Sərdar Cəlaloğlu: “Məndən öndə qeyd olunan adamlar heç 0 faizi də ötməyib»
ADP sədri, prezidentliyə namizəd Sərdar Cəlaloğlu «Bizim Yol» qəzetinin suallarını cavablandırıb. O, seçkidə sonuncu yer tutmasından, qalib namizədi təbrik etməsindən və müxalifətin prosesdə iştirakından danışıb. Müsahibəni təqdim edirik.

- Sərdar bəy, MSK seçkilərin yekun nəticələrini elan etdi, AŞ PA və Avropa Parlamentinin və ATƏT-nin müşahidə qrupları bir-birinə əks bəyanatlar verdi. Bunların fonunda seçkilərə münasibətiniz necədir?

- Seçkilərin nəticələrinin Seçki Məcəlləsinə və Konstitusiyaya uyğun olmadığı qənaətindəyəm. Amma bütövlükdə seçkilərdə bizim resurslarımıza görə qalib gəlmək şansımız yox idi. Şəxsən mən məğlub olduğumu etiraf edirəm. Eyni zamanda, təhlillərimiz göstərir ki, rəqəmlər şişirdilsə də, İlham Əliyev üstünlüyə malik olub və qələbə qazanıb. Bizim artıq bəyanatımız yayılıb, partiyamız iqtidar-müxalifət münasibətlərinin yeni müstəviyə çıxmasında, vətəndaş həmrəyliyinin yaranmasında, tədricən demokratiyaya keçilməsində maraqlıdır. 2005-ci ildən seçdiyimiz dialoq, konstruktivliyi davam etdirməyi bir daha bəyan edirik.
- Bu bəyanatınız yaxın 5 ildə gerçəkləşəcəkmi?

- İstəklərimizin keçəcəyinə ümidim yoxdur. Neçə illərdir bu mövqeyi sərgiləsək də, bizə münasibət pisləşir. Açıq etiraf olunmalıdır, iqtidarda elə qüvvələr var ki, Azərbaycanın demokratiyaya keçidini, hakimiyyət-müxalifət münasibətinin dialoq müstəvisinə çıxmasında maraqlı deyillər. Ona görə ardıcıl surətdə bu münasibətləri korlayan siyasət aparılır. Amma biz düzgün hesab etdiyimiz yolu davam etdirməliyik.
- Seçkilərin Seçki Məcəlləsinə, Konstitusiyaya uyğun olmadığını deyir, ardınca özünüzün məğlub olduğunuzu deyib əlavə edirsiniz ki, İlham Əliyev qalib gəlib. Bu fikrin əvvəliylə sonu arasında ziddiyyəti necə izah edərsiniz?

- İzah edim də, mənim maliyyə və vaxt resurslarım həddən artıq məhdud idi, belə olduqda nə konsepsiyamı əhatəli şəkildə açıqlaya bildim, nə də bütün regionlarda oldum. Həm də ADP-nin ilk dəfə olaraq prezident seçkilərində iştirakını nəzərə alın. İlham Əliyevin üstünlüyünə gəlincə, əks cəbhədəki nöqsanlar qarşı tərəfin qələbəsini təmin edir. Müxalifət 2 il əvvəl vahid namizədlə çıxış etməliydi, Milli Şuranın yaranmasının özü yanlış idi. Necə hesab edirsiniz, Cəmil Həsənlini müdafiə edən qüvvələr seçkidən xeyli əvvəl onun 1 faiz səs toplayacaqlarını bəyan edirdilər. İkinci, nə Lalə Şövkət, nə Eldar Namazov, nə Mirmahmud Mirəlioğlu, nə Rəsul Quliyev açıq şəkildə tərəfdarlarını Cəmil Həsənliyə dəstək verməyə çağırmadı.

- Lalə xanım Cəmil Həsənlini dəstəklədiyini bəyan etmişdi...

- Dəstəkləmək başqa şeydir, biri də var öz tərəfdarlarına çağırış etmək. Adlarını çəkdiklərimdən heç biri xalqa çağırış etmədi. Adətən belə çağırışların böyük effekti olur. Faktiki olaraq, Cəmil Həsənli AXCP və Müsavat Partiyasının ortaq namizədi oldu. Cəmil Həsənli AXC kökənli olduğundan müsavatçılar da onu aktiv və həssas şəkildə müdafiə etmədilər. Təsəvvür edin ki, 2003-cü ildə İsa Qəmbərin mitinqinə 150 min insan gəlmişdisə, 2013-cü ildə 10 insan gəldi, bunu da mən dedim, özləri isə 7 min adamın gəldiyini etiraf etmişdilər.

- Siz ötən 10 ildə müxalifətə, QHT sektoruna olan təzyiqləri, qanunvericilikdəki məhdudlaşmaları nəzərə almısınızmı?

- Buna baxmayaraq dünyada demokratikləşmə yayıldığı üçün vəziyyət bizim xeyrimizə dəyişməlidir, “narıncı inqilab”lar və “ərəb baharı” sıradan hadisələr deyil.
- Amma neftin də qiyməti artıb...


- Siz elə neftin qiymətinin artmasından danışırsınız. Amma neftin Azərbaycan xalqına aidiyyatı yoxdur. Beynəlxalq təşkilatların mövqeyinə gəlincə, onlar dəfələrlə müxalifətə dəyişikliyin yolunu göstəriblər, mən bunun şahidi olmuşam, ancaq düşərgə öz istədiyi yolu gedir. Dünya birliyi isə radikal demokratiyaya keçidi, qisasçılığı təhlükəli hesab edir. Məgər, bilmirsinizmi, dünyada neftə və demokratiyaya marağı olan qüvvələr var, ikincilər demokratiyanın inkişafına pul qoyurlar. Biz nədənsə öz nöqsanımızı kənara qoyuruq. Bir dəfə də günahı özümüzdə axtaraq. Bilirsiniz, müxalifət gərək “rus layihəsi”nə qatılmayaydı...

