Taleh Qaraşovun səhvini Əziz Əzizov davam etdirir

gundemxeber.az Ölkə mətbuatında və digər KİV-lərin səhifələrində Azərbaycanda baş verən özbaşnalıqlardan, korrupsiya əməllərindən, rüşvətxorluqdan və məmurların dələduzluq hərəkətlərindən, eləcə də saxtakarlıqdan müxtəlif səpkidə yazılar mütəmadi olaraq çap olunur. Cəlilabaddan redaksiyamıza məktub daxil olub. Olduqca acınacaqlı, eyni zamanda maraqlı faktla zəngin olan bu məktubu qəzetimizin səhifəsinə olduğu kimi yerləşdirməyə qərar verdik.
Məktubda qeyd olunur ki, Azərbaycan Respublikasında keçirilən torpaq islahatı zamanı Cəlilabad rayonunda o vaxtkı RİH başçısının etdiyi bir səhv indi də xalqı narahat edir. “Yəni, torpaq islahatı qanunlarına əsasən Respublika ərazisində yaşayan hər bir vətəndaşa rayon ərazisində bölgü zamanı kənd təsərrüfatı məhsullarını istehsal etmək üçün əkin yeri, yəni pay torpağı verilməlidir. Bu, ölkə Prizdentinin imzası ilə təsdiq olunmuş Qanun idi. Lakin o vaxtlar, Cəlilabad RİH başçısı vəzifəsində işləyən Tofiq Bağırov bu qanuna zidd hərəkət edərək, rəhbərlik etdiyi Rayon Aqrar İslahat Komissiyasının adından öz xeyrinə olan bir qərar qəbul etdi. Bu qərara görə Cəlilabad rayonunda yerləşən R.Axundov adına sovxozun ərazisini parçalayıb, istədiyi adamlara paylaşdırdı. Onunla da R.Axundov adına sovxozun torpaqlarının əhatəsində yerləşən Cəlilabad şəhər ərazisinin üç hissəsində yaşayanları və güya sovxozda işləyərək 2 il staja malik olanları torpaq payı ilə təmin edib, şəhərin mərkəz hissəsində yaşayanlara isə «Yox!» cavabı verilib.
Şəhər əhalisi narazılıq etsələr də, onlara əhəmiyyət verən olmadı. Hətta onları polis, məhkəmə gücünə susdurdular. Hədə-qorxu gəldilər ki, yaxın qohumunuzu işlədiyi yerdən qovacağıq və yaxud dolayısı yolu ilə onlara mesaj göndərdilər ki, “Cavan övladlarınızı, əsgəri yaşında olanları cəbhə bölgəsinə” göndərəcəyik, ya da ki, “xuliqanlıq” etdiklərinə görə həbsə atdıracağıq”.
Çıxılmaz vəziyyətə düşmüş sakinlər torpaq almaqdan vaz keçdilər. Lakin, onların arasında öz haqlarını tələb edənlər də az deyildi. O zamankı RİH başçısı və torpaq islahatı bölgüsündə komissiya üzvü olan məmurlar tutduqları vəzifədən azad olduqdan sonra, hüquqları pozulmuş Cəlilabad sakinləri yeni təyin olunmuş RİH başçısının qəbuluna düşüb, onlara düşən pay torpağını almaq üçün müraciət etdilər. 2002-ci illərdə RİH başçısı vəzifəsində işləyən T.Qaraşov və 2006-cı ilin avqust ayının 08-də Cəlilabad rayon İH başçısı vəzifəsinə təyin olunmuş Əziz Əzizov tərəfindən qismən də olsa, bu ərizələrə baxıldı və ilkin araşdırmalar zamanı məlum oldu ki, R.Axundov adına sovxozda torpaq islahatı düzgün aparılmayıb və ölkə Prezdentinin imzaladığı sərəncamın icrası köbud şəkildə pozulmuşdur. Belə ki, Cəlilabad rayon İH-nin sərəncamı ilə yaranmış Rayon Aqrar İslahat Komissiyası dövlət başçısının imzaladığı qərara zidd olaraq, özlərinin xeyrinə xidmət edən qərar çıxarmış və hətta həmin qərarın icrası zamanı da böyük saxtakarlıqlara əl atmışlar. Nəticədə, 150-200 nəfərdən çox qurama şəxslərə torpaq payı ayrılmışdır. Bundan savayı R.Axundov adına sovxozda keçrilmiş islahat zamanı, həmin təsərrüfatda 30-40 il əvvəl işləyib ölənlər, eləcə də digər şəhər və rayonlara köçüb gedənlər, hətta həyatda heç bir zaman mövcud olmayan qurama şəxslərin adlarına rast gəlmək mümkündür. Artıq, bu şəxslərə torpaq payı bölünüb və bu haqda dövlət aktı hazırlanmışdır.
2007-ci ilin ilk aylarında aparılan araşdırmalar zamanı saxta sənədlərlə və yaxud qohumbazlıqla, tanışlıqla, o cümlədən «Hörmətlə» əldə olunmuş pay torpaqlarına aid tərtib edilmiş dövlət aktları toplanaraq yoxlanılırdı. Müxtəlif saxtakalıqlarla və gizlincə zəbt olunmuş torpaq sahələri aşkar olunaraq həqiqi sahiblərinə, Cəlilabad Rayon Aqrar İslahat Komissiyasının ilk sədrinin təbirincə desək, kolxoz və sovxozlarda işləyən və ən azı 2 il əmək stajı olan şəxlərə verilir. Oğurluq və digər saxtakarlıqlarla torpaq payı əldə edənlərin bəziləri isə narazılıq edərək, həmin məmurlara rüşvət verib, torpaq payı aldıqlarını açıq-aşkar bildirirdilər. Lakin, ədalət naminə desək, Cəlilabad rayon İH başçısı Əziz Əzizov rayon torpaq şöbəsinin işçilərinə ciddi olaraq göstəriş verdi ki, “bütün şikayətçilərin ərizələri qəbul olunub, araşdırılsın və Qanun çərçivəsində vətəndaşlara cavab verilsin!”
