Kəmalə Əzizqızı: ”Gənc xanımların geyindiyi dar şalvarlar, maykalar geyinirəm”


Modern.az bir zamanların tanınmış diktor və teleaparıcıları ilə silsilə müsahibələri davam etdirir. Budəfəki həmsöhbətimiz AzTV-nin keçmiş diktoru Kəmalə Əzizqızıdır.

– 1990-cı ilin Novruz bayramı idi. Sumqayıtda, anamgildə şəkərbura, paxlava bişirirdik, televiziyada elan eşitdim. Mən də uşaqlıqdan diktor olmaq istəyirdim.

– O vaxta kimi hansı sahədə çalışırdınız?

– Bakı Dövlət Universitetinin tətbiqi riyaziyyat fakültəsini bitirmişəm. İki ilə Elmi Tədqiqat İnstitutunda çalışdım, iki il anamın işlədiyi orta məktəbdə dərs dedim.

– Deməli, televiziyaya gələndə 28 yaşınız var imiş.

– Bəli, zəng vurdum AzTV-yə, Rafiq Hüseynov telefonu götürdü, haqqımda məlumatları dedim. Yaşımı eşidəndə təəccübləndi və bildirdi ki, elan yaşı 25-ə qədər olanlara aiddir. Dedim ki, Rafiq müəllim, bəlkə baxasınız, sonra qərar verəsiniz. Bu cümləm onun çox xoşuna gəldi və məni dəvət elədi. Məni görəndə dedi ki, xarici görünüşün yaşına görə deyil.

– İlk dəfə efirə neçənci ildə çıxdınız?

– 1990-cı ildə. Düz iki il “Bənövşə” uşaq xorunun konsertinin aparıcısı oldum. Bundan sonra əvvəlcə rus dilində xəbərləri aparmağa başladım. Çünki məktəbi və universiteti rus dilində bitirmişəm. Hətta televiziyaya gələndə Azərbaycan dilində tam sərbəst danışa bilmirdim. Rusca düşünüb öz dilimizdə danışırdım. Arada “ee” pauzaları verirdim. Bu da dili yaxşı bilməməyimdən irəli gəlirdi. Televiziya mənə səlis danışmağı öyrətdi.

– AzTV-yə yeni gələnləri təcrübəli diktorlara təhkim edirdilər.

– Mənimlə Ofeliya Sənani məşğul olurdu. Efirə isə Tamilla Ələkbərova təqdim elədi.

– Onlarla rəfiqəlik edirdiniz?

– Bəli, Tamilla xanımla indi də yaxınam. Amma belə hər kəslə yaxşı münasibətlərim var. Onunla bizim ortaq nöqtələrimiz çoxdur, bir-birimizi çox istəyirik.

– Yeri gəlmişkən, Tamilla xanım hazırda nə işlə məşğuldur?

– İşləmir, bu il 70 yaşı tamam oldu.


– Deyəsən, axıra kimi xəbər diktoru oldunuz.

– Bəli, 1992-ci ildən, 2006-cı ilə qədər xəbər diktoru oldum. Arif Alışanov sədr gələndən sonra çıxdıq. Amma məni tam çıxartmadı, radioya keçirdi. Bir il də radioda işlədim.

– Əməkhaqqıda fərq var idi?

– Təbii ki. Radioda aparıcı idim. Sıxışdırma idi də.

– Radiodan özünüz uzaqlaşdınız?

– Yox, müqaviləmizin müddəti bitdi və bir ildən sonra yeni müqavilə imzalamadılar.

– İşdən çıxarılmağınızın səbəbi nə oldu?

– Heç nə. Bizə heç səbəb demədilər.

– Sizinlə birgə kimlər işdən uzaqlaşdırıldılar?

– Nailə İslamzadə, Zamirə Dadaşova, Aynur Əliyeva, Aynurə Mehdiyeva, Şəfəq Qarayeva, Tamilla xanım.


