Həbs olunan hüquq müdafiəçisinin ailəsi prezidentə və birinci xanıma müraciət etdi

Salyan Rayon Məhkəməsi tərəfindən dünən barəsində 3 aylıq həbs qərarı çıxarılan “Demokratiyaya Yardım” İctimai Birliyinin sədri, hüquq müdafiəçisi Emil Məmmədovun ailəsi prezident İlham Əliyevə və birinci xanım Mehriban Əliyevaya müraciət edib.
Ailəsi hüquq müdafiəçisinin həbs olunmasında Salyan Rayon İcra Hakimiyyətinin baççısı Tahir Kərimovu günahlandırır.
Emil Məmmədovun həyat yoldaşı Sənubər Məmmədova əmindir ki, ərinin həbsi konkret olaraq icra başçısının sifarişi ilə həyata keçirilib. O, baş verənlərlə bağlı virtualaz.org saytının suallarını cavablandırıb.
-Emil bəyin həbsinin arxasında Tahir Kərimovun dayandığını deyirsiniz. Onların arasında narazılığa səbəb nədir?
-Emil bəy Salyanda baş verən qanunsuzluqlardan, iş adamlarının sıxışdırılmasından, büdcə vəsaitinin mənimsənilməsindən ölkə başçısı İlham Əliyevə, Baş Prokurorluğa, Daxili İşlər Nazirliyinə, Korrupsiyaya Qarşı Mübarizə Baş İdarəsinə müraciət etmişdi. Orada Salyan Rayon İcra Hakimiyyətinin başçısı Tahir Kərimov haqqında da yazılıb. Bilirsiniz, Emil ölkə başçısına çox inanır, ondan daim yardım gözləyir. Emil bəy ölkə başçısına müraciətində bildirmişdi ki, Tahir Kərimov prezidentin inamını doğrultmadı. Salyanda baş verən bütün qanunsuzluqlar icra başçısının himayədarlığı ilə edilir. Bu müraciətlər də Tahir Kərimovun qəzəbinə səbəb oldu. Həyat yoldaşımı prezident İlham Əliyevə müraciət etdiyi üçün tutdular.
Daha bir məsələ isə iş adamı İlqar Əliyevlə bağlı oldu. Uzun illərdir büdcə təşkilatlarına çörək alınması ilə məşğul olan İlqarın əlindən bu sahə alınırdı. Salyan rayon maliyyə şöbəsinin əli ilə tenderdə başqa birini qalib etdilər. İlqar Əliyev isə hüquqlarının müdafiəsi üçün Emilə müraciət etmişdi. Emil onu həm hüquqları pozulmuş sahibkar, həm də bir dostu kimi müdafiə edirdi.

