Sabiq metro şefinin vəzifədən çıxarılması və ticarətinin ləğv
edilməsi təkcə naxçıvanlı qruplaşmaya bağlılığı deyilmiş;
işin arxasında yeni təfərrüatları ortaya çıxır...

Tağı Əhmədovun biznesi yağmalandı. Son bir həftədə sabiq metro şefinin obyektləri yerlə-yeksan olundu. Ticarətçilərin köşkləri bir gecənin içərisində söküldü. Onların əksəriyyətinə başqa yerlərdə mağaza verildiyi söylənsə də, işin əsl mahiyyəti T.Əhmədova ən böyük zərbənin olması idi. T.Əhmədov bütün mağazalarından məhrum oldu. Həmçinin, evinin yerləşdiyi “Sahil” ticarət mərkəzinin yanması, “Moskva” univermağının külə dönməsi də sabiq məmurla bağlıdır.
Bu barədə şərh verən məlumatlı şəxs qeyd etdi ki, T.Əhmədovun “vurulması” Naxçıvan qruplaşmasına qarşı başlanmış səlib yürüşünün tərkib hissəsidir. Onun sözlərinə görə, onun Metropoliten rəhbərliyindən alınması naxçıvanlı qruplaşmasına endirilən növbəti nokaut idisə, digər səbəbi başqadır.
Bu haqda özəl olaraq “Gündəm-xəbər”ə danışan həmin şəxs deyir ki, əslində T.Əhmədova xaricdə təhsil almağa gedən naxçıvanlılar dəstək olurdu.
Mənbəmiz bildirir ki, naxçıvanlı tələbələrin xaricdə oxumasına maddi dəstəyi olduğu öyrənilib. Bunun mənfi cəhəti olmasa da, hakimiyyətdə ona əks cinahda olanların maraqlarını üstələyib. Bu da onun işdən alınmasına səbəb olub. Mənbə bildirir ki, T.Əhmədov hakimiyyətdə əsas güclərdən biri olub. Onun zəiflədilməsi də buna hesablanıb.
Artıq metronun 21 stansiyasında ticarət dayandırılıb. Hazırda metronun “Nəriman Nərimanov”, “Memar Əcəmi” və “Neftçilər” stansiyalarında köşklərin yığışdırılması prosesi davam etdirilir, “Xalqlar Dostluğu” və “İnşaatçılar” stansiyalarında isə işlər günün sonuna qədər başa çatdırılacaq. Qeyd edək ki, Bakı Metropolitenində ümumilikdə 1194 ticarət obyektinin sökülməsi planlaşdırılıb.
Rafiq Qara