– AzTV-dən uzaqlaşandan sonra yeni təkliflər oldumu?

– Bir müddət layihələr üzərində işlədim, boş qalmadım. Amma efirə getmədi. Müəyyən sponsor məsələləri , narazılıqlar oldu. Bu, qismət məsələsidir. Hər bir işin uğurlu olması üçün gərək qismətin olsun. Nə qədər çalışsam da, heç nə alınmadı.

– Sizin üçün bu 6 ili itirilmiş müddət sayaq olar?

– Xeyr. İşdən çıxanda çox pis oldum, depressiyaya düşdüm.

– İşdən çıxarılan diktorlar bir-birinizə dəstək olurdunuz?

– Elə bil pərən-pərən olduq. Bir müddət əlaqələr itdi, sonra sosial şəbəkələrdə bir birimizi tapdıq. Həyatımda baş verən mənfi və müsbət hər şeyə görə Allaha təşəkkür edirəm. Bəlkə də o an televiziyada çıxmağım xeyrimə idi.

– Niyə?

– Əvvəla elə bir mühit yaranmışdı ki, orda çalışmaq çox çətin idi. Hamının canı boğazına yığılmışdı, sərbəstlik yox idi.


– AzTV onsuz da heç vaxt sərbəst olmayıb.

– Yığa-yığa gəlmişdik, səbrimiz daşırdı. Depressiya anlarında fikirləşirdim ki, işləyəndə “bezmişəm, bezmişəm” dediyimə görə Allah da mən belə bir yol göstərdi.

– Bu 6 ildə başqa nə işlə məşğul oldunuz?

– Evdə idim, səyahət edirdim.

– Səyahətə maddiyyat lazımdır.

– Allahın sevimli bəndəsiyəm. İşdən çıxdığım anlarda oğlum işləməyə başladı. O, Türkiyədə oxuyub işləyirdi və mənə pul göndərirdi. Ege Universitetinin beynəlxalq münasibətlər fakültəsini bitirib, oteldə menecer işləyir.

– Hansı ölkələri səyahət etdiniz?

– Avropanı çox sevdiyimə və mədəniyyətini özümə yaxın bildiyimə görə ora çox səyahət elədim. Bir neçə dəfə Türkiyəyə getdim. Məni depressiyadan idman çıxardı. Fitneslə məşğul idim, üzgüçülüyə gedirdim. İdmana elə bil işə gedirdim və stressimi atırdım. Rəfiqələrlə, qohumlarla ünsiyyətdə idim.

– AzTV-də çalışsanız da saç düzümünüz, sərbəstliyiniz digərlərindən müəyyən qədər fərqlənirdi. Məsələn, AzTV-də diktorlar arasında belə qısa saç düzümündə ikinci kimsə yox idi.

– Saç düzümü bizim kritik mövzumuz idi. Nizami Xudiyev deyirdi ki, sən saç düzümünü tapa bilmirsən. Saçımı necə edirdimsə, bəyənmirdi.

– Niyə?

– Bilmirəm. Yəqin klassik deyildi ona görə (gülür).

– İndi də bir Avropa meyli var sizdə.

– Mənim ruhum düzgün bədənə girməyib, Avropada olmalıydım (gülür). Daxilən azadam, düşüncələrim, sözlərim azaddır. Sözü insanın üzünə deyirəm. Arxamca danışanları da sevmirəm. Sərt olsa da, mənə qarşı sözünü üzümə de. Məni sağlam şəkildə tənqid edənləri çox sevirəm.

– Dediniz ki, daxilən azadsınız. Bu azadlıq geyimlərinizə sirayət edir?

– Çox. Hətta geyimlərim bəzi rəfiqlərimin, oğlumun xoşuna gəlmir. Oğlum deyir ki, yaşına uyğun geyinmirsən. Deyir sənin yaşında daha klassik geyinmək lazımdır.

– Bəlkə qısa geyinirsiniz...

