İsgəndər Həmidov:
“Bizim hakimiyyət bu haqda düşünmür, daha çox qazan üçün işləyir”

Suallara sabiq daxili işlər naziri, Millətçi Demokrat Partiyasının Təşkilat Komitəsinin sədri İsgəndər Həmidov cavab verir.

- İsgəndər bəy, son zamanlar belə xəbərlər yayılıb ki, Millətçi Demokrat Partiyasını öz qərargahından çıxarıblar. Bu məlumat doğrudurmu?
- Sizə deyim ki, indiyə qədər bizim cəmi bir dəfə qərargahımız olub. O zaman qərargahımız Kubinkada yerləşirdi. Ancaq iqtidar bizi həmin ofisdən çıxardı. Hakimiyyətin evi az olduğundan qərargahımızı əlimizdən aldılar ki, küçədə qalmasınlar, burada yaşasınlar. Bundan sonra bizim qərargahımız olmayıb. İclaslarımızı müxtəlif yerlərdə təşkil edirik. Daha çox Müsavat Partiyasının qərargahından istifadə edirik.
-Partiya quruculuğu istiqamətində hansı işlər görülür?
- Bildiyiniz kimi bir müddət əvvəl Qurultaya Hazırlıq üzrə Təşkilat Komitəsi yaradılıb. Hazırda Təşkilat Komitəsi fəaliyyətini göstərir, rayonlarda və bölgələrdə görüşlər keçirir. Biz sentiyabr ayında partiyanın qurultayını keçirməyə hazılaşırıq. Amma burada incə bir məqam var. İş ondadır ki, hazırda Rusiya millətçilərin aktivliyini əlində bəhanə edərək başqa ölkələrin ərazisinə müdaxilə edirlər. Bizdə bu amili nəzərə alırıq. Bu mənada mümkündür ki, qurultayın keçiriləcəyi tarixi önə və ya əvvələ çəkə bilərik. Əlbəttə, bu haqda mən özbaşına qərar verə bilmərəm. Bununla bağlı partiyadaşlarımla müzakirə aparıb birgə qərar verəcəyik. Hazırda Rusiya azğınlaşıb və həyasızlaşıb. Krıma açıq müdaxilə etdi, bu ərazini özünə birləşirdi. İndi isə Ukraynanın şərq əyalətlərini qarışdırır, Moldoviyanı sıxışdırmaq məqsədilə Dnestiryanı bölgəni müdafiə edir. Bu arada qeyd edim ki, Qusarın bəzi kəndlərindən Rusiya prezidentinə müəyyən müraciətlər olub. Onlar Rusiya vətəndaşlığına qəbul olunmaq istədiklərini qeyd edib. Biz bu kimi məsələləri görə-görə gəlmişik. Biz bu məsələləri görür və təhlil edirik. Yeri gəlmişkən, biz hakimiyyətə qarşı müxalifətdəyik və onun apardığı siyasətlə də əsla razı deyilik. Amma bu gün BMT-nin iclasında Azərbaycan Ukraynanın ərazi bütövlüyünü dəstəkləyən ölkələrin siyahısında oldu. Mənim baxışım millətçi baxışıdır. Biz istəyirik ki, ilk əvvəl milləti düşünsünlər, sonra isə gəlirləri haqqında düşünsünlər. Bu mənada biz millətimizin maraqlarına uyğun olaraq atılan hər bir addımı dəstəkləyirik. Hesab edirik ki, Azərbaycan hökumətinin BMT-də Ukraynanın torpaq bütövlüyünü müdafiə etməsi çox yaxşı haldı.
- İsgəndər bəy, siz rayonlara gedərək qurultaya hazırlıq işləri ilə məşğul olur, yerlərdə üzvlərinizlə görüşürsünüz. Bəs yerli hakimiyyət orqanları buna maneçilik törətmirlərmi?
- Hazırda mən Zərdabdayam və dediyiniz məsələlərlə bağlı bura gəlmişik. Ancaq biz indiyə qədər problem yaşamırıq. Bunun da səbəbi var. Şəraiti bildiyimizə görə, Lənkarana gedəcəyimizi deyib Zərdaba gəlirik. Hələ ki, problem olmur. Əgər problem yaradılsa bu haqda mətbuata məlumat verəcəyik.
- Hazırda ölkədə mövcud olan durumu necə qiymətləndirirsiniz?
- Azərbaycanda durum varmı ki, ona da qiymət verəsən? Azərbaycanda bir dəstə korrupsiya, rüşvət, qohumbazlığa uyan təbəqə var və millətin var-dövlətini soğan qabığı kimi soyur. Əgər diqqətlə fikir versəniz görərsiniz ki, son zamanlar hakimiyyət daxilində qohumluq əlaqələri də artır. Az qala hər gün məmurların bir-birilə qohum olduğu haqda xəbərlər eşidirik. Bu sanki adama keçmişdə olan sultanlığı, xanlğı xatırladır. Odur ki, Azərbaycanda elə bir vəziyyət yoxdur ki, bu haqda müzakirə aparaq.
- Sizcə, nədən bu vəziyyətə müqavimət edəcək cəmiyyət yoxdur?
