Rusiyanın tanınmış epidemioloqu, Rusiya Elmlər Akademiyasının akademiki Viktor Maleyevin “Report”un Rusiya bürosuna verdiyi müsahibədə dünyada və Azərbaycanda COVID-19 virusunun yayılma dərəcəsi, Rusiyanın Azərbaycanla bu məsələdə əməkdaşlığı kimi məsələlərdən söhbət açılıb.

Dünyada mövcud epidemioloji vəziyyəti necə dəyərləndirərdiniz? Koronavirusun insanlara yaratdığı təhlükə nədən ibarətdir?

Mart ayının 11-də Ümumdünya Səhiyyə Təşkilatı bu xəstəliyi pandemiya elan edib. Yəni haqqında söhbət etdiyimiz xəstəlik bütün ölkələr üçün təhlükədir. Koronavirus həqiqi təhlükədir və artıq gələcəkdə yox, hazırda nə olduğunu danışmalıyıq. Belə ki, pandemiya səhhətimizə ziyan vuraraq bir çox insanı aramızdan ayırıb. Dünyada yoluxanların 3 milyona çatacağı istisna deyil. Bundan əlavə, iqtisadiyyatın dağılması, əlaqələrin pozulması, turizmin çökməsi kimi fəsadlar göz qabağındadır. Sonradan nələrin baş verəcəyini indidən söyləmək çətindir, epidemiya davam edir. Bu xəstəlik yeni olduğundan biz bütün təhlükələri hələlik təsəvvürə gətirə bilmirik.

Bəs koronavirusun Azərbaycanda yayılması, hökumətin bununla bağlı gördüyü tədbirlər barədə fikriniz nədir?

Azərbaycan pandemiyanın öhdəsindən layiqincə gəlir. Mən bilən, Azərbaycanda yoluxma halları vur-tut 1 500-dən bir qədər çoxdur, ölüm halları da cüzidir. Hökumətin gördüyü bütün tədbirlər mövcud vəziyyətə uyğundur. Xəstəliyi dəf etmək üçün hökumət ciddi təcrid və başqa addımlara bundan sonra da davam etməlidir.

Strateji tərəfdaşlıq əlaqələri olan Rusiya ilə Azərbaycanın koronavirusa qarşı mübarizədə əməkdaşlığı barədə nələri deyərdiniz?

Rusiya Azərbaycana koronavirusun müayinəsi üçün zəruri olan test dəstləri göndərib. Həmçinin Azərbaycan və Rusiya öz vətəndaşlarını vətənə qaytarmaqla bağlı məsələləri tez bir zamanda həll etdilər. Ölkələrimiz yaxından əməkdaşlıq edir, o cümlədən sanitariya-epidemiologiya xidmətləri arasında birgə fəaliyyət hallarının olduğunu deyə bilərəm. Bütün bunlar Azərbaycana vəziyyəti nəzarətdə saxlamaqda kömək edir.

Bəs pandemiya nə vaxt başa çata bilər?

Fikrimcə, bəşəriyyət bu problemin öhdəsindən gələcək. Bununla bağlı bir neçə variant var. Birincisi, yaya qədər pandemiya zəifləməlidir, yəni yoluxma və ölüm hallarının azalacağı gözləniləndir. İkincisi, peyvənd məsələsindən də çox şey asılıdır. Peyvənd tapılaraq əhali arasında tətbiq edilsə, koronavirusun yayılması zəifləyər. Bundan əlavə, infeksiyanı idarə etmək üçün təsirli antivirusun yaradılmasını gözləyirik. Çox güman ki, belədə insanlar yoluxsa belə, ölüm halları nisbətən az olacaq. Hərçənd bu pandemiyanın idarə olunan halda da olsa, bizimlə qalacağını istisna etmək olmaz.

GundemXeber.Az