– Qısa geyinə də bilərəm. Sadəcə özümü ətəkdə rahat hiss etmirəm. Daxilən azad olduğuma görə geyim stilim də “free style” dir. Yəni azad stil.

– İngiliscə bilirsiniz?

– Anam ingilis dili müəlliməsi olduğundan ingilis dilini yetərincə bilirəm. Hətta biz danışmağa başlayanda o bizimlə ingiliscə danışırdı.

– İngiliscə niyə xəbər aparmamısınız?

– Mənim çox səlis ingiliscəm var idi. Amma indi bir az zəifdir. Xarici ölkələrdə olanda ingiliscə sərbəst danışıram. Hətta istəyirəm ki, xarici dostlarım olsun, daima ingiliscə danışım.

– Qayıdaq geyim məsələsinə. Rəfiqələrin iradı nədən ibarətdir?

– İradlar budur ki, mən özümü gənc qızlar kimi təqdim etmək istəyirəm. Daha əlvan rənglər, gənc xanımların geyindiyi dar şalvarlar, maykalar geyinirəm. Mənim stilim gənc qızların stilidir.

– Sizcə, yaraşır, yoxsa zorən cəhd edirsiniz?

– Onlar düşünürlər ki, özümü gənc göstərmək istədiyimə görə bu stildə geyinirəm. Əslində ruhum bunu qəbul edir və rahat oluram.

– Bahalı geyimlərə üstünlük verirsiniz?

– Yox, markalara.

– Markalar da bahalı.

– Bahalı olmaya da bilər. Ümumiyyətlə, dükanları gəzməyə, alış-verişə nifrət edirəm. Mənə lazım olan şeyə görə dükana gedirəm. Mal çeşidlərini çox görəndə özümü itirirəm, başımı ağrıyır. Butik dükanları xoşlayıram.


– Bu qədər baxımlı və gənc görünmək istəyinin özəl səbəbi var?

– Xeyr. Bunu anamdan belə görüb-götürmüşəm. O da baxımlı qadın olub. Hətta həyətdə oynamağa da səliqəli geyimdə düşmüşük. Kosmetikadan istifadə etməyi sevmirəm. Güzgüyə baxanda özümü bəyənməliyəm. Ruhum kişi ruhudur. Heç vaxt əzilib büzülmürəm. Bəlkə də bu, düz deyil. Amma yoxdur məndə belə şeylər. Oğlumla yaşayıram, yalnızam.

– Nə müddətdir?

– Uzun müddətdir. Bu haqda danışmaq istəmirəm.

– Bildiyimə görə, yeni televiziya layihəniz var.

– Sosial tok-şoudur. Daha çox qadının cəmiyyətdə və ailədə roluna həsr olunacaq. İnşallah hansı kanalda və nə vaxt yayımlanacağını tezliklə biləcəksiniz.

– Bu veriliş digərlərindən nə ilə fərqlənəcək? Sizi yeni ampluada görəcəyik?

– Bəli, orda tam başqa, illərin təcrübəsini yığmış bir aparıcı olacağam. Yaşıma uyğun verilişdir. Yaşımı da gizlətmirəm. 51 yaşımın olduğunu fəxrlə deyirəm. Həm də bu səpkili proqramların ən yaşlı və təcrübəli aparıcısı mən olacağam. Neçə illər daxilimdəki hissləri, düşüncələri, azadlıq istəyini efirdə büruzə verəcəyəm. 17 il işlədiyim AzTV-də azad olmamışam.

– Daxilən azad olduğunuzu dediniz. Amma 17 il azad olmadığınız mühitdə işləmisiniz. Təzadlıdır.

– Orda da bəzən çərçivədən çıxırdım, əl-qola danışırdım.

– Əl-qolla danışan aparıcıları bəyənirsiniz?

