Bəxtiyar Hacıyev: “Millətimizi özümüz seçmədiyimiz kimi qohumlarımızı da biz seçmirik”; “Bir-birimizi tənqid etməkdənsə, kənarda müşahidəçi olmağa üstünlük verirəm”
Keçmiş vicdan məhbusu, tanınmış blogger Bəxtiyar Hacıyevin adı bugünlərdə özünün heç arzulamadığı bir mövzuda hallandırılır. Prezidentliyə namizəd Hafiz Hacıyevlə qohumluq faktoru tez-tez medianın gündəminə gəlir. Xüsusən də gənc fəalın H.Hacıyevin namizədliyinin ləğvi üçün sosial şəbəkədə başlatdığı imzatoplama kampaniyası onu bu sahədəki müzakirələrin aktiv simasına çevirib.
Biz də B.Hacıyevlə söhbətimizdə həm gənc fəal kimi seçkiöncəsi proseslərdən, həm də Hafiz Hacıyev mövzusundan danışdıq. Sonuncu mövzu onun üçün arzuolunmaz olsa da.
Müsahibimiz öncə seçkiöncəsi Azərbaycanın ümumi mənzərəsini qiymətləndirdi.

- Hazırda seçkiyə az vaxt qalıb. Heç kim iddia edə bilməz ki, ölkədə seçki ab-havası hiss olunmur. Vətəndaşların böyük bir əksəriyyəti seçkilərə hazırlaşır, seçki vasitəsilə hər hansı bir dəyişikliyin olacağına inanır. Şəxsən mənim fikrim belədir ki, hər hansı müdaxilə edib, kənardan fərqli görünməkdənsə, “ruhdan salır, işimizi tənqid edir” sözünü eşitməkdənsə, bir qrup insan kənarda dayanmağa üstünlük verib bu prosesin yekunlaşmasını gözləyir. Mən inanıram ki, bu seçkilərdən sonra həm iqtidar, həm də müxalif cəbhədə yeniləşmə və gəncləşmə getməlidir. Çünki uzun illər ərzində hər iki tərəfdə eyni simaların olması, eyni ritorika, eyni yanaşmalar, eyni həll yollarının göstərilməsi insanları yorub. İnsanlar bunu açıq və kəskin şəkildə bildirməsələr də, eyni simaların görülməsi insanları yorur. Düşünürəm ki, növbəti seçkilərdə həm iqtidar, həm də müxalifət tərəfdən yeni simalar çıxacaq.

- Bayaq da qeyd etdiz. Dəyişiklik istəyən bir qrup iş görür, meydanlara çıxır, etiraz edir. Başqa bir qrup isə dəyişiklik istədiyi halda kənarda dayanıb, görülən işləri tənqid etmək, ona qulp qoymaq xəttini seçib. Sizə hansı daha məqbuldu? İş görənlərə qoşulub qüsurları düzəltmək, yoxsa daim narazı pozada tənqid etmək?

- Tənqid etmək təkcə kənarda dayanmış qrupa aid deyil. Mən təxmin edirəm, siz hansı qrupu deyirsiz. Əgər REAL hərəkatını nəzərdə tutursuzsa, sadəcə başqalarını tənqid edən onlar deyil. Ənənəvi müxalifət də öz inandığı yolda gedən digər namizədləri eyni şəkildə tənqid edir. Məsələn, AXCP və Müsavat gənclər təşkilatlarının üzvləri, müsavatçılar, cəbhəçilər də parlamentdə oturmuş, bu gün prezidentliyə namizədliyini irəli sürmüş İqbal Ağazadəni tənqid edirlər. Halbuki hər bir siyasi qüvvə öz qarşısına məqsəd qoyub, kənarda deyilənlərdən, müzakirələrdən, kimin nə etməyindən asılı olmayaraq öz bildiyi yolla getsə, həm həmin ölkə, həm də həmin siyasi qrup üçün daha yaxşıdır. İndiki halda seçkiyə az vaxt qalıb. Amma enerji başqa şeyə sərf olunur. Məsələn, sentyabrın 22-də mitinq keçirildi, amma bütün müzakirələr REAL-la ənənəvi müxalifət arasında oldu. Bu, artıq vaxt və enerji itkisidir. Sizin verdiyiniz suala gəlincə, mən bir-birini tənqid etməkdənsə kənarda dayanıb müşahidəçi olmağı daha çox üstünlük verirəm. Çünki müşahidəçi ən azından heç bir tərəfə ziyan vurmur. Amma qeyd edirəm ki, təkcə REAL yox, ənənəvi müxalifət də başqa xətti seçmiş insanları tənqid edir. Halbuki həmin insanlarla söhbət zamanı da aydın olur ki, hərə öz tutduğu yolun doğruluğuna inanır. Ona görə də maksimum çalışmaq lazımdır ki, hər bir siyasi qüvvə, partiya özünün doğru bildiyi yolda hərəkət etsin.

- Qələbənin qohum-qardaşı çox olur, məğlubiyyət isə yetimdir deyiblər. Qələbə olarsa, kənarda dayananlar ortaya gələcəklərmi?

