“Məni yeganə övladımla sındıra bilməyənlərin dəmirlə, daşla, betonla sındıracaqlarını düşündüyünə heyranam!”
Milli Şuranın Beynəlxalq komissiyasının sədri, keçmiş millət vəkili Gültəkin Hacıbəyliyə qarşı təzyiqlər gündəmin aktual məsələlərindəndir. Hakimiyyət əvvəlcə keçmiş millət vəkilini övladı ilə sınağa çəkdi, lakin, bu addımın effekt vermədiyini görüb, onun əmlakına əl qoymağa başladı. Bəs Gültəkin xanım özü baş verənlər barədə nə düşünür? “Azadlıq” keçmiş millət vəkilinin hakimiyyətin təzyiqləri ilə bağlı fikirlərini təqdim edir:

- Bilmirsən bu hakimiyyətin vəziyyətinə güləsən, ya ağlayasan. Bu qədər resurslarla savadlı şəkildə kampaniya aparmağı da bacarmırlar. Özləri öz yalanlarında itib-batır. Azərbaycan hakimiyyəti mənə qarşı mübarizədə Mahmud Mehdiyev adlı birisini və ailəsini özünə alət seçib. Və təəssüf ki, bunu özünə, yaraşdırıb. Bu adam əvvəl mənim uşağı ona vermədiyimi dedi. Məlum oldu ki, işin icraatında olduğu Səbail rayon İcra Şöbəsinə qətnamə qəbul olunduğu vaxtdan keçən 7 il ərzində bir dəfə də olsun görüş üçün müraciət etməyib. Bu yalanı ifşa olundu. Mənim təzyiqim nəticəsində Respublika Prokurorluğundakı işindən xaric edildiyini yazdı, Respublika Prokurorluğunun mətbuat xidməti təkzib verdi, bu yalanı da ifşa olundu. Mənim qardaşı Seymur Mehdiyevi Vergilər Nazirliyindəki işindən çıxartdığımı yazdı, Vergilər Nazirliyi bunu dezinformasiya adlandırdı, bu yalanı da ifşa olundu. Bacısı Aynur Mehdiyevanın Azərbaycan Dillər Universitetindən mənim göstərişimlə işdən qovulduğunu yazdı, ADU-nun mətbuat xidməti bu məlumatın da əsassız olduğunu bildirməklə bu yalanını da ifşa etdi. Adam təkcə mənə böhtan atmır, Ədliyyə sistemini, Baş Prokuroru, Vergilər nazirini və ADU rektorunu vəzifə cinayətlərində ittiham edir və hər dəfə də ifşa olunur.

- Gültəkin xanım, əmlakınıza həbs qoyulması məsələsi barədə nə deyə bilərsiniz? Mahmud Mehdiyev bu məsələdə nə dərəcə haqlıdır?

- Mehdiyev Mahmud məni korrupsiyada, büdcə vəsaitlərini mənimsəməkdə ittiham etdiyi bir vaxtda anası Məmmədova Nəhayət Vəli qızı məhkəməyə ərizə verir ki, maddi imkanım olmadığı üçün ondan on il əvvəl 50 min borc almışam. Ana-balanın yalanlarını savadlı şəkildə koordinasiya etmirlər ki, belə gülünc duruma düşməsinlər: mən korrupsioner olmuşam, büdcəni talamışam, ancaq maddi imkanım olmadığı üçün ondan borc almışam və adam borcunu 10 ildən sonra, mən Milli Şura üzvü olandan sonra yadına salıb.

- Bu barədə məhkəmənin qərardadı var. Məhkəmə bu qədər açıq şəkildə qanunsuzluğa niyə getsin ki?

- Uşaqla bağlı biabırçı qərardan sonra bu məsələ ictimai nəzarətdədir. 50 minlik iddia o qədər absurddur ki, bu absurda don geyindirmək belə çətindir. Borc müqavilələri mütləq notarial qaydada bağlanmalıdır. Belə bir müqavilə təbii ki, yoxdur. Iddia müddəti 3 il olan işə məhkəmə 10 ildən sonra, özü də müqavilə, əsas olmadan necə baxa bilər? Görünür bunu anladıqları üçün məhkəmə qərarını ötən tarixlə saxtalaşdırmaq yolunu tutub. Nümayəndəm Quliyev Sahilin iştirak etdiyi iclasda hakim əmlaka həbs qoyulması haqqında ərizəni geri qaytarıb və iddiaçıya deyib ki, sən pul istəyirsən, maşınların bura nə aidiyyatı? Götür ərizəni. Ancaq sonradan, görünür yuxarıdan sifariş nəticəsində, məhkəmə öz qərarını saxtalaşdırıb. Bu isə artıq cinayətdir. Mənim mənzilimin dəyəri iddia məbləğindən dəfələrlə çox olduğu halda, mənim və hətta həyat yoldaşımın maşınına həbs qoymaq isə Azərbaycan mülki-prosessual qanunvericiliyinin kobud şəkildə pozulmasıdır. Bu addım qərəzdən, qisasçılıqdan və səviyyəsizlikdən başqa bir şey deyil!

- Hakimiyyətin sizə qarşı bu qisasçılığına cavabınız nədir?

- Məni yeganə övladımla sındıra bilməyənlərin dəmirlə, daşla, betonla sındıracaqlarını düşündüyünə, bu ağıla, bu zəkaya heyranam! Bu, batanın saman çöpündən yapışmasına bənzəyir. Həyatda itirməyə qorxduğum yeganə dəyər ləyaqətimdir. Allah hər kəsi onu itirməkdən qorusun!