– Hamısını yox. Bir dəfə telefonla danışırdım, oğlum da balaca idi. Bir əlimdə telefon, digər əlimlə də izah edirəm. Birdən oğlum gəldi əlimi tutdu və mən danışığımı kəsdim. Dedim ki, neyləyirsən? Dedi ki, axı o insan səni görmür.

– Sizi zahirən Nərgiz Cəlilovaya da oxşadıram. Bunu deyiblər sizə?

– Çox deyiblər. Hətta mənə Nərgiz də deyirlər.

– Bu xoşdur, yoxsa əksinə?

– Xoş deyil. Biz oxşamırıq axı. Nərgizi çox istəyirəm, o televiziyaya məndən daha tez gəlib.

– Sizi Kəmalə kimi tanıyanlar var?

– Əlbəttə. Bəzən məni səsimdən tanıyırlar.

– Yəqin ki, 17 il ərzində efirdə yetərincə maraqlı hadisələr baş verib.

– “Səhərə” proqramını aparırdım. Qonaqlarla söhbət elədiyim yerdə işıq partladı düşdü üstümə. Pencəyim və belim yandı.

– Zahiri görünüşünə görə ən bəyəndiyiniz teleaparıcı kimdir?

– Emil Şahzadənin zahiri görünüşü çox uyğundur. Onun Avropa siması xoşuma gəlir. Rəşad Mehdilini də bəyənirəm. Zaur Baxşəliyevi çox istəyirdim, efirdə sərbəst idi. Amma son vaxtlar reytinq naminə bir az rola girdi. Gündəmdə olan hadisələri çox şişirdirlər.


– Aparıcını efirdə ləhcə ilə danışmağı doğrudur?

– Hə, bu yaxşı hal deyil. Bu, onun reytinq qurbanı olduğuna dəlalət edir. Çünki efirə baxan tamaşaçının əksəriyyəti o ləhcədə danışır. O xəbər aparıcısı olsa, ləhcə ilə danışmaz.

– Bir neçə teleaparıcı adı deyəcəyəm. Nə düşündüyünüzü maraqlıdır. Məsələn, İlkin Həsəni...

– Sevmirəm İlkin Həsənini, səmimiyyətinə inanmıram. Yaxşı səs tonu, tembri ola bilər.

– Zaur Kamal?

– Yaxşı oğlandır. Amma o da reytinq qurbanıdır.

– Anar Nəcəfli?

– Anar özünü türk aparıcılarına oxşatmağa çalışır. Yəqin ki, özünü orda tapıb.

– Səxavət Nur?

– O hələ axtarışdadır.

– Bütün bunların içərisində ən bəyəndiyiniz aparıcı kimdir?

– Xədicə Sənanqızını, ATV-dən Samirə Mustafayevanı bəyənirəm. Amma Samirənin əvvəlki imici daha yaxşı idi. Zaurlar reytinq qurbanları olmasalar, bəyənərdim.

– AzTV-yə baxırsınız?

– Baxmıram.

– Bu qırğınlıqdır?

– Bir az. Mən orda işləyəndə də AzTV-yə nadir hallarda baxırdım.

– Hardasa işləyib ora baxmıram. Bu qeyri-səmimilik deyil? Xoşuma gəlmirsə, niyə işləyirəm ki, orda?

– Müəyyən verilişləri izləyirdim. Heç xəbərlərdə özümə baxmırdım.

– Müəllimləriniz kim olub?

– Məndən öncə işləyən diktorların hamısı müəllimim olub. Rafiq Hüseynov, Roza Tağıyeva, Tamilla Ələkbərova, Ofeliya Sənani. Rafiq Hüseynov o dövrdə qadınların sevimlisi, çoxlarının kumiri idi. Hərəsindən bir şey öyrənirdim.

– Sizcə kim nəyə görə üstün idi?

– Roza Tağıyeva ədəbi-bədii verilişləri, Rafiq Hüseynov publisistik proqramları, Tamilla xanım musiqi verilişlərini daha yaxşı idarə edirdi. Hər halda bu mənim şəxsi qənaətimdir.