Sumqayıt şəhəri, MİK-13, ev 55, m.86 ünvanında yaşayan Manafova Mehparə Əlikram qızı Maliyyə Nazirliyi və Bakı Metropolitenini məhkəməyə verib.


Bakı şəhəri Nəsimi Rayon Məhkəməsinə müraciət edən iddiaçının sözlərinə görə, o, 1994-cü il 19 martda Bakı Metropoliteninin 20 Yanvar stansiyasında elektrik qatarında Ermənistan xüsusi xidmət orqanlarının rəhbərliyi ilə separatçı “Sadval” təşkilatının üzvləri tərəfindən törədilən terror aktı nəticəsində ağır bədən xəsarəti alaraq 1-ci qrup əlil olub:

“14 nəfərin həlak olduğu, 49 nəfərin müxtəlif dərəcəli bədən xəsarəti alması ilə nəticələnən məlum terror aktı zamanı 19 yaşım vardı. Ağır bədən xəsarəti alaraq 1-ci qrup əlil oldum. Bu fakt Azərbaycan Respublikası Ali Məhkəməsinin arxivində olan 35-97 saylı cinayət işinin materiallarında zərərçəkmiş şəxs qismində tanınmam barədə sənədlərdə, terror aktı nəticəsində aldığım xəsarətlərin müəyyən edilməsinə dair 11 aprel 1994-cü il tarixli ekspert rəyinin və həmin cinayət işi üzrə zərərçəkmiş şəxs qismində tanınmağım barədə 9 aprel 1994-cü il tarixli Bakı nəqliyyat Prokurorunun qərarında öz əksini tapıb. 11 aprel 1994-cü il tarixli 982 saylı rəydə qeyd edilir:

“Vətəndaş Manafova Mehparə Əlikram qızının aldığı xəsarətlər sifətin və aşağı ətrafların II-III dərəcəli yanıqları alovun təsirindən, sol bazunun üçdə birindən travmatik qopması, sağ dirsək oynağının yuxarı 1/3-nin açıq sınığı, kürək nahiyəsindəki yara, II-III dərəcəli travmatik şok küt əşyanın/əşyaların təsirindən törədilmişdir”.

Qeyd olunan xəsarətlər yetirilərkən həyat üçün təhlükəli olan və əmək qabiliyyətinin üçdə birindən az olmamaqla 70 % daimi itirilməsinə səbəb ağır dərəcəli bədən xəsarətlərinə aiddir. Bu günə kimi həmin terrorun acılarını bədənimdə daşımağa davam edirəm. Həmin tarixdən sonra mütəmadi olaraq müalicə və müayinə olunmuşam.

Neyrosikulyar vegetodistoniya qarışıq tip, dəmir defistli anemiya, tez-tez müşahidə olunan allergik reaksiya (qida və dərman preparatlarına qarşı) Virus C diaqnozu ilə dispanser qeydiyyatındayam. Bütün bunlar Bakı Metropoliteninin 20 Yanvar stansiyasında elektrik qatarında Ermənistan XXO rəhbərliyi ilə separatçı Sadval Ləzgi Xalq Hərəkatı təşkilarinin üzvləri tərəfindən törədilmiş terror aktında aldığım xəsarətlərin nəticəsində baş verib”.

M.Manafovanın sözlərinə görə, elektrik qatarında terror aktını törətmiş şəxslərin əksəriyyəti hazırda cəzaçəkmə müəssisəsindədir və ömürlük azadlıqdan məhrumetmə cəzası ilə cəzalandırılıblar : “3 may 1996-cı il tarixli İş № 45 saylı hökmdən görünür ki, işdə mülki iddia həmin dövrün məzənnəsi ilə 45.726.793 manat müttəhimlərdən müştərək qaydada alınıb Bakı Metropoliteninin hesabına verilib. Ancaq həmin vaxt bizə dəymiş maddi və mənəvi ziyan ödənilməyib. Fiziki şəxslərə dəymiş maddi və mənəvi zərərin əvəzi ilk növbədə ödənilməli olduğu halda, Bakı Metropoliteninə dəymiş zərərin əvəzi ödənilib. Hesab edirəm ki, mənə dəymiş maddi və mənəvi zərərin əvəzi Maliyyə Nazirliyi və Bakı Metropolitenindən müştərək qaydada tutulub mənə ödənilməlidir”.

Mehparə Manafova Bakı Metropoliteni və Maliyyə Nazirliyindən ona dəyən 100 000 manat mənəvi zərərin, illik müalicə və müayinə olunmaq, dərman preparatlarını almaq, sosial reablitasiya və kurort xərcləri üçün son 3 il üçün 15.000 (on beş min) manat və gələcəkdə hər il üçün 5 000 manat məbləğində birdəfəlik ödənişin verilməsini tələb edir.