- Cəmil Həsənli “rus layihəsidir”?
- Mən Cəmil Həsənlini demirəm, Milli Şuranın yaranması prosesini nəzərdə tuturam. Nə oldu, Rüstəm İbrahimbəyov namizəd olanda, Putinin müşaviri tez-tez bəyanatlar verir, Abbas Abbasov da hakimiyyətə xox gəlirdi. Amma Cəmil Həsənli namizəd olan kimi Abbas Abbasov ictimaiyyəti Əliyevə səs verməyə çağırdı, Putinin müşavirinin isə səsi kəsildi və Kreml seçkiyə açıq dəstək verdi. Demək istəyirəm ki, bizim öz qüsurlarımız da var, bəli, MSK-nin nəticələri seçki qanunvericiliyinə və Ana Yasaya ziddir. Amma qüsurlarımızın hakimiyyətin namizədinə uğur gətirdiyini etiraf etməliyik. Və rəqibin imkanlarını, resurslarını bunun üstünə gələndə, hər şey aydın olur. Belə olanda, hakimiyyət mövcud şərtlər daxilində qalib gəlməliydi və gəldi də. Mən seçki texnologiyalarını çox yaxşı bilirəm.


- Gəlin, Sizə olan münasibətdən danışaq, məntəqə komissiyasında həyat yoldaşınızın yerinə səs verildiyi üzə çıxdı, ikinci, hətta Sizə Hafiz Hacıyevdən də az səs yazdılar. Bu münasibəti necə izah edərdiniz?

- Əgər 9 oktyabr seçkiləri Azərbaycan xalqının iradəsini əks etdirirsə, bu, xalqımızın dəyişiklik istəmədiyinin göstəricisidir. Yox, iqtidarın siyasi iradəsini ifadə edirsə, deməli, hakimiyyət siyasətini dəyişmək istəmir. Baş verənlər mənim özümə və partiyamıza olan münasibətin təzahürüdür. Əlimdə 60-70 protokol var, göstərə bilərəm, Naxçıvan şəhər dairəsindən 3-cü, Babək-Şahbuz dairəsindən 4-cü, bir çox məntəqələrdə 2-ci yerdəyəm. Məndən öndə qeyd olunan adamlar isə heç 0 faizi də ötməyib. Mən inanmıram ki, Azərbaycan xalqı mənə sonuncu yeri göstərər. Ən azı səsləndirdiyim ideyalar, təkliflərim insanlarda maraq yaratdı...

- Sizə hətta Hafiz Hacıyevdən də az səs yazdılar...

- Bu, təhqir etmək məqsədinin güdülməsidir. Həm də bununla bizim demokratik dostlarımıza bir cavabdır ki, onlar məni hökumətin adamı kimi təqdim edirdilər. Heç olmasa onlar papaqlarını qarşılarına qoyub hakimiyyətin bizə olan münasibətinin səbəbini düşünməlidirlər. Biz “əl əli yuyar, əl də üzü” prinsipini rəhbər götürmürük, sadəcə, düz olanı deyirik. Baxın, mən seçkilərdə məğlub olduğumu etiraf edirəm, nə olur, alçalmıram ki?! Axı bizə ayrılan vaxt, maliyyə imkanlarımız yetərli deyildi, nəhayət, seçkiyə qatılan partiyaların 9-u dövlətdən tərəfindən maliyyələşir. Onların da 8-i deputat idi. Yaxud Milli Şura etiraf etməliydi ki, Cəmil Həsənli İctimai Palatanın namizədidir. Əslində, məğlub olmanı etiraf etmək də böyüklükdür.

- Ancaq onlar seçki saxtakarlığını göstərən video-roliklər, fotolar ortalığa qoyurlar...

- Mən deyirəm ki, saxtakarlıq faktları olmasaydı da mən məğlub olacaqdım. Bəlkə ikinci, üçüncü yerdə olardım, amma bu cür sonuncu olmazdım. Eyni zamanda, İlham Əliyev də məni udacaqdı. Bir daha deyirəm, İlham Əliyev qalib gəlib. Mən bunu demokratiya və siyasi etika xatirinə etiraf edirəm ki, mən məğlub olmuşam, o da qalib gəlib.

- Sərdar bəy, niyə debatlarda həbsdə olan qardaşınız Qurban Məmmədovun adını xatırlamadınız?
- Mən bu prosesdə millət davasına girmişdim, qardaş, qohum davasına yox. Ümumiyyətlə, siyasi problemlərin debatları zamanı bu cür məsələləri fərdiləşdirmək doğru olmazdı. Qurban Məmmədovun mənim kimi qardaşı var, seçkilərə qatılıb, amma başqa siyasi məhbus var ki, onun heç qardaşı problemlərini deməyə efir tapmır. Mən məsələlərə ümumi yanaşıb ölkədə siyasi məhbus probleminin olduğunu demişəm. Əgər qardaşımın problemlərini qaldırsaydım, bu, məsələnin fərdiləşdirməsi olacaqdı və nə desəydim də, bildirəcəkdilər ki, qardaşını həbs etdikləri üçün belə danışır.



"Bizim yol" qəzeti