- Bu proses yüz minlərlə insanın küçələrə çıxmayacağı günə qədər davam edəcək. Müqavimət olmayan yerdə monopoliya, oliqarxiya, korrupsiya davam edəcək.
- İnsanlar küçələrə niyə çıxmırlar, bəlkə vəziyyət onları qane edir?
- Mən hesab edirəm ki, biz müxalifət olaraq ortaya fərqli fikir, yeni ideologiya qoymalıyıq. Yoxa indi biz seçki öncəsi aktivləşir, seçkidən sonra isə passivləşirik. Əslində aktivləşmə, müqavimət hər gün olmalıdır. Biz də bu amil uğrunda çalışırıq.
- İndi müxalifət böhran yaşayırmı?
- Siz özünüz məndən də yaxşı bilirsiniz ki, bu vəziyyət nə ilə bağlıdır. İndi müxalifət düşərgəsi 2015-ci il Milli Məclis seçkilərinə hazırlaşır. Çoxları inanır ki, seçkilər buna qədər olan seçkilərdən fərqli olacaq. Amma biz bilirik ki, həm quyruq doğan ay var, həm də quyruq qonan ay var. Quyruq doğan ayda it daima qoçun arxasınca gedir ki, onun üzə çıxan ətini yesin. Milyon il keçib, amma it bu artıq əti yeyə bilməyib.
- Demək istəyirsiniz ki, müxaifət düşərgəsi mandate almaq üçün seçkilərə hazırlaşır?
- Yox. Mənə elə gəlir ki, müxalifətin indi zəif olmasına baxmayaraq gələcək seçkilərə hazırlaşması daha çox mandate almaq deyil, ciddi şəkildə seçkiləri udmağa hesablanıb. Həm də seçki udulmasa heç nəyə nail olmaq mümkün deyil. Hətta beş-on nəfərə mandatın verilməsinin mənası yoxdur.
- Sizin Müsavat Partiyasına yaxın olduğunuz, keçmiş üzvünüz Qələndər Muxtarlının isə AXCP-yə yaxın olduğu haqda xəbərlər yayılıb. Bu nə dərəcədə doğrudur?
- Qələndər Muxtarlı bizim partiyanın üzvü olub, bizim qardaşımızdır. Biz onun haqqında hər hansı bir neqativ ifadə işlətməmişik. O zaman da, onun özü elədi və Səfər Hümbətov da onun cavabını verdi. İkincisi, sizə deyim ki, bizim bütün partiyalarla münasibətlərimiz normaldır. Bizi Müsavatı dəstəkləməkdə ittiham edənlər səhv edirlər. Bizim KXCP, AXCP və digər sağlam müxalifətlə yaxşı münasibətlərimiz var. Biz əlbəttə, bütün qüvvələrlə sağlam və paritet əsasda əməkdaşlıq etməyə hazırıq. Ancaq biz heç kəsin arxasınca düşəsi deyilik. Biz millətçiliyik və millətçi ideologiyasına sadiq qalan insanlar və qurumlarla da əməkdaşlıq edəcəyik.
- Müsavatın növbəti başqanı qismində kimi görürsünüz?
- Müsavat Partiyasının məramnaməsinə hörmətlə yanaşıram. Bu partiyanın nizamnaməsinə görə, bir şəxs iki müddətdə başqan seçilə bilər. İsa Qəmbərdə ağıllı siyasətçidir və bu kimi məsələlərə prinsipial yanaşır. Odur ki, Müsavatın qurultayında İsa bəy namizədliyini irəli sürməyəcək. Bununla da partiyanın yeni başqanı seçiləcək. Ancaq mən elə bilirəm ki, İsa Qəmbər siyasətdən getməyəcək, Müsavatın ağsaqqalı və aparıcı şəxsi kimi öz yerində olacaq. İsa Qəmbər bizim dostumuzdur, biz pis-yaxşı son 30 ildə birgə yol keçmişik və keçdiyimiz yola da hörmət qoyuruq. AXCP sədri Əli Kərimli, KXCP sədri Mirmahmud Mirəlioğlu, Pənah Hüseyn və digərləri də mənə bu qədər yaxındır.
- Kim başqan olsa yaxşı olar?
- Mən bilmirəm ki, namizədlər kimlərdir. Amma Müsavat Partiyası böyük təşkilatdır, yüzdən çox yaşı var. Bu partiya açıq və gizli şəkildə siyasi fəaliyyətdə olub. Orada kifayət qədər ağıllı və yetkin siyasətçilər var. Müsavat üzvlərinin seçəcəyi yeni başqana biz hörmətlə yanaşacağıq.
- Hər gün Suriyada azərbaycanlılar öldürülür. Doğurdanmı, yüzlərlə azərbaycanlı vuruşmaq məqsədilə Suriyaya gedib?
