Son günlər Xırdalan şəhər məktəblərində baş verən olaylar “Uzaq sahillərdə” filmindən bir epizodu mənə xatırlatdı: “Yenə həmin dalğa, yenə həmin koordinat.” Bəli, yenə müəllim, yenə hədiyyə. Bu dəfə daha bahalı, daha nümayişkarənə… İstər-istəməz öz-özümə düşündüm: “Görünür, təhsilə sanki düşünülmüş bir basqı var. Bu kimi hallara ictimai sferanın bütün sahələrində müxtəlif dərəcədə rast gəlindiyi halda, nə üçün ən çox qınağa tuş gələn məhz, məktəb və müəllim olmalıdır? Sanki, hansısa qüvvələr tərəfindən bilərəkdən müəllim nüfuzuna kölgə salınır.

GUNDEMXEBER.AZ bildirir ki, bu sözləri Moderator.az-a Xırdalan məktəblərində müəllimlərə qızıl zinət əşyalar hədiyyə edilməsi ilə əlaqədar məsələyə münasibət bildirərkən tanınmış təhsil mütəxəssisi Nadir İsrafilov deyib.
Onun sözlərinə görə, məsələnin mahiyyəti, heç də hədiyyədə və onun dəyərində və yaxud günahkar qismində hansısa müəllim və ya valideynin ittiham edilməsində deyil:
"Əvvəla, heç kəs hansısa valideyni övladının ibtidai təhsil pilləsini bitirməsi ilə əlaqədar onun müəlliminə öz diqqət və sayğısını bildirmək əlaməti olaraq hədiyyə verməsinə görə qınaya bilməz. Belə bir jest əslində valideyn tərəfindən onun övladına ikinci valideynlik etmiş müəllimə olan hörmət və minnətdarlığının təzahürü kimi qiymətləndirilməlidir. Hədiyyənin müəllim tərəfindən qəbul edilməməsi isə onun zəhmətini qiymətləndirən valideynə qarşı bir növ hörmətsizlik və saymazlıq kimi də dəyərləndirilə bilər. Qınağa səbəb olan hal isə hesab edirəm ki, hədiyyənin nümayişkarənə surətdə təqdim edilməsi olub ki, bu da yolverilməz idi.

Valideynin emosiyası hardasa başa düşülən olsa belə, müəllim gərək bundan çəkinməli idi. Axı, o müqəddəs və şərəfli müəllim adının daşıyıcısıdır. Bir də ki, bəzi sosial şəbəkələrdə “valideynlərin müəllimə qızıl əşyalar hədiyyə etməsi”, bəzilərində isə “müəllimin valideynlərə özünə qızıl əşyalar aldırması” ilə bağlı iddialar yer alıb. Halbuki, “valideynlərin müəllimə qızıl əşyalar hədiyyə etməsi” ilə “müəllimin valideynlərə özünə qızıl əşyalar aldırması” tam fərqli anlayışlardır. Araşdırılmalı məqam məhz budur. İstənilən halda, bu kimi olayların ictimailəşdirilib gündəmə gətiriməsi yol verilməzdir. Çünki, hər hansı bu qəbildən olan məsələ böyüdülüb şişirdiləndə müstəvisindən çıxıb, özünə yeni-yeni tərəfdarlar və əleydarlar tapır, şou səviyyəsinə qaldırılaraq geniş ictimaiyyəti təhsilin əsas vəzifələrindən yayındırır.
"Belə bir mövqe heç bir halda problemə ədalətli yanaşma hesab oluna bilməz. Bununla belə, kimlərsə bu kimi görüntülərin yayılmasını aşkarlıq və şəffaflığın prinsipləri kimi dəyərləndirsə də, unutmasınlar ki, müəllimin nüfuzunun aşağılanmasına xidmət edən belə “aşkarlıq” və “şəffaflıq” təkcə müəllimə deyil, bütövlükdə dövlətimizə və cəmiyyətimizə də baş ucalığı gətirmir. Bu kimi neqativ hesab edilən halların qarşısını almaq üçün bu kimi video görüntüləri tirajlamaq deyil, əlaqədar qurumlara göndərib, araşdırma nəticələrini ictimailəşdirmək daha yüksək vətəndaşlıq borcu olardı, nəinki, bir müəllimin davranışını bütövlükdə müəllim obrazı kimi ümumiləşdirmək yolunu seçmək.
Unutmayaq ki, bu kimi görüntülərin ictimailəşdirilməsi onsuz da zədələnən müəllim nüfuzuna əlavə bir sarsıdıcı zərbədir. Hansısa məktəbin hansısa müəlliminin ictimai qınaq yarada biləcək davranışının qabardəlması təkcə həmin müəllimin şəxsinə deyil, bütövlükdə ümumiləşdirilmiş müəllim obrazına xələl gətirmiş olur. İstənilən halda müəllim və valideynlər arasında nifaq sala biləcək bütün görüntülərə, çağırışlara son qoyulmalı, məktəb-müəllim-valideyn münasibətlərinin optimal həlli yolları barədə düşünülməlidir". 

Gundemxeber.az