Direktor Laura Ağayevadan ciddi narazılıq var
Son günlər bölgələrdə yerləşən təhsil müəssisələri haqqında mətbuatda çoxsaylı iddialar yer almaqdadır. Diqqətdən kənarda qalan bu cür təhsil müəssisələrində rüşvət və korrupsiyanın tüğyan etdiyi, bu qurumların yalnız “saxta diplom istehsalı” ilə məşğul olduğu barədə şikayətlərin ardı-arası kəsilmir.Hətta belə təhsil müəssisələrinin işi artıq müvafiq hüquq-mühafizə orqanlarında araşdırılır.
Bu xüsusda Ağdamdan da həyəcanlı xəbərlər gəlməkdədir. Bəlli səbəblərdən adının çəkilməsini istəməyən tələbələr Editor.az-a bildiriblər ki, Ağdam Musiqi Kolleci bazar qanunları ilə idarə olunur.
Tələbələr bildirir ki, bu təhsil ocağında heç bir işi “hörmət etmədən” yola vermək mümkün deyil. Hətta oxuyan və çalışqan tələbələrdən də pul yığıldığı, heç kimə güzəşt olunmadığı da söylənilənlər arasındadır.
Oxucuların marağını nəzərə alaraq, tələbələrin şikayətini olduğu kimi dərc edirik:
“Təhsil naziri Mikayıl Cabbarovun saxta diplomlarla bağlı xəbərdarlığı nəhayət Ağdam Musiqi Kollecinin tələbələri olaraq bizim kollecdə də neqativ halların aradan qaldırılacağına ümid yaradıb. Biz neçə il zəhmət çəkib, təhsil alsaq da, kimlərsə heç bir təhsil almadan, bir gün də olsun tədris prosesində iştirak etmədən rahat şəkildə diplom alırlar. Kollecdə sözün əsl mənasında bazar qanunları hökm sürür. Kollecin direktoru Laura Ağayeva valideynlərlə anlaşaraq, uşaqlarının dərsə gəlməməsi müqabilində ayda 130 manat pul alır. Bu pulun müqabilində isə həmin uşaqlar dərsə gəlməsələr belə, yenə də onlara yekunda diplom verilir. Hal hazırda Ağdam Musiqi Kollecində siyahı üzrə 400 tələbə təhsil alır. Amma onlardan cəmi 100 nəfəri davamlı olaraq dərsə qatılırlar. Kollecdə 103 müəllimin dərs dediyi ştatda göstərilsə də, onlardan cəmi 20-si dərsə qatılırlar. Ağdam Musiqi Kollecində pul yığmağın başqa yolları da var. Belə ki, tələbələrin təqaüdləri birbaşa direktora çatır. Bundan başqa, imtahan sessiyası da əsas gəlir mənbəyidir. Çünki Laura Ağayevanın göstərişinə əsasən hər bir tələbə imtahanlardan keçmək üçün 400 manat pul verməlidirlər. Sonuncu kurslarda isə bu rəqəm bir qədər də artıqdır. Diplom almağa gəldikdə isə həmin rəqəm 2000 manata qədər yüksəlir”.
Ünvanına səslənən ittihamlarla bağlı qarşı tərəf olaraq Ağdam Musiqi Kolleci direktoru Laura Ağayevanın münasibətini öyrənmək istəsək də, israrlı telefon zənglərimiz cavabsız buraxıldı.