Maraqlıdır, görəsən Cəlilabadda baş vermiş bu torpaq maxinasiyasında vətəndaşlar özləri hansı saxtakarlıqlar edərək, pay torpağı almışlar? Araşdırmalar nəticəsində aşkar edilmişdir ki, 22 iyul 1980-cı ildə Cəlilabad rayon Daxili İşlər şöbəsi tərəfindən şəhər sakini Həsənova Qiymət İbi qızına (25.10.1962 təv.) verilmiş XIII ЖГ seriyalı 502329 nömrəli sovet pasportunun şəkilsiz titul səhifəsi ksero aparatı ilə surəti çıxarılmışdır. Həmin ksero surətdə vətəndaşın familiyası Həsənova, adı Qiymət, atasının adı isə İbi olduğu halda, naməlum alətlə “Həsənova” familiyasının 2-ci və 4-cü hərfləri pozularaq “ə” hərfi, “ü” və “e” hərfi ilə əvəzlənmiş, o cümlədən familiyanın beşinci qrafasına “y” hərfi əlavə edilərək “Hüseynova” kimi düzəldilmiş və yenidən ksero surət çıxardılaraq saxta pasport formasına salınmışdır. Saxtalaşdırılmış bu ksero surəti Cəlilabad rayon Dövlət Arxivinə təqdim edərək, 22 yanvar 2004-cü il tarixdə oradan digər bir vətəndaşa – Hüseynova Qiymət Uruf qızına məxsus olan əmək haqqı cədvəlindən və R.Axundov adına sovxozdan iş stajı barədə arxiv arayışı əldə olunmuşdur. Saxtakarlıqla məşğul olan Cəlilabad şəhərinin 1 May küçəsində yaşayan Həsənov İbi Xuduş oğlu fırıldaq yolu ilə əldə etdiyi arxiv çıxarışını rayon torpaq şöbəsinə təqdim etmiş, R.Axundov adına sovxozun ərazisindən qızı Qiymətin adına saxta pay torpağı almışdır.
Arxivdən fırıldaq yolu ilə alınmış bu arayış əsasında Cəlilabad Rayon Aqrar İslahat Komissiyasında 26 iyul 2004-cü il tarixli 07 saylı qərar ilə saxtalaşdırılmış, həyatda heç bir zaman mövcud olmayan bir şəxsin adına (Qiymət İbi qızı Hüseynova-?) dövlət aktı tərtib olunaraq, kənd təsərrüfatı məhsulları istehsalı üçün 0,81 hektar pay torpağı təhkim olunmuşdur. JN 0462 seriyalı 80601404 şifrəli həmin sənəd Dövlət Aktı Qeydiyyatı kitabında 29642 reyester nömrəsi ilə qeydiyyata götürülmüş və 06 oktyabr 2005-ci il tarixdə Həsənov İbi Xuduş oğluna verilmişdir.
Məlumat üçün bildiririk ki, R.Axundov adına sovxozda fəhlə işləyən və sənədləri Cəlilabad rayon dövlət arxivində mühafizə olunan Hüseynova Qiymət Uruf qızı 06 fevral 1962-ci ildə Cəlilabad şəhərində anadan olmuşdur. Rayon VVAQ şöbəsində 1962-ci il fevral ayının 08-də onun adına AZ № 135543 saylı doğum haqqında şəhadətnamə verilmiş və bu barədə qeydiyyat kitabında 73 saylı reyesterə alınmışdır. Həmin sənəddə qeyd olunur ki, onun atası Hüseynov Uruf Məmmədəli oğlu (1912 təv.), anası isə Ağayeva Simzər Mirzəli qızı (1924 təv.) olmuşdur. Valideyinlərin hər ikisi, o cümlədən qızları Qiymət, R.Axundov adına sovxozda fəhlə işləmişdir.
Əgər, yalnız kolxoz və sovxozda işlyənlərə torpaq payı düşürsə, nə üçün heç bir zaman təsərrüfatda işləməyən və anadan gəlmə əlil olan Həsənova (Hüseynova) Qiymət İbi qızı adlı şəxsə 0,81 hektar pay torpağı ayrılıb. DTXK-nin rəsmi statistik sənədlərindən məlum olur ki, Cəlilabadda torpaq islahatı ilə məşqul olmuş dələduz məmurlar tərəfindən yüzlərlə belə şəxsin adına torpaq payı ayrılmış və R.Axundov adına sovxozun torpaqlarını hərraca qoyaraq istədikləri adamlara satmışlar. Buna nə ad vermək olar? Korrupsiya, rüşvətxorluq, yoxsa oğurluq? Yaxşı olardı ki, bu sualın cavabını Cəlilabad rayon rəhbərliyi, Məhkəmə, Prokurorluq və aidiyyəti üzrə təşkilatlar araşdırsın”.
İnformasiya şöbəsi