Əhməd İmamquliyev: “İndi Gürcüstanda əsas ana müxalifət bizim partiyadır”

Gürcüstanda azərbaycanlıların təhsili, problemləri, məşğuliyyəti, gürcü cəmiyyətinə inteqrasiyası, siyasi proseslərdə iştirakçılığı və digər məsələlərlə bağlı bu ölkədə yaşayan ictimai-siyasi xadim Əhməd İmamquliyevlə müsahibəni təqdim edirik.

-Əhməd bəy, Gürcüstanda yaşayan soydaşlarımızın durumu, problemləri öz həllini tapırmı?

- Gürcüstanda yaşayan azərbaycanlıların problemləri çoxdur. Mənim fikrimcə, ilk ciddi problem gənclərlə bağlıdır. Məsələn, azərbaycanlılarım sıx məskunlaşdığı Marneuli rayonunda gənclər nə icra hakimiyyətində, nə də digər dövlət strukturlarında işləyir. Əvvəl deyirdilər ki, gürcü dilini bilmədikləri üçün gənclərimizi işə götürmürlər. Ancaq indi çoxlu sayda gənclər var ki, gürcü dilini dərindən bilirlər, universitetlərdə təhsil alıblar. Onlar icra hakimiyyətində və digər qurumlarda işləyə bilərlər. Amma çox təəssüflər olsun ki, bu gün də iş problemi mövcuddur. Marneulidə rayon sakinləri olan və dövlət qurumlarında işləyən şəxslərin sayı azdır.

İkincisi, Kvemo-Kartli deyilən ərazidə azərbaycanlılar sıx yaşayırlar və onlar əsasən əkinçiliklə məşğul olurlar. Hakimiyyət tərəfindən onlara lazımı qədər dəstək olmur ki, kənd təsərrüfatı məhsullarını daha keyfiyyətli yetişdirsinlər. Bu insanlara su, daha sonra bazar lazımdır. “Gürcü Arzusu” hakimiyyətə gəlməzdən əvvəl vəd vermişdi ki, kənd təsərrüfatı sahəsində işləyənlərə aşağı faizlə kreditlər veriləcək. Amma mən bildiyim qədər Kvemo-kartlidə insanlar belə kreditlər və dövlət dəstəyindən istifadə edə bilməyib.

Üçüncüsü, əhalinin əsas problemi işsizlikdir. Düzdür, bu problem ümumi Gürcüstanın problemidir. Amma eyni zamanda deyərdim ki, xüsusilə bizim regionda işsizlik problemi tüğyan edir. Dövlət tərəfindən bizim gənclərə dəstək yoxdur. Baxmayaraq bizdə yetərincə savadlı gənclər var və onlar müxtəlif yerlərdə işləyə bilərlər. Nə dövlət, nədə şəxsi biznesdə bizim gənclər işləmir. Baxın, Marneuli icra qurumlarında, banklarda və özəl biznesdə əsasən Tiflisdən və Rustavidən gələn gürcülər işləyirlər. Ancaq hansı ki, bu işlərdə elə bizim gənc kadrlarımız da işləyə bilər.

- Gürcüstanda azərbaycanlıların ilkin təhsil bazası, məktəblərdə tədris prosesi nə cür aparılır?

- Hesab edirəm ki, ən ciddi problemlərdən biri təhsil məsələsidir. Bu mənim şəxsi fikrimdir. İlk öncə deyim ki, bizim məktəblərimizə dövlət tərəfindən ciddi nəzarət yoxdur. Milli azlıqlar yaşayan regionlarda təhsil sistemində ciddi zəiflik var. Bu nə ilə bağlıdır? Təhsil sistemində gəncləşmə, yeni nəfəs, müəllimlərin sayında xüsusi artım yoxdur. Bəzən baxırsan ki, hansısa dövlət məmurunun oğlu, məktəb direktorunun qohumu heç bir pedaqoji təhsili olmadan, ali savadı ona məktəbdə tədris işləri aparmağa imkan verməsə belə, məktəblərdə müəllim olaraq işlə başlayır. Yəni belə hallar olur. Şübhəsiz ki, bu kimi hallar bizim övladlarımızın, gənclərimizin və gələcəyimizin qarşısını almaq yoludur. Hansı ki, mən Əhməd İmamquliyev olaraq bu məqamı ciddi problem kimi görürəm. Hesab edirəm ki, bu bizim gələcəkdə Gürcüstan dövlətinə inteqrasiyanın qarşısını alan addımdır.

