Rusiya Müdafiə Nazirliyi Qarabağda sülhməramlıların yerləşdirilməsinin yeni xəritəsini dərc edib.

Əvvəlki xəritə 15 dekabr tarixində yayımlanmışdı. Ötən gün yayınlanan yeni xəritədə Laçın dəhlizi sülhməramlılar üçün ayrıca patrul zonası kimi ayrılıb. Əvvəlki xəritələrdə isə bu olmayıb. Rusiya sülhməramlılarının son günlər xəriyətlə bağlı dəyişiklikləri Azərbaycan ictimaiyyətində ciddi etirazla qarşılanır və yeni problemin baş qaldıracağı kimi dəyərləndirilir.

Mövzu ilə bağlı Cebhe.info-ya danışan siyasi şərhçi Fikrət Sadıqov bildirib ki, sülhməramlıların növbəti oyununa Azərbaycan tərəfi biganə qalmamalı və reaksiyası prinsipial olmalıdır:

“Sülhməramlıların bu hərəkəti düzgün deyil və müqaviləyə tamamilə zidddir. Onlar bundan əvvəl də xəritə dəyişmişdilər. Bizim prinsipial və qəti mövqeyimiz bunu yenidən bərpa etməyə məcbur etdi. İndi yenidən cəhd göstərirlər. Bəlkə də Rusiyanın o hərbçiləri və zabitləri ermənilərə sevgi-məhəbbətlə, müəyyən hislərlə yanaşırlar. Amma cəbhədə, xüsusilə münaqişə zonasında və imzalanan bəyanatdan sonra bütün hislər, emosiyalar arxa plana keçməlidir. Çünki onlar hərbçidirlər və onlar siyasətçilərin tapşırığını, iradəsini yerinə yetirməlidirlər. Belə hərkətlər yolverilməzdir. Bu, müəyyən dərəcədə Azərbaycan və Rusiya münasibətlərinə də bir zərbədir. Burada inam məsələsi var. Əgər sülhməramlılar özlərini belə aparırlarsa, biz təbii ki, bu məsələyə ciddi yanaşmalıyıq və reaksiyamız prinsipial olmalıdır”.

Sülhməramlıların xəritə tərtib etmək səlahiyyətinin olub-olmamasına gəlincə, politoloq onların bu məsələdə ixtiyar sahibi olmadıqlarını deyib:

“Onların xəritə dərc etməsi səalahiyyəti, eləcə də yeni xəritə tərtib etməyə heç bir ixtiyarları yoxdur. Sülhmıramlılar standartlara uyğun olan və bu regionda cızılmış xəritə əsasında işləməlidirlər. Heç bir düzəlişlər etməyə nə hüququ, nə də ixtiyarları var. Bu özbaşınalıqdır və ona qarşı nəsə tədbir görülməlidir. Sülhməramlıların rəhbəri gedib Araik Arutunyanla görüşüb- öpüşəndə bunun nəticəsi də belə olacaq. Görünür, qarşılıqlı məhəbbət o qədər yüksəkdir ki, sadəcə olaraq bunu gizlətməyə də çalışmırlar. Amma bu, həm Azərbaycanın maraqlarına, həm də Azərbaycan-Rusiya dövlət səviyyəsində münasibətlərinə zərbədir. Təbii ki, buna biganə qalmamalıyıq”.

GundemXeber,Az