Pis işləsəydi, Ramik Əşrəfovu "Azərbaycan Yaşıllaşdırma və Landşaft Quruluşu” Açıq Səhimdar Cəmiyyətinin sədr əvəzi vəzifəsinə irəli çəkərdilərmi?

...Qubada onu Romik müəllim kimi tanıyırdılar. Deyilənə görə, meşəçilik üzrə yüksək ixtisaslı kadrlarımızdandır. Bu fikrə elə mən də "mız" qoymuram. Çünki, meşələrimizin harayına səs verən ekoloqlara xüsusi hörmətim var. Ekologiya və Təbii Sərvətlər Nazirliyi "Azərbaycan Yaşıllaşdırma və Landşaft Quruluşu” Açıq Səhmdar Cəmiyyətinin sədr əvəzi Ramik Əşrəfov da belə diqqətəlayiq insanlarımızdandır. 2004-2011-ci illərdə Ekologiya və Təbii Sərvətlər Nazirliyinin Quba Meşə Mühafizəsi və Bərpası Müəssisəsinin direktoru vəzifəsində işləyib. Bu vəzifədə Romik müəllimin buraxdığı izləri hələ də yaxşı xatırlayırlar. O vaxtlar Qubada meşələrin qırılma səbəbini araşdıran ləpirçi qaqaşlar qəribə bir faktla qarşılaşmışdılar.
Məlum olmuşdu ki, meşələrin qırılmasından şikayətçinin adı Armen imiş. Bu amil Armenin də gələcəyinə böyük perspektivlər vəd etdi, həm də meşələr bəladan qurtardı...Deyilənə görə, qurtulmuş ağaclar ansambl yaradıb eyni səslə azadlıq odasını zümzümə edirmişlər. İnanmırsınız? Elə mən də bir vaxtlar heyrət içində bu nağıllara qulaq asırdım. Eşitdim ki, qırmızı ləpirçilər həmin o materialları bitdə-ditdə arxivləşdirib ötürüblər Ekologiya və Təbii Sərvətlər Nazirliyinə. İndi yox e, vaxtında ötürüblər ki, tədbirini görən tapılsın. Tapıldı da. Tezliklə Romik müəllimi Qubadan Kür-Araz ovalığına təcili transfer elədilər. Hələ buna qədər Oğuz, Daşkəsən və bir sıra digər meşələrin mühafizi olmuş Romik Əşrəfovun sən demə 2011-2013-cü illərdə xüsusi istedadı üzə çıxdı. Ekologiya və Təbii Sərvətlər Nazirliyinin rəhbərliyi ona Kür-Araz Boyu və Digər Yaşayış Məntəqələrində İstifadə Olunan İçməli Suyun Ekoloji Standartlarına Nəzarət və Təminat Mərkəzini abıra salmağı tapşırdı. Deyəsən, bu vacib vəzifədə pis işləməyib. Pis işləsəydi Romik müəllimi məgər Ekologiya və Təbii Sərvətlər Nazirliyi "Azərbaycan Yaşıllaşdırma və Landşaft Quruluşu” Açıq Səhimdar Cəmiyyətinin sədr əvəzi vəzifəsinə irəli çəkərdilərmi?
Qeyd edək ki, 8 yaşıllaşdırma idarəsini özündə birləşdirən Səhmdar Cəmiyyət ölkənin qeyri-meşə fondu torpaq sahələrində, o cümlədən magistral avtomobil yollarının mühafizə zolaqlarında yaşıllıqların salınması və onlara qulluq göstərilməsi işini həyata keçirir. Konkret desək, söhbət Bakı-Quba, Bakı-Qazax, Bakı-Astara, Bakı-Şamaxı avtomagistralının müəyyən hissələrini, eynən də paytaxtın Bayıl yamacını, Sabunçu dairəsini və Heydər Əliyev Hava Limanına aparan Zığ şossesinin ətrafını əhatə edən yaşıllaşdırma işlərindən gedir. Sizə zarafat gəlməsin e, bu boyda "obyomu" var Cəmiyyətin. Deməli ortada həm də yaxşı büdcə vəsaiti var. Həm də görülən və görülməyən işlərin yeganə şahidi dilsiz-ağızsız torpaq var. Romik Əşrəfov üçün bunlar Qubadakı kimi xırda-mırda problemlər qutusuna sığmaz. Həm də ki, problemlər heç kəsə, şəxsən Romik müəllimə də sərf eləmir. Ona görə də, işləmək lazımdır. Yoxsa Quba ləpirçilərinin əli uzundu, bir də görəcəksiniz ki, Armenin izinə düşüb Bakıyacan gəlib çıxıblar...