“Azərbaycanın həm sahədə, həm də masada qazandığı zəfər imkan verir ki, torpaqarımızın üzərində olan suveren haqlarımızı heç kimlə bölüşməyək. Bu, rusiyalı sülhməramlı qüvvələrə də aiddir.”

Bunu “Xəbər365”ə Azərbaycan Yüksəliş Partiyası başqanının birinci müavini Bəhrəm İsmayılov deyib.

Son vaxtlar sülhməramlı qüvvələrin səlahiyyətlərini aşaraq hakim rolunda çıxış etməyə cəhd göstərməsinə diqqət çəkən B. İsmayılov qeyd edib ki, bu, xalqımızın bütün zümrələri kimi AY Partiya rəhbərliyi olaraq onları da narahat edən məsələdir.

“Anlamaq olmur ki, rusiyalı sülhməramlıların məqsədi nədir. Gah məktəblilərə əllərindəki atıcı silahları (yeni modernləşdirilmiş AK-12 tipli Kalaşnikov avtomat silahını – red.) nümayiş edirlər və ondan istifadə qaydalarını öyrədirlər, gah da məktəblərdə əyani şəkildə minalardan qorunmağın dərslərini keçirlər. Belə çıxır ki, Qarabağın erməni əhalisini yenidən müharibəyə hazırlayırlar. Bunu hansı haqla və hansı hüquqla edirlər?” - o bildirib.

Partiya nümayəndəsi onu da deyib ki, son Hadrut ərazisindəki kəndlərlə əlaqədar məsələdə sülhməramlıların öz səlahiyyət çərçivələrini aşmaq və sanki hakim rolunda çıxış etmək istəyinin qarşısını Azərbaycanın və Türkiyənin qətiyyətli mövqeyi aldı: “Türkiyə müdafiə naziri Hulusi Akarın “Müqavilə pozularsa, vaxt itirmədən savaş variantına keçə bilərik”- bəyanatı sülhməramlıların tələm-tələsik şəkildə öz mövqelərinə çəkilməsinə, xəritə üzərindəki manipulyasiyanın aradan qaldırılmasına səbəb oldu. Ona görə də, istər cəmiyyətimizin aparıcı ictimai-siyasi qüvvələri, istərsə də dövlət orqanları sülhməramlıların nəzarətdə saxlanılması məsələsinə gündəlik vacib öhdəlik və iş kimi baxmalıdırlar. Bu məsələdə heç bir boşluq və diqqətsizlik olmamalıdır.”

Sülhməramlıların fəaliyyətinin yeni qurulan ortaq monitorinq mərkəzindən də müşahidə olunacağını deyən B. İsmayılov əlavə edib ki, bu məsələ tez bir zamanda həll olunmalıdır.

“Türkiyənin Silahlı Qüvvələrinin istər Qarabağda, istərsə də Abşeronda mövcudiyyəti sadəcə sülhyaratma missiyası ilə əlaqədar deyil. Bu məsələ bütün Qafqaz regionunda təhlükəsizliyin təminatı məsələsidir” – deyə, o əlavə edib.

Gundemxeber.Az