Milli Şuranın üzvü, sabiq deputat Gültəkin Hacıbəyli məhkəməyə müraciət hazırlayıb.

Gundemxeber.Az bildirir ki, bu haqda Criminal.az-açıqlamasında Gültəkin Hacıbəyli özü məlumat verib.

Deyib ki, Azərbaycanda siyasi müxaliflərin izlənməsi, siyasi opponenetlərin təzyiqlərə məruz qalması yenilik deyil:
"Sadəcə mənimlə bağlı olayda yenilik ondan ibarət oldu ki, təkcə məni yox, Azərbaycanda akkreditə olunmuş yüksək ranqlı diplomotik korpus təmsilçilərinin də danışıqları dinlənilib. ABŞ səfirliyinin əməkdaşı, Avropa Birliyinin Azərbaycandakı nümayəndəsinin müavini izlənilib, dinləniliblər. Onların mənimlə telefon danışığı qeydə alınıb. Bu da yetməmiş kimi mənim ABŞ səfirinin müavini ilə işgüzar görüşüm qeydə alınıb. Restoranda yemək masası arxasında işgüzar söhbət edərkən həmin masanın altına və ya üzərinə, ətrafa dinləmə qurğusu yerləşdiriblər və bizi dinləyiblər. Bu ölkə adına rüsvayçılıqdır, rüsvayçı olaydır. Təbii ki bunun arxasında Azərbaycan hakimiyyəti durur. əks halda azercell mobil operatorundan mənim mobil danışıqlarım bu qədər asan əldə edilməzdi. Restoranda dinləməyə gəlincə isə burada söhbət xüsusi xidmət orqanlarının dinləməni həyata keçirməsindən söhbət gedir. Bu çox ciddi bir cinayətdir. Mənimlə bağlı heç bir məhkəmə qərarı yoxdur, mənim səsim dinlənilə bilməz. Qarşı tərəf isə diplomatlardır, onların dinlənilməsi qanuna ziddir”.
Gültəkin Hacıbəyli deyir ki, hüquq mühafizə orqanlarına müraciət edəcək: "Azərbaycan qanunvericiliyinin bütün imkanlarından faydalanaraq bu işi məhkəmə müstəvisinə keçirəcəyəm. Təbii ki, Azərbaycan məhkəməsindən ədalət gözləmirəm. Ancaq Avropa Məhkəməsi səviyyəsində bu məsələdə ciddi nəticə əldə edəcəyimizə əminəm. Qanunsuz olaraq dinlənilməyim Azərbaycan Konstitusiyasının 32-ci maddəsinə, Avropa Konvensiyasının 8-ci maddəsinə ziddir. "Mülki və siyasi hüquqlar haqqında” Paktın 17-ci maddəsi ilə daban-dabana ziddiyyət təşkil edir. Bütün bunları nəzərə alaraq bütün hüququ prosedurları bu gündən başlayıram. Mənə qarşı bu cinayət əməlini törədən şəxslərin – "Azercell”in və bu informasiyanı paylaşan Real tv-nin, onlara bu informasiyaları ötürən orqanların məsuliyətə cəlb olunması üçün bütün hüquqi imkanlardandan istifadə edəcəyəm”.
Gültəkin Hacıbəyli qanunsuz dinləmədə siyasi çalarların olduğunu xüsusi olaraq vurğulayıb: "Azərbaycanda siyasi müxalif olmaq böyük məhrumiyətlər hesabına başa gəlir. Bizim şəxsi həyatımız yoxdur. Şəxsi yaxımalarımız şəxsi söhbətlərimiz doğmalarımızla belə söhbətlərimiz nəzarət altındadfır. Bu məsələnin üzə çıxmasına görə sevinirəm. Dünya ictimiyyəti gözü ilə gördü ki, Azərbaycan hakimiyyəti insan hüquq və azadlıqlarını hansı həddə qədər heçdən sayır. Siyasi müxalifəti hansı həddə qədər təzyiqlərə məruz qoyur”.
Gültəkin Hacıbəyli "Realtv”nin üzrxahlığını qəbul etmədiyini, cəzalandırılmasının tələb edəcəyini bildirib.
Qeyd edək ki, xanım Hacıbəyli oktyabrın 19-da, rəhbərliyində təmsil olunduğu qurum aksiya keçirdiyi zaman ABŞ-ın Azərbaycandakı səfirliyinin siyasi işlər üzrə müşaviri Uilliam Solly ilə telefonla danışıb. Həmin danışığın səs yazısını Real TV-nin rəhbəri Mirşahin Ağayev müəllifi olduğu "Mirşahin vaxtı” proqramında yayıb. 1 gün sonra isə həmin proqram silinib. Proqramda, həmçinin, Gültəkin Hacıbəylinin Avropa İttifaqının siyasi, sosial məsələlər və ictimaiyyətlə əlaqələr şöbəsinin müdiri Denis Daniilidis ilə görüşündən də danışılıb. Digər səs yazısının məzmunu isə zəngin aksiya cəhdi zamanı edildiyini deməyə əsas verir. G.Hacıbəyli aksiyada 500 nəfərin saxlanıldığını bildirir, Əli Kərimli ilə bağlı narahat olduğunu qeyd edir. ABŞ və Avropa İttifaqının Azərbaycandakı diplomatik missiyası isə hələlik məsələyə münasibət bildirməyib.

Gundemxeber.Az