlara görə də mən o vaxt Gürcüstana silahlı dəstə ilə getmişdim. Rəhmətlik Heydər Əliyevin tapşırığı ilə mən ora getdim və 2 böyük yük maşını ilə ərzaq yardımları apardım. Biz Gürcüstana gedəndə oradakı soydaşlarımız bizi görüb çox sevindilər. Hətta o vaxt orada yaşayan azərbaycanlılardan biri Dmanisi rayon başçısının müavinini vurdu və dedi ki, indi gördünüz ki, biz yiyəsiz deyilik, arxamızda Heydər Əliyev var.
İnanın ki, o vaxt əgər biz 2 gün gec getsəydik, Dmanisidən azərbaycanlıların deportasiyası başlanacaqdı. Hətta o vaxt biz ora gedəndə bir hadisə ilə da rastlaşdıq. Deməli, biz gedib gördük ki, Azərbaycan kəndlərinin birində bəy və gəlini toydan oğurlayıb girov götürüblər. Onun qaytarılması üçün oğrular o vaxtı 17 min dollar pul tələb edirdilər. Mən gedib oranın icra başçısı və polis rəisi ilə danışdım, çox çətinliklə də olsa bəy və gəlini geri qaytardıq. Bundan sonra Gürcüstanda olan azərbaycanlılar rahat oldular.
O vaxt özümüzlə ulu öndər Heydər Əliyevin bir şəkilini də aparmışdıq. Gürcüstan azərbaycanlıları həmin şəkili yerə qoymurdular, həmin şəkili öpürdülər, Heydər Əliyevə dua edirdilər.
Daha sonra mən Dmanisidən Azərbaycana qayıdıb baş verənləri Heydər Əliyevə məruzə etdim. Sonralar isə Heydər Əliyev Eduard Şevardnadzeyə zəng edib danışdı. Biz daha sonra qayıdanda gördük ki, Dmanisidə ermənipərəst icra başçısı, polis rəisi və prokuroru vəzifədən çıxarılıb. Biz bir həftədən sonra yenə Dmanisiyə getdik. Geri qaydanda yolda Mixi Droninin qara maskalı adamları bizə silahlı hücum etdilər. Onların sayı çox idi və hamısının da əllərində avtomat silahlar var idi. Mixi Droninin adamları silahlarını mənə tuşlamışdılar. Fikirləri də o idi ki, bizi tutub Ermənistana aparsınlar. Ancaq mən tez xəbər verdim ki, bizim avtomobildəki silahlı adamlarımız gəlsinlər. Bizim silahlı olduğumuzu görən kimi Droninin adamları qorxuya düşdülər və başladılar bizə yaltaqlanmağa.
-Bəs o dövrdə Gürcüstanın sabiq prezidenti Eduard Şevardnadze sizə dəstək vermirdi?
-O dövrdə Eduard Şevardnadzenin vəziyyəti yaxşı deyildi. Onun əleyhinə olan müxalif güclər var idi. Ancaq buna baxmayaraq, Eduard Şevardnadze bizə dəstək verirdi.
-Ola bilərmi ki, mərhum oğlunuz Ruslan Aslanovun qətlinin sifarişçiləri məhz Gürcüstan OMON-çuları olsun?
-Yox, bu ola bilməz. Oğlumun qətlinin təşkilatçıları başqa adamlardır. Onlar indi də yaşayırlar və məndən heyf çıxmaq üçün bunu ediblər. Oğlumun qatilləri mənim həyatıma da 3 dəfə sui-qəsd ediblər. Rəhmətlik Afiyəddin Cəlilov və Şəmsi Rəhimov öldürülən gün, ayın 29-da həmin saatda və həmin dəqiqədə mənə 29 güllə atıldı, sürücüm və mühafizəçim ağır yaralandı, sürücüm bir ildən sonra rəhmətə getdi. O vaxtı mən müdafiə naziri olmuş Məmmədrəfi Məmmədova rəsmi formada müraciət etmişdim ki, mənə mühafizəçi versin. O da mənə 4 nəfər mühafizəçi vermişdi. Bilirsiniz ki, o vaxt Gəncə hadisələrinin qarşısının alınmasında Şəmkir böyük rol oynayırdı. O dövrdə Heydər Əliyevin mənə verdiyi ən ağır, çətin və məsuliyyəti tapşırıqların öhdəsindən gəldim. Həmin oktyabr gecəsi heç kəs Gəncədən OMON-u çıxara bilməzdi, ancaq mən ətrafımda olan dostlarımın sayəsində Gəncədən OMON-u çıxartdım, hökumət binaları azad olundu. O vaxtı mənə bu işdə ətrafımda olan nüfuzlu adamlar kömək etdi. O vaxtı Gəncədə “Banditizm İdarəsi” yeni yaradılmışdı və Mədət Quliyev də “Banditim İdarəsi”nin rəisi idi. Baş verənləri o da təsdiq edə bilər. O dövrdə OMON-un komandiri isə Tahir adlı şəxs idi, o əslən Şəmkirdən idi... Sonradan Tahiri şərlədilər. Mən bütün bu işləri ulu öndər Heydər Əliyevin tapşırığı ilə icra edirdim. Ovaxtkı hadisələrlə bağlı AzTV-də bir kadr yayımlanır, orada ulu öndər Heydər Əliyev deyir ki, mən Gəncə OMON-unun komandiri ilə danışdım. O kadrlarda səsləndirmə düzgün deyilməyib. Əslində həmin gecə ulu öndər Heydər Əliyev Tahirlə Şəmkirdə mənim yanımda telefonla danışıb. Hətta, həmin telefon danışığı zamanı ulu öndər Heydər Əliyev onlara dedi ki, Aslan Aslanov nə deyirsə, onu da edin.