- Hazırda azərbaycanlıların gürcü cəmiyyətinə inteqrasiyası prosesi necə gedir?

- İndi Gürcüstanda hakimiyyətdə olan qüvvə müxalifətdə olduğu zaman bəyan edirdi ki, inteqrasiya prosesi ilə bağlı ciddi işlər aparacaq. Ancaq indiyə qədər biz bunu görməmişik. Hər şey atalar misalında olduğu kimi köhnə hamam, köhnə tasdır. Heç bir məktəbdə, azərbaycanlıların kompakt yaşadığı ərazilərdə yenilik olmadı. Hətta gürcü dilini oxuyan gənclərimizə bir dəstək vermədilər.

- Vahid Milli Hərəkat Partiyasında parçalanma varmı?

- Bəli, parçalanma baş verib. Həqiqətən də Vahid Milli Hərəkat Partiyası iki yerə bölündü. 27 deputatdan 21 nəfəri bizim komanda da yer aldı, 5 deputat Saakaşvilinin partiyasında qaldı, 1 deputat Azər Süleymanov isə hələlik qərarını qətiləşdirməyib. Mən özüm də Saakaşvilinin yanında deyiləm, artıq yeni yaradılan Avropalı Gürcüstan Partiyasına daxil olmuşam.

- Parçalanmaya səbəb nə oldu?

- Səbəb 2016-cı il parlament seçkilərindən sonra yaranan durum olub. Daha doğrusu səbəb seçkidən sonra bizimlə indi Vahid Milli Hərəkat Partiyasında qalan insanlar arasında fikir ayrılıqları oldu. Biz parlament seçkilərindən sonra Saakaşvilinin düşüncələrinə zidd düşüncələr ortaya qoyduq, öz fikirlərimizi irəli sürməyə başladıq, alternativ yanaşmalarımız oldu. Saakaşvili bildirdi ki, 27 deputat parlamenti boykot etsin və partiya II tur parlament seçkilərinə qatılmasın. Biz isə Siyasi Şuranın verdiyi qərarla parlamentdə iştirak etdik və II tur seçkilərinə qatıldıq. Saakaşvili də bundan əsəbləşdi. Üstəlik onun tərəfdarları partiya daxilində parlamentə gedən deputatlara müxalif oldu, onları satqın adlandırmağa başladı. Biz də düşünürük ki, demokratiyada fikir ayrılığı olmalıdır. Odur ki, partiyadan ayrıldıq. Bunun səbəbkarı isə elə Saakaşvilinin özü oldu. Çünki cənab Saakaşvili onun qatı tərəfdarı olan və bizləri satqın adlandıran şəxsləri sakitləşdirmədi. Əksinə, onlara əsas verdi ki, bizimlə bağlı əsassız və artıq söhbət etsinlər. Son nəticədə də parçalanma baş verdi.

- Gürcüstanda Saakaşvilinin güclü elektoratı var. Bəs bu elektorat sizi müdafiə edəcəkmi?

- Mən deyə bilmərəm ki, Vahid Milli Hərəkat Partiyasının elektoratında necə faizi onları, neçə faizi isə bizi dəstəkləyəcək. Ancaq dəqiq deyərdim ki, Saakaşvilinin yanında olan şəxslər parçalanmadan əvvəl deyirdilər ki, Saakaşvilisiz biz sıfırıq. Biz də deyirdik ki, əvəzedilməz insan yoxdur. Üstəlik siyasi vəziyyətdə elektoratı yerli liderlər istiqamətləndirə bilir. Saakaşvili 2013-cü ildən sonra Gürcüstanda yoxdur. Mən Marenuilidə apardığım seçki kampaniyası təcrübəsini nəzərə alaraq deyə bilərəm ki, burada yerli əhali və seçicilərlə ünsiyyəti quran Saakaşvili deyil, mən idim. Bu baxımdan hesab edirəm ki, seçicilərin hansı tərəfə səs verəcəyi daha çox yerli liderlərdən asılıdır. Mən onu deyə bilərəm ki, Marenulidə elektoratın çoxu mənim tərəfimdədir.

