Ölkədəki bəzi nazirliklərin yerlərdəki şöbələrinə ğöndərdikləri kadrlar əksər hallarda işlərinin öhdəsindən gələ bilmir və əhali üçün ciddi problemlər yaradırlar. Bu çox vaxt rayonu tanımayan, eyni zamanda əvvəllər hansı bir sahədə çalışıb vəzifəsindən biabırçılıqla uzaqlaşdırılanlara aid edilir. Belə bir hal ekologiya və təbii sərvətlər nazirliyinin 2 ildən artıqdır ki, Ağstafa Rayon Meşə Bərpası və Mühafizəsi Müəssisəsinə göndərdiyi kadrda özünü təsdiqləyir. Hər bir rayonun və şəhərin bacarıqlı, önəmli fəaliyyət nəticəsində yetişmiş kadrları olduğu halda kimlərinsə xahişi ilə digər yerlərdən iş yarıtmazların vəzifələrə qoyulması ictimaiyyət arasında da ciddi narazılığa səbəb olur. Sözügedən müəssisənin hazırkı müdiri isə ekologiya və təbii sərvətlər nazirliyindən göndərilmiş, Tovuz rayonundan olan Fəzail Məmmədhəsənovdur. Onun haqqında az da olsa əvvəlini vərəqləsək görərik ki, o, vaxtı ilə Tovuz rayonunun Qovlar qəsəbəsində fəaliyyət göstərən, adını çəkməklə reklam etmək istəmədiyimiz qardaşına mənsub şirkətdə işləyib. Həmin dövr yüksək vəzifə xəyalına düşən Fəzail Məmmədhəsənov başına dəstə toplayaraq Tovuz Rayon İcra Hakimiyyətinə qarşı çıxır və icra hakimiyyətinin binasına hücuma keçirlər. Binadakı inventar və avadanlıqlara xeyli ziyan dəyir. Hüquq – mühafizə orqanları onu bu hərəkətlərinə görə cəzalandırırlar. Nəticədə, məhkəmə yolu ilə icra hakimiyyətinə dəyən ziyan ödənilir. Sonradan belə bir kadrın Ağstafa Rayon Meşə Bərpası və Mühafizəsi Müəssisəsinə müdir göndərilməsi necə qiymətləndirilə bilər? Onun müdirliyi də ağstafalıların gözləri qabağındadır. Həftənin 1 və ya 2 gününü işdə tapılan müdir, stulunda saat 11-dən sonra olur. O da ki, necə deyərlər, qaçaraq... İdarədə nə vaxt səsi küçəni götürən hay-küy olanda Məmmədhəsənovun iş başında olması müəyyən olunur. Onun tabeçiliyində olan meşə ərazisində mal-heyvanın əlindən durmaq mümkün deyil. Əkin-biçin sahəsində də çox gerilikdir. Bu yaxınlarda idarəyə nazirlikdən gələn ytoxlama da Məmmədhəsənovun yarıtmaz işindən “qanıqara” gedib. Bundan əlavə, Fəzail Məmmədhəsənov Ağstafa camaatının nəzərində qəbuluna gedənlərlə ən çox danışan, boş yerə vaxt aparan müdir kimi də qalmaqdadır. Məsələ burasıdır ki, rayon əhalisi Fəzail Məmmədhəsənovu belə görüb əvvəlki müdirin atasına rəhmət oxuyurlar. Elə əvvəlki müdir də işində yol verdiyi nöqsanlara görə işindən kənarlaşdırılıb. “Yağışdan çıxıb, yağmura düşən” kimi müdirlik stuluna əvvəlcədəın ciddi qanun pozuntusuna yol verənin təyin olunması bir növ idarənin nazirlik tərəfindən “sarınması” kimi də qiymətləndirilir. Hazırda işinin öhdəsindən layiqincə gələ bilməməsi və nazirlik tərəfindən yaxşı qiymətləndirilməməsi onun tutduğu vəzifədən tezliklə kənarlaşdırılacağı söylənilir. Belə halda son məsuliyyətin kimin üzərində qalması da maraq doğurmaya bilməz.
Vəkil Rüstəm