Azərbaycan Xarici İşlər Nazirliyi (XİN) Amerikanın sanksiya qərarından sonra Türkiyə iqtisadiyyatı və maliyyə bazarında baş verən proseslərə münasibət bildirib.

XİN-nin Mətbuat Xidmətinin rəhbəri Hikmət Hacıyev bildirib ki, Azərbaycan və Türkiyə arasında bütün sahələrdə strateji müttəfiqlik gündən-günə güclənir.

“Azərbaycan Türkiyə ilə iqtisadi münasibətlərinə də xüsusi önəm verir və bu əlaqələrin inkişafına qarşılıqlı sərmayə qoyuluşları, ikitərəfli ticarət, regional və qlobal əhəmiyyətli enerji və nəqliyyat layihələrində iştirakla öz töhfəsini verməkdədir. Ölkəmiz, Türkiyənin iqtisadiyyatına sərmayə qoyuluşlarının davamı ilə yanaşı Türkiyə iqtisadiyyatında yaxından iştirakını davamlı olaraq artırmaqdadır.

Azərbaycan Türkiyənin öz növbəsində son illər həyata keçirdiyi meqa layihələrin yaxın zamanlarda Türkiyənin və regionun iqtisadiyyatı və təhlükəsizliyinə əlavə imkanlar təmin edəcəyini hesab edir və sarsılmaz Türkiyə iqtisadiyyatının gələcəyinə tam əmindir.

Azərbaycan hər zaman olduğu kimi bütün sahələrdə qardaş Türkiyə xalqı və dövlətinə hərtərəfli dəstəyini davam etdirəcəkdir”, Hacıyev qeyd edib.

Bununla yanaşı, Hacıyev Türkiyə iqtisadiyyatında və maliyyə bazarında baş verənlərin Azərbaycanın Türkiyədəki investisiyalarına hansı təsirlər etdiyindən və bu investisyaların gələcək taleyinin necə olacağı barədə danışmayıb.