- Vahid Milli Hərəkat Partiyasında olan digər azərbaycanlı deputat Azər Süleymanovla bu haqda müzakirələriniz olubmu, onun son qərarı necə olacaq?

- Mən sizə deyim ki, bu mövzuda Azər Süleymanovla cəmi bir dəfə söhbətimiz olub. Oturub onunla fikir mübadiləsi apardıq, məsələləri müzakirə etdik. Süleymanov seçkilərdən sonra parlamentdə iştirak etməyin tərəfdarlarından biri idi. Ancaq çox təəssüflər olsun ki, Azər Süleymanov açıq formada hansı tərəfi seçdiyini bizə bildirmədi. İnşallah, yanvarın 16-na qədər Azər Süleymanov qəti qərarını müəyyən edəcək. Mən onun yerinə cavab verə bilmərəm. Onu da qeyd edim ki, hazırda Vahid Milli Hərəkat Partiyasında qalan 5 deputat deyir ki, Azər Süleymanov onların yanında yer alacaq və onlar buna əsasən parlamentdə fraksiya quracaq. Bildiyiniz kimi Gürcüstan parlamentində fraksiya qurmaq üçün azı altı deputat olmalıdır.

- İndi Gürcüstanda əsas müxalifət partiyası kimdir?

- Artıq bu gün Gürcüstanda ana müxalifət partiyası Avropalı Gürcüstan Partiyası hesab oluna bilər. Çünki deputat sayının çoxluğu əsasən bizim yeni elan etdiyimiz partiyanın üzvləridir. Başqa sözlə, indi Gürcüstanda müxalifət partiyaları içərisində ən çox saya malik olan partiya bizim partiya hesab olunur. Parlamentdə hakim partiyadan sonra ən çox deputat bizimdir. Bu baxımdan indi ana müxalifət partiyası da Avropalı Gürcüstandır.

Onu da qeyd edim ki, parlament deputatlarından savayı Gürcüstanın siyasi elitasına mənsub olan şəxslərin çoxu da bizim tərəfimizdədir.

- Partiya quruculuğu prosesinə nə zaman start verəsdiniz?

- Təbii ki, partiya quruculuğuna başlanılacaq. Yaxın günlərdə partiyanın qurultayı keçiriləcək. Biz bir həftəyə yaxındır ki, bu siyasi dəyişikliklə bağlı işlərimizi aparırıq. Partiyanın özünün ofisi qurulacaq. Bundan sonra çalışılacaq ki, tez bir zamanda qurultayımız keçirilsin, təşkilatlanma işləri aparılsın. Çünki 2017-ci ildə Gürcüstanın yerli özünüidarə orqanlarına seçkilər keçiriləcək. Biz bu seçkilərə qatılmaq niyyətimiz var.

Onu da qeyd edim ki, Saakaşvilinin indiki komandası ilə bizim fikir ayrılığımız həm də bələdiyyə seçkiləri ilə bağlı idi. Saakaşvili deyirdi ki, partiya yerli özünüidarə etmə orqanlarına keçiriləcək seçkilərdə iştirakçılıq olmasın. Biz isə deyirdik ki, “Gürcü Arzusu” Partiyasını demokratik seçkilər vasitəsilə əvəz edə bilərik. Bunun üçün də, bütün seçkilərdə iştirak etmək və xalqla dərindən işləmək lazımdır.

- Elan etdiyiniz yeni partiyanın sədri kim olacaq?

- Mənim düşüncəmə əsasən və bu çoxluğun da fikridir ki, partiyamızın sədri David Bakradze olsun. O da, bizim komandanın üzvüdür. Böyük ehtimalla yeni partiyanın sədri o seçiləcək. Amma onu da, qeyd edim ki, bu məsələ üzərində işləmək mümkündür. Çünki siyasi elitanın üzvlərinin çoxluğu bizim tərəfdədir. Şübhəsiz ki, biz demokratik və şəffaf seçkilərlə partiyanın sədrini seçəcəyik.

HÜSEYN ABBASOĞLU

gundemxeber.az