-Həyat yoldaşınızın bunlara görə həbs olunacağını gözləyirdiniz?
-Keçən ilin dekabrında “Demokratiyaya Yardım” İctimai Birliyinə Tofiq Qasımov adında bir nəfər müraciət etdi. O, Emilə bildirmişdi ki, bu təşkilatla çox maraqlanıb, haqqı müdafiə etdiklərinə inanır. Emil də Tofiqi üzvlüyə qəbul etdi. Amma Tofiq Emilə heç bir işdə kömək etməyib. Mən hərdən Emildən soruşurdum ki, bəlkə Tofiq öyrədilmiş adamdır. Amma o, buna inanmırdı. Qeyd edim ki, Salyanda daha bir təşkilat, regional mərkəz var. Onun rəhbəri Elçin Əzizov və rayon kommunikasiya qovşağının sədri Faiq Nəcəfov icra başçısının himayəsi ilə Salyanda reketlik edirlər. Elçin Əzizov Tofiq Qasımovun qohumu haqqında tənqidi yazı yazmışdı. Tofiq buna görə Elçin Əzizovla mübahisə edib. Elçin Əzizovun oğlu da Tofiqi döyüb. Buna görə Tofiqi xuliqanlıq maddəsi ilə 10 sutka həbs etdilər. Sonradan Tofiqə qarşı irəli sürülən ittiham dəyişdi və Emilin həbs olunması üçün ondan istifadə etdilər.
-Tofiq Qasımov Emil Məmmədovun üzünə durdu?
-Tahir Kərimov haradansa eşidib ki, Tofiq Emilin təşkilatının üzvüdür. Elçin Əzizovun üzərində cinayət işi olan oğlu azadlığa çıxdı. Tofiq isə Emilin üzünə dayandı. Hətta Emilə deyib ki, bağışla, mənə çox təzyiq edirlər, ona görə də sənin üzünə dayanacam. Emil deyib ki, sən namaz qılırsan, Allah qarşısında necə cavab verəcəksən. Deyib ki, artıq namazı dayandırmışam. Tofiq guya ki, Emilin tapşırığı ilə idarə və təşkilatlardan pul aldığını deyib. Salyan Rayon Polis Şöbəsində Tofiqə təzyiq edilib. Onun yaxınları da qorxdular. Eşitdiyimə görə, Tofiqin qohumları Tahir Kərimovun qəbulunda olublar. İcra başçısı da onlara deyib ki, Emili tutandan sonra Tofiqi buraxdıracam. Tofiqin yaxınları Emilin tutduğu vəkildən imtina etdilər. Bir günün içində bütün idarə rəhbərlərini tökdülər ora ki, Tofiq Qasımov Emilin tapşırığı ilə bizi şantaj edib. Tofiq Bakıya köçürüləndən sonra qohumlarına sifariş göndərib ki, məni Salyanda döydülər, mənə vəkil tutun.
-Emil bəyə qarşı Cinayət Məcəlləsinin hansı maddələri ilə ittiham irəli sürülüb?
-Məhkəmə keçirildi. Təsəvvür edin, ətrafı elə mühasirəyə almışdılar ki, kimsə içəri keçə bilməsin. Salyanda hamı Emili çox istəyir. Məhkəmə qapalı oldu. Məhkəmənin qərarında göstərilir ki, “Demokratiyaya Yardım” İctimai Birliyinin sədri Emil Məmmədov ötən il dekabrın əvvəllərində Salyan telekommunikasiya qovşağının rəhbəri Faiq Nəcəfova yaxınlaşaraq ondan hər ay 200 manat verməsini tələb edib. Bundan başqa, guya maliyyə idarəsinə gedərək büdcə təşkilatlarına çörək alınması ilə bağlı tenderin İlqar Əliyevə verilməsini tələb edib. Guya ki, internetdə rüsvayedici məlumatlar yayacağı ilə qorxudaraq maliyyə idarəsinin rəisindən ayda 200 manat verməsini istəyib. İttihamnamədə bir neçə idarə və təşkilatların adı çəkilir. Deyim ki, Emil polis şöbəsinə çağırılarkən dindirilmə üçün getmişdi, amma orada onu həbs etdilər. Emilə qarşı Cinayət Məcəlləsinin 182.2.2 və 32, 182.2.2-ci maddələri ilə ittiham irəli sürülüb. Oun barəsində 3 ay azadlıqdan məhrumetmə qərarı çıxarıldı. Emil hazırda Kürdəxanı həbsxanasında saxlanılır. Onun vəkillə görüşməsinə imkan yaradılmır.
-Emil bəyin həbsindən sonra hansısa hüquq müdafiəçisi sizə müraciət edibmi?
-Yalnız Eynulla Fətullayev və Mirvari Qəhrəmanlı bizimlə maraqlanıb. Ombudsman Elmira Süleymanova mənimlə danışdı. Elmira xanım Tahir Kərimovla da danışıb. Amma Tahir Kərimov ombudsmanın sözünə əməl etməyib. Ombudsman Aparatının Emilin günahsız olduğuna dair bizə ünvanladığı məktub 2 gün gecikdirilib, məktub bizə onu həbs edəndən sonra çatıb. Dünən Emilin müdafiəsi ilə bağlı 10-a yaxın adam Salyan Rayon İcra Hakimiyyətində başçının müavini Etibar Hüseynovun qəbulunda olub. Etibar Hüseynov deyib ki, Emil ABŞ səfirliyi ilə iş görür, Amerikanın dostudur, agentdir. İcra başçısının müavini Azərbaycanla Amerikanın düşmən olduğunu deyib. Hətta Tahir Kərimov da dəfələrlə Amerikanı düşmən adlandırıb və Emili düşmənə işləməkdə suçlayıb. Dünən səfirliklərdən birinin nümayəndəsi Emilin məhkəməsində iştirak etmək istəyirdi, amma məhkəmə tələm-tələsik oldu. Emilin fəaliyyətində siyasi heç nə olmayıb, o, ömür boyu siyasətə qarışmayıb.
-Evinizdə axtarış aparılıbmı?
-Yox, bizim evimizdə axtarış olmayıb. Amma biz ailəmizin adından ölkə başçısı İlham Əliyevə, birinci xanım Mehriban Əliyevaya müraciət edirik. Emil ölkəmizin prezidentinə çox inanır. Biz də yalnız ona güvənirik. Salyandan olan deputat Əlağa Hüseynov, Salyandan olan iş adamları Tahir Kərimovla bacara bilmirlər. Hamısı deyirlər ki, biz onunla bacarmırıq. Bizim öhdəmizdə 3 uşaq, qoca ana, ruhi xəstə olan baldızım və himayəyə götürdüyümüz azyaşlı var. Bu ailə yalnız və yalnız İlham Əliyevdən kömək gözləyir.

* * *

S.Məmmədovanın müsahibəsində dediklərinə inanmamaq çətindir. Axı fakt budur ki, Emil Məmmədov ictimai fəaliyyətlə təzəcə məşğul olmağa başlamayıb. Onun bu fəaliyyətinə də heç vaxt irad, illah da fırıldaqçılıq, dələduzluq, reketliklə bağlı şikayət olmayıb. Bəs necə olur ki, hüquq müdafiəçisi birdən-birə dönüb dələduz və rüşvətxor olur?
Görünür, məsələ doğrudan da hüquq müdafiəçisinin prezidentə ünvanlanan və “Salyan çarı”nın və ətrafının əməllərini açıb göstərən həmin o məktubundadır. Yeri gəlmişkən, həmin açıq məktub virtualaz.org saytında da dərc edilmişdi. Bundan dərhal sonra rayon rəhbərliyi qanunsuzluqlarla barışmayaraq birbaşa dövlət başçısına müraciət etmiş bu adamı hədəfə almağa və şərləməyə başladı.
İndi ortada dayanan ən əsas sual budur: icra başçıları doğrudanmı o qədər geniş və qeyri-məhdud səlahiyyətlərə malikdirlər ki, hətta hüquq müdafiəçilərinin də həbsini sifariş edə bilirlər?
Buna inanmaq istəməzdik. Ümid edirik ki, müvafiq dövlət orqanları bu qalmaqallı olayı diqqətlə izləyəcək və ədalətin bərpa olunmasına çalışacaqlar. Bir hüquq müdafiəçisinin, bir vətəndaşın öz dövlətinin başçısına açıq məktubla müraciət etməsindən sonra həbs edilməsi hər halda nonsensdir.

Ülviyyə
Fotolar Vüsalə Abdullayevanındır