“Avqustun 3-də 18 yaşını yeni tamamlamış gənc əsgərimiz Anar Kazımovun Laçında rus "sülhməramlıların" nəzarətində olan ərazidən vurularaq şəhid olması çox hiddət doğurur. Onun ailəsinin, sevənlərinin kədərinə şərik olsaq da, nəticə dəyişmir. Gənc bir insan daha həyatını yolun başındaykən itirdi... Allah rəhmət eləsin! Ən ciddi üzərində düşünülməli olan məsələlərdən biri odur ki, biz 44 günlük vətən müharibəsində minlərlə qəhramanın həyatı bahasına, on minlərlə qazinin fədakarlığı bahasına bir daha qan tökülməməsi üçün, bir daha vətən torpaqlarında keşik çəkən əsgərlərimizin öz torpaqlarımızdan nişangaha tuş gəlməməsi üçün mücadilə etdik. Təssüf ki, nəticədə özünü "sülhməramlı" adlandıran, amma dünyanın gözü qarşısında Ukraynada işğala cəhd edən rus ordusunun ərazimizdə yerləşməsinə “yox” deyəmədik… Bu gün baş verənlər onu göstərir ki, açıq-aşkar Ukraynada işğala girişən bir ordunun, “SSRİ-ni bərpa edəcəyik” deyən bir müdafiə nazirinin burdakı tör-töküntülərinin sülhə xidmət etməsi mümkün deyil. Olanların və bundan sonra da olacaqların fitili ya birbaşa, ya da onların təşviqi ilə çəkilir. Tətiyi çəkən tərəf erməni terrorçuları olsa da, həmin tətiyi tutan əl rus "sülhməramlıları"dır. Onların himayəsi və təşviqi olmasa, bu problem çoxdan həll olardı…”.

GUNDEMXEBER.AZ-ın pravda.az-a istinadən xəbərinə görə, bunu ekspert Ələsgər Məmmədli bildirib.

“Azərbaycan tərəfinin hadisəyə sərt və açıq güc nümayiş etdirərək reaksiya verməsi, ümid edirəm, Ermənistan tərəfinin ağlını başına alması və rusların maşası olma cəhalətindən qurtulması üçün bir xəbərdarlıq olar (Buna ümid etməm olacaq anlamına gəlmir). Bununla yanaşı Azərbaycan tərəfi 10 noyabr bəyanatının və sonrakı razılaşmaların konkret tarixlər göstərilərək icra edilməsini daha aydın tələb kimi qoymalı və bütün öhdəliklərin birgə keçərli olduğunu bəyan etməli, hətta konkret vaxtda bütün tələblər yerinə gətirilmədiyi halda, Laçın dəhlizini bağlayacağını elan etməlidir. Çox aydın görünür ki, erməni tərəfi və onu cürətləndirən rus tərəfi özlərinə sərf edənləri dərhal aldıqları halda, Azərbaycana sərf edənləri icra etməkdə heç “tələsmir”. 10 noyabr Bəyanatında ermənilərə rahat gediş-gəliş imkanı tanıyan Laçın dəhlizi kəsintisiz 2 ildir işləyir, lakin Naxçıvana münasibətdə dirəniş davam edir. Bəyanatda 44 günlük müharibədən sonra erməni əhali BMT-nin qaçqınlarla bağlı qurumu tərəfindən yox, məhz rus "sülhməramlıları" tərəfindən geri qayıtdı, lakin Azərbaycanlı əhalinin geri qayıtması nəinki baş vermir, hətta təqvimi belə müzakirə edilmir. Bəyanatda Azərbaycanın öhdəliyində olan Laçından yan keçən alternativ yol 2 il ərzində bütün xərcləri çəkilərək tikildi və hazır vəziyyətə gətirildi, lakin Ermənistan üzərindən Naxçıvana gedəcək və Rusiyanın FSB-sinin (Federal Təhlükəsizlik Xidməti – red) nəzarətində olacaq yol və koridor heç layihələndirilmir də... Bəyanatda Azərbaycan tərəfinin atəşi dayandırması şərti ilə boşadılmalı olan Ağdam, Kənbəcər, Laçın ərazilərinin təhvil verilməsi ilə paralel erməni silahlılarının ərazini tərk etmələri baş vermədi, əksinə yeni sipərlər, səngərlər tikintisi davam etdi, yeni bəyanatlar, yeni istəklər gəldi… Bütün olanlar bir daha göstərir ki, Rusiyanın bölgəyə girişi problemin çözümünə yox, davam etməsinə hesablanıb. Rusiyanın dünyadakı nüfuzunun da düşməsi fonunda Azərbaycan tərəfi sadəcə erməni tərəfinə yox, Rusiyaya da açıq şərtlərini çatdırmalı, müəyyən edilən zaman kəsiyində nəticə olmasa, “sülhməramlıların” ölkədən dərhal çıxarılmasını tələb etməlidir. Azərbaycan xalqı bu davranışı göstərən hökumətin arxasında olacaq”.