Sabunçu rayonu, Kürdəxanı qəsəbə bələdiyyəsində külli miqdarda yeyinti aşkarlanıb. Bu haqda Moderator.az-a daxil olan məlumatda deyilir ki, Baş Prokuror yanında Korrupsiyaya Qarşı Mübarizə İdarəsində aparılan araşdırma zamanı Bakı Dairəvi Yolunun altına düşən və Kürdəxanı bələdiyyəsinin ərazisi olan torpaqların sahiblərindən satın alınması zamanı külli miqdarda büdcə vəsaiti ələ keçirilib. Bəzi məlumatlara görə, mənimsənilən vəsaitin miqdarı 6 milyon manat civarındadır.

Baş verən yeyintiyə görə, bir neçə gün əvvəl Sabunçu Rayon İcra Hakimiyyətinin başçısı Adil Vəliyevin rəhbərliyi ilə iclas keçirilib. İclasdan sonra Kürdəxanı bələdiyyəsinin sədri Sabir Əliyev tutduğu vəzifədən uzaqlaşdırılıb. Onun əvəzinə yerli poliklinikada uşaq həkimi vəzifəsində çalışan Həqiqət adlı xanım sədr seçilib.

Məsələ ilə bağlı Sabunçu Rayon İcra Hakimiyyəti ilə əlaqə saxladıq. Qurumdan bələdiyyə sədrinin tutduğu vəzifədən uzaqlaşdırıldığını bildirdilər: “Kürdəxanı bələdiyyəsinin sədrinin dəyişdirilməsi ilə bağlı icra hakimiyyəti rəhbərliyinin iştirakı ilə heç bir iclas keçirilməyib. Sabir Əliyev xəstəliyi ilə əlaqədar tutduğu vəzifədən gedib və bələdiyyə üzvləri yeni sədr seçiblər”.

Baş Prokurorluğun mətbuat xidmətinin rəhbəri Eldar Sultanov isə bildirib ki, Baş Prokuror yanında Korrupsiyaya Qarşı Mübarizə İdarəsi Kürdəxanı bələdiyyəsində hər hansı bir araşdırma aparmayıb. “Yeni Müsavat”a daxil olan digər bir məlumatda isə bidirilir ki, Kürdəxanı bələdiyyəsində baş verənlərlə bağlı Tahir adlı yerli sakin saxlanılıb. Qəsəbədə nüfuzu olan bu şəxsin həbsinin detalları bəlli olmasa da, onun bələdiyyədə baş verənlərlə əlaqədar həbs edilməsi haqda məlumat var.

Belə xəbərlər də var ki, Kürdəxanı bələdiyyəsində baş verən son olaylardan sonra 2009-cu ildə intihar edən sözügedən bələdiyyənin sədrinin özünəqəsdinin yenidən araşdırılmasına da göstəriş verilib.

Qeyd edək ki, 2009-cu il iyunun 23-də Kürdəxanı bələdiyyəsinin sədri Balahüseyn Babayev yaşadığı ünvanda özünü asmışdı. Onun intiharı ilə əlaqədar Cinayət Məcəlləsinin 125-ci - özünü öldürmə həddinə çatdırma - maddəsi ilə cinayət işi başlansa da, sonradan qapadılmışdı. Həmin vaxt belə məlumatlar vardı ki, bələdiyyə sədri xarici investorların Kürdəxanı bələdiyyəsinin hesabına köçürdüyü 2 milyon manat vəsaitin mənimsənilməsi ilə bağlı Baş Prokurorluqda sorğu-sual olunduqdan sonra intihar edib.
Mövzuya qayıdacağıq.