- Şəxsən mən ölkədə demokratik dəyişikliklərin olmasını istəyirəm. Bunu kimsə etsə, mənimçün ən yaxşı variant ictimai-siyasi proseslərdən kənarlaşıb kiçik bir bizneslə məşğul olub, dünyanı gəzmək olardı. Bu gün əgər insanlar bu qədər qarışıq bir mühitdə ictimai-siyasi proseslərə qoşulursa, stres altında yaşayırlarsa, onlar üçün fərq eləməz ki, bu qələbəni kim qazanıb. Sabah hər hansı qüvvə qələbə qazansa və onlar bu müşahidəçiləri kənarda saxlamaq istəsə, mən böyük məmnuniyyətlə kənarda qalıb, normal bir ölkədə, adi, sıravi bir vətəndaş olmaq istəyərəm. Amma elə insanlar da var ki, onların çox böyük ambisiyaları var, sabah qələbə olanda qələbə sahiblərinin yanına gəlib “biz sizin doğru dediyinizi bilirdik, hər zaman dəstəyimizi vermişdik” deyəcəklər. Səmimi insanlar üçünsə fərq eləməməlidir ki, qələbəni kim qazanıb. Əsas odur ki, demokratik dəyişikliklər olsun.

- Bu ərəfədə sizin göstərdiyiniz aktivlik həm də Hafiz Hacıyevin namizədliyinin ləğvi üçün apardığınız kampaniyadır. Necə gedir kampaniya? Dəstək varmı?

- Hazırda mən baxıram ki, 2358 nəfər bu kampaniyaya qoşulub. Kənarda dayanan insanlar da boş dayanmır. Onlar da bu seçkinin nəticəsinin dəyişməyəcəyini başa düşürlər. Reallığı qəbul edib növbəti seçkilər üçün uzunmüddətli işə başlayıblar. Hər iş qısa müddətdə öz nəticəsini göstərmir. Kimsə 2015 və ya 2018-ci il seçkilərini hədəf alırsa, yeni nəslin bu işə mobilizə olunmasını istəyirsə, ola bilər, bu gün hansısa mitinqdə görünmür. Amma bu, o demək deyil ki, o, bütün proseslərdən kənarda dayanıb.

- Bu 2358 nəfərin müraciəti namizədliyin ləğvi üçün nə dərəcədə təsirli ola bilər? Hüquqi əhəmiyyəti varmı bu imzaların?

- Bu, hüquqi təsirdən daha çox vətəndaş etirazıdır ki, baş verənlərə biganə qalmırıq. Həm də biz bununla onu göstərməyə çalışırdıq ki, Hafiz Hacıyevi meydana atan insanlar bilsinlər ki, bu adam təkcə hakimiyyətin rəqiblərinə ziyan vurmur, eyni zamanda hakimiyyətə də ziyan vurur. Hakimiyyətin müsbət, simpatik simaları var ki, hakimiyyəti onlar müdafiə etsəydi daha yaxşı olardı, nəinki Hafiz Hacıyev kimi insanlar.

- Hafiz Hacıyevlə qohum olmanız faktoru belə bir müraciəti hazırlamaqda kompleks yaratmadı ki?

- Birincisi, uzaq qohumluq var. Mən dəfələrlə qeyd etmişəm ki, necə ki insanlar öz millətlərini seçə bilmirlər, eləcə də qohumlarını seçə bilmirlər. Başqa insanlar o şəxslə eyni millətdən olduqları faktını dəyişə bilmədikləri kimi mən də onunla qohumluq faktını dəyişə bilmirəm. Ona görə də məsuliyyət daşımıram. Necə ki, siz onunla eyni millətdən olduğunuza görə məsuliyyət daşımırsız, mən də eləcə. Nəinki uzaq qohumumun, hətta ən yaxın adamımın belə mövqeyi ilə razılaşmayanda bununla bağlı vətəndaş mövqeyi bildirməkdən kompleks keçirmirəm.

- Hafiz Hacıyevin qohumu olmaq Sizə problem yaradırmı?

- Qətiyyən. Əksinə, kontrast yaradır. İnsanlar müqayisə edə bilir ki, iki eyni soyadın daşıyıcısı, qohum bir-birindən tamam fərqli insanlardır. Spektrin bir ucunda birimiz, o biri ucunda isə o birimiz dayanırıq. Bir çox insanlar mənə həmin kampaniya başlayandan sonra facebook, gmail vasitəsilə məktublar yollayıblar. Təşəkkür edirlər bu mövqeyimə görə, bu kampaniyadan sonra mənə simpatiyalarının artdığını deyirlər.

- Adətən qohumlar arasında belə fikir ayrılıqları olanda araya ağsaqqallar girir, tərəfləri ortaq mövqeyə gətirib, bir-biri barədə cəmiyyətdə mənfi fikir söyləməməyə çağırır. Sizin təcrübənizdə belə hal oldumu?

- Mənə elə gəlir, seçkilərə az vaxt qalmış bir müddətdə biz daha ciddi mövzulardan və insanlardan danışsaq daha yaxşı olar.

- Yəni bundan sonra qarşı tərəfdən sizin ünvanınıza hər nə deyilsə də, sizinçün bu mövzu bitib?

- Mən facebookda bir status yazmışdım. Orda qeyd eləmişdim ki, heç bir insan qohumluq əlaqələrini özü seçmir. Bəzi jurnalistlər və saytlar məni onunla “əmioğlu”, “əmi” kimi təqdim edirlər. Dəfələrlə demişdim ki, izahatlarıma baxmayaraq onun dediyinə inananlar onu ağılda insanlardır. Hafiz Hacıyevin heç bir addımına məsuliyyət daşımıram.