- Azərbaycanda bir dini boşluq var və hazırda bu boşluğu hansısa məzhəblər doldurur. Bu səbəbdəndir ki, Azərbaycana çoxlu sayda dini cərəyanların axını var. Vəhhabilər, nurçular və digərləri fəaliyyət göstərir. Əvvəl ölkədə ancaq şiələr və sünnülər var idi. Son zamanlar yaranan dini cərəyanların bir dəstəsi İran, bir qrupu Səudiyyə Ərəbistanı, bir dəstəsi Pensilvaniyada otran hoca əfəndi tərəfindən maliyyələşir. Komanda gələndə isə bu təriqətlərə bağlı insanlar vuruşmaq məqsədilə Suriyaya gedirlər. Ancaq mən gedib Suriyada vuruşmağın qəti əleyhinəyəm. Bizim vuruşmağa da, şəhid olmağa da yerimiz var. Bizim Qarabağımız düşmən əlindədir. Bunu qoyub gedib Suriyada dini müharibədə iştirak etmək heç doğru deyil.
- İsgəndər bəy, dünən Kəlbəcərin erməni silahlı qüvvələri tərəfindən işğalından 21 il ötür. Bu günü necə qarşılayırsınız?
- Mənim həyatımda çox ağır günlər olub. Amma ən ağır günüm Kəlbəcərin işğalıdır. Kəlbəcər strateji mövqeyə malik idi. Üstəlik Kəlbəcərin yerüstü və yeraltı sərvətləri kifayət edirdi ki, Azərbaycanımızın yarısı xoşbəxt yaşasın. Kəlbəcərin işğalından sonra mənim içimdə bir sarsıntı yaranıb. Hesab edirəm ki, Kəlbəcərin işğalı mənim həyatımda namusuma vurulan ən böyük ləkədir.
- Kəlbəcər işğal edildikdən sonra siz ora getmisinizmi?
- Mən həbsdən çıxdıqdan sonra Kəlbəcərə üç dəfə getmişəm. Haçan istəsəniz kasetləri baxmaq üçün sizə təqdim edə bilərəm. Amma təəssüflə deyim ki, biz Kəlbəcərə məxfi şəkildə gedib-gəlmişik.
- Demək Kəlbəcər işğalda olsa belə ora gedib-gəlmək mümkündür?
- Əlbəttə mümkündür. Mən 200 nəfər əsgərlə gedib Kəlbəcəri götürə bilərəm. Amma bundan sonra arxadan bizə kömək gəlməlidir. Qeyd edim ki, Kəlbəcərdə erməni yoxdur. Sadəcə olaraq bir neçə erməni orada araq içib yatırlar. Hesab edirəm ki, Kəlbəcəri işğaldan azad etmək bir günün işidir. Ancaq rayonu götürdükdən sonra arxadan kömək hökmən olmalıdır. Çünki, rayonun Ermənistanla böyük sərhəddi var. Rayon Ağdara, Göyçə və Sisiyan tərəfindən ermənilərlə sərhəddir. Odur ki, 200 nəfərlə rayonu götürüb saxlamaq mümkün deyil. Amma arxadan dəstək gəlsə bunu həll edə bilərik. Ancaq bizim hakimiyyət bu haqda düşünmür, daha çox qazan üçün işləyir.
- Kəlbəcər dağlıq rayon idi, sakinləri uzun ömürlü hesab olunurdu. Bu gün rayonun işğalı kəlbəcərlilər üçün hansı problemlər yaradır?
- Kəlbəcərlilər üçün Kəlbəcər bir namus məsələsidir. Əslində bu hər bir azərbaycanlı üçün bu qeyrət davasıdır. Kəlbəcəri görən adam heç İsveçirədə belə yaşaya bilmir. Kəlbəcər Allahın yaratdığı bir möcüzə idi. İndi mən kəlbəcərlilərlə söhbət edirəm, deyirlər ki, artıq təpəyə dağ, qara suya bulaq deyirik. Amma Kəlbəcər başdan-ayağa dağlar və soyuq bulaqlardan ibarət idi. Mən əlbəttə, Bakıda və rayonda doğulan kəlbəcərliləri nəzərdə tutmuram. Beş yaşına qədər Kəlbəcərdə yaşayan insanın ürəyindən Kəlbəcər dağlarını silinə bilməz. Çünki, Kəlbəcərdə bütün iqlimlər və gözəlliklər mövcud idi. Hazırda kəlbəcərlilərin yaşam həyatına gəldikdə deyim ki, 36 rayonda kəlbəcərlilərin məzarlığı var. Əvvəl insanlarımız Kəlbəcərdə 80-90 il yaşayırdı. İndi eşidirsən ki, bəs 35-40 yaşında cavan insanlar rəhmətə gedib. Özü də, birinin 40 mərasimi çıxmamış bir başqasının vəfatı haqda informasiya alırsan. 36 rayonda qəbiristanlığı olan kəlbəcərlilər necə Kəlbəcər həsrəti çəkməyə bilər? Bu əsla mümkün deyil. Bu dəhşətdir. Dünyada ən ağır şey vətənsiz yaşamaqdır. Biz böyük Azərbaycanda özümüzü qərib kimi hiss edirik. Bu təkcə kəlbəcərlilərə deyil, zəngilanlılara, qubadlılara, şuşalılara, ağdamlılara, laçınlılara və digər işğal olunan rayonlarımızın sakinlərinə aiddir.
HÜSEYN ABBASOĞLU