-Sizin vəzifədən çıxarılmağınız mətbuatda birmənalı qarşılanmadı. Haqqınızda yazılanlara münasibətiniz necədir?
-Mən 1992-ci ildən bəri Yeni Azərbaycan Partiyasının Siyasi Şurasının üzvüyəm. Şəmkir zonasında YAP-ın yaradılmasında rəhmətlik atamın rolu böyük olub. Bizim rayondakı evimiz YAP-ın Şəmkir qərargahı olub. Mən ulu öndər Heydər Əliyevin və prezident İlham Əliyevin tapşırıqlarını necə lazımdırsa yerinə yetirmişəm.
Mən kənd təsərrüfatı nazirinin müavini təyin olunanda da şəxsən cənab prezidentlə danışmışam. Bu vəzifəyə gələndən sonra da, gördüyünüz kimi, istehsal hər il artıb. Mən namusla, qeyrətlə xidmət etmişəm. Kənd Təsərrüfatı Nazirliyində öz kurasiyama aid olan işlərin öhdəsindən layiqincə gəlmişəm. Kənd Təsərrüfatı Nazirliyində nazir müavini tək mən olmamışam, orada nazir müavinləri çox olub. Ancaq mən nazir müavini olmağıma baxmayaraq digər nazirlərlə danışıqlar aparıb kurasiyama aid olan bitkiçilik və heyvandarlıqla bağlı məsələləri həll edirdim. Nazirlikdə nə isə problem olanda çox narahat olurdum, çalışırdım ki, həmin problemlər həllini tapsın. Hər zaman kənd təsərrüfatının inkişafı üçün çalışmışam.
O ki qaldı subsidiyaların yeyintisi ilə bağlı yazılanlara, deyə bilərəm ki, Kənd Təsərrüfatı Nazirliyində subsidiyalar mənim kurasiyama aid olmayıb. Subsidiyalar digər müavin İlham Quliyevin səlahiyyətlərinə aid olub.
Cənab prezident məni hamıdan yaxşı tanıyır və mənim barəmdə hansı qərar qəbul edibsə, bu onun səlahiyyətlərinə aid olan məsələdir.
Digər tərəfdən isə kimsə mənim barəmdə prezidentə yalandan nə isə çatdırıbsa, mən həmin adamı şərəfsiz sayıram. Çünki bizim ailəmiz 1964-cü ildən bəri ulu öndər Heydər Əliyevlə tanışdır. Rəhmətlik atam da o vaxtı Heydər Əliyevin vaxtında vəzifədə işləyib. Ona görə də vəzifəsindən asılı olmayaraq kimsə gedib mənim haqqımda cənab prezidentə yalandan məlumat veribsə, o adam şərəfsizdir. Mən bu cür adamları şərəfsiz sayıram. Digər tərəfdən isə cənab prezident heç zaman həmin adamların yalan sözlərinə inanmaz.
-Ümumiyyətlə, nazir müavini vəzifəsindən çıxarılandan sonra prezidentlə hər hansı görüşünüz olub?
-Görüşümüz olmasa da, ancaq mən YAP-ın tədbirlərində fəal iştirak edirəm, mütəmadi olaraq dövlətçiliklə bağlı məqalələrim olur və s. Mənim haqqımda yalandan danışanlara demək istəyirəm ki, məni bütün Azərbaycan tanıyır. Mənim bir əqidəm var... Mən bir insana xidmət etmişəm - Heydər Əliyevə. İndi də onun oğlu cənab İlham Əliyevə.
Səlim