ABŞ-ın Quantanamo hərbi bazasındakı həbsxanada saxlanılan “əl-Qaidə”çi, 2002-ci ildə Yəmən sahillərində Fransa bayrağı altında üzən tankerin partladılımasını təşkil edənlərdən biri olan Ahmed Muhammed Haza əl-Darbi nəhayət özünü ona qarşı irəli sürülmüş bütün ittihamlar üzrə təqsirli sayıb.

Virtualaz.org saytı Amerika KİV-lərinə istinadən xəbər verir ki, əl-Darbi hərbi komissiya qarşısında verdiyi ifadədə bu terror aktını necə təşkil etdiyini danışıb və istintaqla əməkdaşlıq edib.

Əl-Darbinin terrorçuluq cinayətləri üzrə ona qarşı irəli sürülmüş ittihamları qəbul etməsi “əl-Qaidə”çinin Quantanamo həbsxanasından çıxması perspektivi yaradır. Bildirilir ki, 39 yaşlı Səudiyyə Ərəbistanı vətəndaşı bundan sonra ən azı 3 il yarım Quantanamoda saxlanılacaq, daha sonra onun Səudiyyə Ərəbistanına veriləcəyi gözlənilir.

Əl-Darbi 2002-ci ildə,Yəmən sahillərində törədilmiş terror aktından bir neçə ay əvvəl Bakıda ABŞ xüsusi xidmət orqanlarının və yerli polisin keçirdiyi birgə əməliyyatda həbs olunub. Daha sonra terrorçu xüsusi təyyarə ilə Bakıdan Əfqanıstandakı Bahram aviabazasına, oradan isə Quantanamoya aparılıb.

ABŞ kəşfiyyatının əl-Darbi barədə hazırladığı məxfi dosye bir neçə il əvvəl Birləşmiş Ştatlar ordusunun serjantı Bredli Minninq tərəfindən ələ keçirilmişdi və yayılmışdı. Bredli Minninq ABŞ-ın yüz minlərlə məxfi sənədini ələ keçirərək WikiLeaks saytına ötürdüyü üçün hazırda həbsdədir.