İsveçrədə yaşayan tanınmış jurnalist Elbəyi Həsənli GünAz TV-yə müsahibə verib. Həmin müsahibəni təqdim edirik:

- Bu günlərdə Əlikram Hümbətovun Ermənistana səfəri ilə bağlı avropada yaşayan bəzi müxalifətçilərin sosial şəbəkələrdə yazdıqları statuslarını oxuyarkən belə fikir formalaşır ki, bu insanların hakimiyyətə qarşı nifrətləri dövlətçiliyə qarşı nifrətlə əvəz olunub. Sizcə, bu düzgün yanaşmadı?

-Qərbdə Əlikram Hümbətovun Ermənistana səfərini yalnız bəzi separatist (bölücü) baxışlara malik olan şəxslər müdafiə edirlər. Və bu müdafiə də passiv xarakter (mahiyyət) daşıyır. Cünki Əlikram Hümbətovun Ermənistana səfərinə bəraət qazandırmaq son dərəcə çətindi. Sosial şəbəkələrdə də Əlikram Hümbətovun səfərinə fərqli münasibətlər gördük. Bu sirr deyil ki, Azərbaycanda qeyri-türklər arasında separatizm meyilləri əsasən Rusiya, İran, Ermənistan və elə Qərb tərəfindən də körüklənir. Məqsəd bəllidir, heç bir tərəf Azərbaycanın güclü olmasında maraqlı deyil. Məsələn, Ermənistan Statistika (amar) Komitəsinin rəsmi məlumatına görə bu ölkədə yaşayan insanların 99,9 faizi ermənidir. Baxın, ermənilərin dünyanın hər yerində yaşayırlar, amma öz ölkələrində kimsənin yaşamasına imkan vermirlər. Və Azərbaycanı zəiflətmək üçün etnik qruplardan yararlanmağa çalışırlar. Siz düşünün, talışlar Ermənistanda yaşaya bilərdilərmi? Və ya ləzgilər, kürdlər və digər etnik qrupları ermənilər çoxdan öz ölkələrindən didərgin salmışdılar. Əlbəttə, bu gün Azərbaycanda separatizmi körükləyənlər bu həqiqəti bizdən də yaxşı bilirlər. Amma onlar hesab edirlər ki, istəklərinə nail olmaq üçün şeytanla da əməkdaşlıq etmək olar. Amma kimsə unutmasın ki, dünyada yaşayan azərbaycan türklərinin sayı hardasa 50 milyon civarındadır. Və Azərbaycan dövləti bu nəhəng kütləni hərəkətə gətirsə, separatistlər də, onaların havadarları da ayaqlar altında məhv olub gedər. Bəli, Azərbaycanda demokratiya ilə bağlı ciddi problemlər var. Amma bu heç də o demək deyil ki, separatistlər Azərbaycanın ərazi bütövlüyün şübhə altına ala bilərlər. Bir də ortada erməni separatizmi və onun nəticələri var. Düşünmürəm ki, ermənilər nəyəsə nail oldular. Əksinə Ermənistan faktiki dizi üstə düşdü. Və faktiki ianələr hesabına yaşayır...

-Sizin kimi avropada müxalif düşüncəli yazalarımız xeyli saydadır. Amma, bu məsələlərdə hər zaman milli maraqlardan çıxış edirsiniz. Bəzən görürük ki,sizində əleyhinə fikirlər gedir...

-Mənə qarşı, daha doğrusu mənim mövqeyimə qarşı olanlar əsasən etnik separatizmi dəstəkləyən kəslərdir. Buna da normal baxıram. Bir məqamı da vurğulayım ki, Azərbaycanda separatizmin hər hansı bir perspektivin (imkanlar, çeşməndaz) görmürəm. Ona görə də elə bir narahatçılığım yoxdur. Və mən etnik və ya məzhəb fərqi ucbatından Azərbaycanda qan tökülməsinin qəti əleyhinəyəm. Ümumiyyətlə, biz millət olaraq mütərəqqi və qabaqcıl ideyaların dalnca getməliyik. Yəni dini,irqi,etnik və sair fərqlərə baxmayaraq biz hamımız Azərbaycan vətəndaşıyıq. Bu bizim hər birimizin dövlətidir. Bir də mən heç görmədim ki, talış, ləzgi, kürd və ya dağlı Azərbaycanda özünü aşağı katiqoriyalı (təbəqə, dəstə) birisi kimi hiss etsin. Əksinə cənub bölgəsindən olana güldən ağır bir söz desən o dəqiqə sinəsin qabağa verəcək ki, beynimi çöndərmə, mən “zır talışam“ ha. Dağlılar deyir ki, ümumiyyətlə, Bakının sahibi bizik, Kürdlər hazırda Azərbaycanın milli sərvətlərinin əhəmiyyətli hissəsinə nəzarət edir. Ləzgilərə və ya avarlara kimin həddi nədir ki, artıq-əskik bir söz desin. Əslində elə belə də olmalıdır. Azərbaycanda hər kəs özünü bu məmləkətin sahibi kimi hiss etməlidir. Və mən əminəm ki, Azərbaycanda demokratik düşüncə qalib gələndən sonra ölkəmiz dünyaya nümunə ola biləcək məmləkətləs sırasında olacaq....

-Ümumiyyətlə, Avropada Azərbaycan dövlətçiliyi əleyhinə iş aparmaq nə qədər prespektivlidir? Bu kimlərin marağında ola bilər?

-Dövlətçilik əleyhinə hər hansı təbliğat hüquqi baxımdan cinayətdir, mənəvi baxımdan isə vətənə xəyanətdir. Yəni istənilən prizmadan (baxışdan) baxsaq, buna bəraət ola bilməz. Bəli, Avropada İlham Əliyevin yeritdiyi siyasətə etiraz edənlər çoxdur. Bu çoxluq Azərbaycanda demokratik siyasi sistemin qurulmasının tərəfindədir. Amma heç kəs narahat olmasın, önəmli olan odur ki, Azərbaycan dövləti güclü olsun. Avropada olan azərbaycanlılarınsa böyük əksəriyyəti dövlətçiliyə bağlıdır və vətən üçün hər cür vədakarlıqlara da hazırdır. Buna nə dostların, nə də düşmənlərin şübhəsi olmasın....